६ महिनादेखि फरार मेयर देवकुमारको सन्देशः १८ वटै घर बेचेर बचत फिर्ता गर्छु, छिट्टै सार्वजनिक हुन्छु

६ महिनादेखि फरार मेयर देवकुमारको सन्देशः १८ वटै घर बेचेर बचत फिर्ता गर्छु, छिट्टै सार्वजनिक हुन्छु

A+ A A-

सहकारीको रकम अपचलन गरेर फरार बागलुङको ढोरपाटन नगरपालिकाका मेयर देवकुमार नेपालीले आफूले सबै सम्पत्ति बेचेर भए पनि बचतकर्ताको पैसा फिर्ता गर्ने बताएका छन् ।

गत जेठदेखि फरार रहेका इमेज बचत तथा ऋण सहकारी संस्थाका अध्यक्ष नेपालीले मंगलबार फेसबुकमार्फत भिडियो सन्देश जारी गर्दै सम्पत्ति बचतकर्तालाई हस्तान्तरण गर्ने वातावरण बनाइदिन सरकारी संयन्त्रलाई आग्रह गरेका छन् ।

श्रीमती र आफ्नो नाममा गरेर ४५ कित्तामा बुर्तिबाङमा ७, काठमाडौंमा ६, पोखरामा ३ र बागलुङमा २ गरेर आफ्नो १८ वटा घर रहेको उनले खुलाएका छन् । ‘सम्पूर्ण बचतकर्ताको नाममा, मेरो र मेरो श्रीमतीको नाममा भएको जग्गा विभिन्न मालपोत कार्यालय गएर हस्तान्तरण गर्न चाहन्छु,’ उनले भनेका छन्, ‘हस्तान्तरण गर्नका लागि वातावरण मिलाइदिन कानुन निकाय, राजनीतिक दल, नागरिक समाज, पत्रकार र विभिन्न सरोकारवालाज्यूहरूलाई अनुरोध गर्दछु ।’

हिसाब मिलान गर्न ६ महिनाको समय मागेकोमा गर्न नसकेको अध्यक्ष नेपालीले स्वीकारेका छन् । बचत फिर्ता गर्न नसक्दा घरमा आएर धम्की दिइएको र बाहिर बसेर काम गर्नुपरेको नेपालीको जिकिर छ । उनले आफू छिट्टै सार्वजनिक हुने पनि बताएका छन् । तर, कहाँ छु भन्ने खुलाएका छैनन् ।

इमेज सहकारीले दुई अर्ब अपचलन गरेको भन्ने हल्ला चलाइएको उनको दाबी छ । ‘कतिपय बचतकर्ताले १० हजार बचत गरेकोमा १० लाख रूपैयाँको निवेदन गरेका छन् । कतिपय ५० लाख रुपैयाँ भएकोमा ९० प्रतिशत कर्जा लगेर ५० लाख रुपैयाँ नै दाबी गरेका छन्,’ उनको दाबी छ, ‘यसै कारणले इमेजमा २ अर्बको बचतको हल्ला चलेको छ । यो सत्य छैन ।’

ऋण लगेर पनि ऋण लगेको नभन्ने, संस्थाका कर्मचारीले एकलौटी गरेर कर्जा लगानी गरेर दोष लगाएको नेपालीको आरोप छ । एकैपटक बचत फिर्ता लिन आउँदा समस्या भएको, आफूलाई असफल पार्न राजनीतिक विषय जोडिएको तर तत्काल केही नबोल्ने उनले बताएका छन् ।

देवकुमारकी श्रीमती छेला तिब्बती हुन् । त्यसैले उनीहरू तिब्बततिर गएको आशंका गरिए पनि यकिन छैन । नेपालीविरुद्ध साउनमै रेड नोटिस जारी भएको थियो । तर, इन्टरपोलले पनि समात्न सकेको छैन ।

नेकपा एमालेबाट उम्मेदवार बनेका नेपाली २०७९ वैशाखको चुनावबाट ढोरपाटनको मेयरमा दोस्रोपटक निर्वाचित भएका थिए ।

प्रकाशित मिति: मंगलबार, मंसिर ५, २०८० १९:१६