लागुऔषधका अम्मली डगौराले सुन लुट्ने योजनाले जब वृद्धाको घाँटी च्यापे

A+ A A-

कञ्चनपुरको शुक्लाफाँटा नगरपालिका– ७, शान्तिपुरका ६५ वर्षीया नारुदेवी जोशीको हत्या आरोपमा प्रहरीले एक जनालाई पक्राउ गरी सार्वजनिक गरेको छ ।

गत कात्तिक १९ मा घरनजिकै मृत भेटिएका जोशीको हत्या आरोपमा जिल्ला प्रहरी कार्यालय कञ्चनपुरले आज स्थानीय महेश डगौरालाई सार्वजनिक गरेको हो ।

जिल्ला प्रहरी कार्यालय कञ्चनपुरका प्रमुख प्रहरी उपरीक्षक कमल थापाले घरनजिकै रहेको जङ्गलमा घाँस काट्न गएकी जोशीको हत्यामा संलग्न रहेको अनुसन्धानबाट पुष्टि भएपछि डगौरालाई सार्वजनिक गरिएको बताए । 'डगौरा लागुऔषध प्रयोगकर्तासमेत रहेछन् । उनले नारुदेवी एक्लै घाँस काट्न जङ्गल जाने क्रममा देखेपछि पिछा गर्दै गएको पुष्टि भएको छ ।' प्रहरी उपरीक्षक थापाले भने, 'डगौराले घाँस काटिदिन्छु भन्दै घाँटी च्यापेर हत्या गरेको स्वीकार गरेका छन् ।'

वृद्धाको हत्यापछि सुन लुटपाट गरेको र सुन बिक्रीका लागि धनगढी पुगेको प्रहरीको अनुसन्धानबाट खुलेको छ । 'यसअघि डगौराले साइकल चोर्ने र लुटपाट गर्ने गरेको देखियो,' उनले भने, 'वृद्धाको हत्या गरी कान, नाकलगायतका तीन थान गहना तीन पसलमा बिक्री गरेको देखियो ।' उनले हत्या गरेकै दिन डगौराले सुन बिक्री गरेर धनगढीदेखि नेपालगञ्जहुँदै मुम्बई बैङ्गलोर भागेको बताए ।

धनगढीका तीन पसलमा ४६ हजारको सुन बिक्री गरेको प्रहरी अनुसन्धानबाट खुलेको छ । वृद्धाको हत्यापछि १ दशमलव ५० आनाको फुली, १ दशमलव ६९ को मुन्द्रा र दुई दशमलव ७ आनाको अर्को मुन्द्रा लुटपाट भएको थियो ।

नारुदेवीको हत्यामा संलग्न महेश डगौरा, सुन बिक्री गर्न सहयोग पुर्‍याउने लक्ष्मण चौधरी, निरज भट्ट र सुन खरिद गर्ने इन्द्रबहादुर बराल, खगेन्द्र सोब र दीपेन्द्र सिजापतिलाई आज कञ्चनपुर प्रहरीले सार्वजनिक गरेको छ । सुनचाँदी पसलेलाई लक्ष्मण चौधरी र निरज भट्टले श्रीमती बिरामी भएकाले आपतमा सुन बिक्री गर्नुपरेको बताएका थिए ।

प्रहरी उपरीक्षक थापाले पाँच जनाविरुद्धमा फरकफरक मुद्दा आकर्षित हुने बताए । महेश डगौराका नाममा कर्तव्य ज्यान र लुटपाट, अन्य मतियार, सुन पसलधनी विरुद्धमा गैरकानुनी सुन खरिदबिक्रीको मुद्दा लगाउने तयारी गरेको प्रहरीले छ ।

प्रकाशित मिति: बिहीबार, मंसिर ७, २०८० १४:०६