महेश बस्नेतको इगोमा दुर्गा प्रसाईंसँग भिड्‌ने सिंगो एमालेको तयारी

A+ A A-

संसदको दोस्रो ठूलो तथा प्रमुख प्रतिपक्षी दल नेकपा एमाले ७ मंसिरमा दुर्गा प्रसाईंको व्यक्तिगत आन्दोलनको प्रतिवादमा उत्रिँदैछ । प्रसाईंले व्यक्तिगत अभियान अन्तर्गत ७ मंसिरमा लघुवित्त र सहकारी पीडितलाई काठमाडौंमा उतार्दैछन् । त्यसको प्रतिवाद गर्न एमालेले युवा संघ र अनेरास्ववियुको ब्यानरमा कार्यकर्ता उतार्ने तयारी गरेकाे छ । लघुवित्त र सहकारी पीडितको मागलाई लिएर प्रसाईंले उचालेको आन्दोलन केही समययता प्रमुख राजनीतिक दलविरुद्ध केन्द्रित देखिन्छ । त्यसमा पूर्वराजा ज्ञानेन्द्र शाहको आडभरोसामा राजसंस्था पुनर्स्थापनाको एजेन्डा प्रसाईंले घुसाएका छन् । तर, प्रसाईंको व्यक्तिगत पहलमा हुन लागेको आन्दोलनको प्रतिकारमा एमाले किन उत्रिनु परेको हो भन्ने प्रश्च चाहिँ सार्वजनिक वृत्तमा उठिरहेको छ ।

प्रसाईंको पूर्वघोषित कार्यक्रम प्रभावित पार्ने गरी एमालेको युवा संघले ७ मंसिरमै कार्यक्रम गर्ने घोषणा गर्‍याे । त्यसलाई पार्टीले काँध थापेपछि ७ मंसिर खासमा दुर्गा प्रसाईं भर्सेस एमाले भएको छ । एमालेको यो निर्णयसँग उसको राजनीतिक चरित्रमाथि प्रश्न उठेकै छ, एमाले अध्यक्ष केपी ओलीको हतास मनोविज्ञान दर्शाउने परिघटना पनि बनेको छ । प्रमुख दल र तिनका शीर्ष नेताप्रति नागरिक तहमा आक्रोश, प्रतिशोध र निराशा रहेको छ । खासगरी सामाजिक सञ्जालमा प्रसाईंसहित रवि लामिछाने, बालेन शाहसहित विभिन्न भाइरल व्यक्तिहरूले पनि शीर्ष नेता र प्रमुख दलकै आलोचना गरिरहेका छन् । त्यसको प्रभाव भुइँ तहसम्म पुगेको छ । त्यस्तो बेलामा दल र नेतृत्वविरुद्ध भुइँ तहमा बिग्रिँदै गएको सम्बन्ध र प्रतिशोधको भावनालाई कम गर्ने प्रयासमा लाग्नुको सट्टा तिनै प्रसाईंको प्रतिवाद गर्न लाग्ने एमाले निर्णय भने प्रत्याेत्पादक हुने निश्चित देखिन्छ ।

एमालेका नेता र कार्यकर्तामात्र होइन, शुभेच्छुकसमेत एमालेको अहिलेको प्रसाईंविरोधी गतिविधिको चर्को आलोचनामात्र गरिरहेका छैनन्, खासमा आफ्नै वर्गविरुद्धको प्रतिवादको रूपमा व्याख्या गरिहेका छन् । प्रसाईंले सहकारी, लघुवित्त तथा बैंकको ऋणबाट पीडितको आन्दोलनको नेतृत्व गरेका छन्, त्यही समूह एमालेको भोट बैंक थियो, वैचारिक र सांगठिनक रूपमा । अहिले त्यही समूह आन्दोलित हुँदा एमाले प्रतिवादमा उत्रिएको छ । त्यसले एमालेको वैचारिक स्खलन पुष्टि गर्ने राजनीतिक विश्लेषकहरू बताउँछन् । राजनीतिशास्त्री कृष्ण पोखरेल एमाले एउटा व्यक्तिको अभियानको प्रतिवादमा उत्रिनुलाई अनौँठो राजनीतिक परिदृश्य बताउँछन् ।

शिलापत्रसँग कुराकानी गर्दै पोखरेलले भने, ‘एउटा व्यक्तिको अभियानलाई प्रतिवाद गर्न पटकपटक सरकार चलाएको स्थापित पार्टी सडकमा आउनु दुःखद परिदृश्य हो । यसले वास्तवमा प्रसाईंलाई स्थापित र प्रचार गराउने भूमिका निर्वाह गरिरहेको छ ।’ पोखरेलका भनाइमा प्रसाईंले उठाएको वित्तिय समस्यालाई नीतिगत सम्बोधनको प्रयास गर्नुपर्नेमा भुइँमान्छेविरुद्ध सडकमा उत्रिनु एमालेको गम्भीर कमजोरी हो ।

ओली र प्रसाईं सम्बन्धका उहापोहा

२ मंसिर २०७४ नेकपा एमालेका अध्यक्ष केपी ओली र माओवादी केन्द्रका अध्यक्ष पुष्पकमल दाहल प्रचण्डले झापामा रहेको बीएण्डसी अस्पतालको पाँच दिने पूर्वाञ्चल स्वास्थ्य महाेत्सव उद्घाटन गरे । उद्घाटन सम्बोधनमा दुवै अध्यक्षले कम्युनिस्ट सरकार आएपछि मेडिकल कलेजलाई सम्बन्धन दिने वचन दिएका थिए । सम्बोधनमा ओलीले देशलाई विकास हुन नदिने तत्वहरूले नै यस्ता मेडिकल कलेजहरूलाई संचालन गर्न नदिएको आरोप लगाएका थिए । ओलीले भनेका थिए ‘विद्यार्थी विदेश पठाएर कमिसन खाने एजेन्टहरूको धन्दा पनि हाम्रो सरकार आएपछि बन्द गर्छौं । ’खासमा यो बाहिर देखिएको घटना मात्रै थियो । तर, त्यसभन्दा पहिला नै एमाले अध्यक्ष ओली र माओवादी अध्यक्ष प्रचण्डको मिल्तीका सूत्रधारको रूपमा काम गरेका थिए प्रसाईंले । नेता मिलाउनेमात्र होइन पार्टी मिलाउन दुई नेतालाई निजी निवासमा भोज खुवाउने काम प्रसाईंले गरेका थिए । त्यही बेला ओली, प्रचण्ड र प्रसाईंले प्रसाईंको निजी निवासमा मार्सी चामलको खाना खाँदै गरेका फोटा सार्वजनिक भइसकेको थियो । त्यसपछि प्रसाईंको ओली र प्रचण्डसँग समदूरीमा सम्बन्ध थियो ।

२०७७ फागुनमा सर्वोच्च अदालतले तत्कालीन नेपाल कम्युनिस्ट पार्टी (नेकपा)लाई पहिलाकै अवस्थामा फर्काइदिएपछि चाहिँ प्रसाईंं एमालेतर्फ लागे र प्रचण्डको विरोधमा लागे । त्यतिबेला ओली प्रधानमन्त्री थिए । मेडिकल कलेजकाे सम्बन्धनको प्रयासमा रहेका प्रसाईं शक्तिको पिछा लाग्नु अस्वभाविक थिएन । त्यतिबेला एमालेलाई पनि प्रसाईंं हटकेक नै थिए । प्रचण्डमाथि प्रहार गर्ने पात्रका रूपमा एमालेले प्रसाईंलाई प्रयोग गरेको थियो । प्रसाईं पनि प्रचण्डमाथि प्रहार गदै ओलीको विश्वासपात्र बने । प्रसाईं अध्यक्ष ओलीलाई हजुरबुबा भन्दै आएका थिए । उनले ओली निकट भएपछि दसैँमा ओलीको हातबाट टीका लगाए । १८ फागुन २०७७ मा प्रधानमन्त्री हुँदा ओलीले प्रसाईंको लगानी रहेको बिर्तामोडमा रहेको ३०० शैयाको पूर्वाञ्चल क्यान्सर अस्पतालको उद्घाटन गरेका थिए ।

यसरी निरन्तर ओलीको नजिक रहेका प्रसाईंका लागि २८ जेष्ठ २०७८ शिक्षा, विज्ञान तथा प्रविधिमन्त्री कृष्णगोपाल श्रेष्ठले झापाको बीएण्डसी मेडिकल कलेजले कानुनी प्रक्रिया पूरा गरेर कलेज सञ्चालनका लागि सम्बन्धन दिन चिकित्सा शिक्षा आयोगलाई निर्देशन दिए । ओलीको अध्यक्षतामा बालुवाटारमा आयोगको सातौँ बैठक बसेको थियो । प्रधानमन्त्री ओलीले नेपाललाई शिक्षा र स्वास्थ्यको शैक्षिक हब बनाउने धारणा राख्दै देशमा आवश्यक जनशक्तिको लेखाजोखा गरी शिक्षा नीतिनियम बनाउन आयोगलाई निर्देशन दिए । चिकित्सा शिक्षा आयोगका उपाध्यक्ष डा. श्रीकृष्ण गिरी भने प्रधानमन्त्री तथा आयोगका अध्यक्ष ओलीको निर्देशन मान्न तयार भएनन् ।

चिकित्सा शिक्षा आयोगका उपाध्यक्ष गिरीलाई ३० जेठ २०७८ मा ओलीले बालुवाटारमा बोलाए । अनि २८ जेठको निर्णयलाई माइन्युटमा लेखेर हस्ताक्षर गर्न गिरीलाई दबाब दिए । तत्कालीन प्रधानमन्त्री ओली, शिक्षामन्त्री कृष्णगोपाल श्रेष्ठसहित गिरीलाई आयोगको बैठकको निर्णय कार्यान्वयन गर्न दबाब दिए । गिरीले आफूले ऐन नियम मान्नुपर्ने भन्दै कानुनविपरीत हुनेगरी निर्णयमा हस्ताक्षर गर्न नमिल्ने जवाफ दिएका थिए । गिरीकै कारण प्रसाईंको कलेजले सम्बन्धन पाउन सकेन । त्यति गर्दा प्रसाईं वास्तवमा ओलीसँग सन्तुष्ट नै थिए ।

त्यसको पुष्टि चाहिँ झापामा ओलीका लागि प्रसाईंले विशेष गाडीको व्यवस्था गरेकोले गर्छ । ओलीको दोस्रो संसद विघटन सर्वोच्च अदालतले उल्टाइदिएपछि गृहजिल्ला झापा गएका ओलीलाई लिन भद्रपुर एरपोर्टमा निकै महँगो गाडीसहित प्रसाईं स्वागतका लागि पुगेका थिए । एयरपोर्टमा ओलीलाई स्वागत गर्न पुगेका नेताकार्यकर्ताको वास्ता नगरी ओली प्रसाईंंकै गाडी चढेर हिँडेका थिए । त्यो समयमा झापाका विभिन्न स्थानका कार्यक्रममा ओलीसँगै प्रसाईं दिनदिनै हिँडेपछि सम्बन्धका बारेमा चर्चा झन बढी भएको थियो । अझ प्रसाईंंले त्यो गाडी ‘हजुरबा’लाई उपहार दिएको भन्न भ्याएका थिए ।

केन्द्रीय सदस्यको रोचक किस्सा

एमालेको केन्द्रीय सदस्य बनेका प्रसाईंसँग रोचक किस्सा पनि जोडिएका छन् । जस्तो १५ असोज २०७८ मा ललितपुरको गोदावरीमा नेकपा एमालेको विधान महाधिवेशन भएको थियो । विधान महाधिवेशनमा प्रसाईं एमालेको केन्द्रीय सदस्यको हैसियतमा उपस्थित भए । उनले पार्टी केन्द्रीय सदस्यको कार्ड भिरेर विधान महाधिवेशन हलमा बसेका थिए । जबकि एमालेका धेरै नेतालाई नै उनी केन्द्रीय सदस्य भएको पत्तो थिएन । एमालेका नेता कार्यकर्तालाई आश्चर्य लागे पनि शीर्ष नेतृत्वले कुनै चासो राखेन । उनी कार्यकर्ता हुन् कि केन्द्रीय सदस्य हुन् भनेर पनि चर्चा भएको थियो ।

१५ देखि १७ असोजसम्मको विधान महाधिवेशनमा केन्द्रीय सदस्यको हैसियतमा भाग लिएका प्रसाईंलाई अध्यक्ष ओलीले ७ कात्तिकमा झापाको विर्तामोडमा भव्य समारोह गरेर एमालेमा प्रवेश गराए । जबकि २१ दिन पहिला एमाले केन्द्रीय सदस्यको हैसियतमा विधान सम्मेलनमा भाग लिएका थिए । वास्तवमा यी एमाले नेताहरू नै चकित पर्ने घटना थिए ।

१० मंसिर २०७८ बाट चितवनमा भएको एमालेको १०औँ महाधिवेशनमा प्रसाईं झापाबाट प्रतिनिधि भएर आएका थिए । महाधिवेशनमा एमालेका पुराना नेताहरूलाई छायामा पार्दै प्रसाईंको चर्चा धेरै भयो । उनीसँग सेल्फी खिच्न एमालेका नेता कार्यकर्तामा क्रेज नै थियो । ओली बसेको सौराहास्थित होटल पार्क सफारीमा आफ्ना लागि समेत रुम बुक गराइदिन दुर्गाले निकै प्रयास गरेका थिए । होटलको बार्दलीमा उभिएका केपी बालाई दुर्गाले भुइँबाटै नमस्ते गरेर केन्द्रीय सदस्य लड्दैछु, आशीर्वाद दिनुपर्‍यो हजुरबा भनेका थिए । २६ मंसिर २०७८ मा प्रसाईं एमालेको केन्द्रीय सदस्यमा मनोनीत भए । प्रसाईं केन्द्रीय सदस्यमा मनोनीत हुँदा सिन्धुपाल्चोकका सुवास कर्माचार्य, कञ्चनपुर डा. दीपकप्रकाश भट्ट , सुरेन्द्र मानन्धर दैलेखका डा. योगेन्द्र शाही , घनश्याम खतिवडा, झापा आन्दोलनदेखिकै आफ्ना सहयोद्धा नरेश खरेललाई केन्द्रीय सदस्य बनाएका थिएनन् ।

२९ मंसिर २०७८ मा मनोनीत ४४ केन्द्रीय सदस्यसँगै शपथ लिएपछि प्रसाईंंले पार्टीमा एक खुड्किलो माथि टेक्न सफल भइएको भन्दै खुसी व्यक्त गरेका थिए । उनी केन्द्रीय सदस्यमा मनोनीत भएसँगै एमालेको उद्योग, वाणिज्य तथा आपूर्ति विभाग उपप्रमुखको जिम्मेवारी दिएको थियो ।

एमाले नेता विशाल भट्टराईको भनाइमा पार्टी प्रवेश गरेपछि यतिको मानिसलाई जिम्मेवारी दिनुपर्छ भनेर पार्टीले जिम्मेवारी दिएको तर उनले त्यो जिम्मेवारी इमानदारीसाथ निर्वाह गरेनन् । उनले भने, ‘एक कालखण्डमा जिम्मेवारी दिइयो । उनको ऋण धेरै रहेछ । त्यो स्वार्थ हामीले पूरा गर्ने कुरा भएन । त्यो पूरा नहुने देखेपछि कता कता हिँडे अहिले त राजा ल्याउँछु भन्दै हिँडेका छन् । उनको मेडिकल कलेजलाई सम्बन्धन नदिनु गलत हो । तर उनी कता कता पुगे ।’

किन भड्किए ओलीसँग प्रसाई

एमाले अध्यक्ष केपी ओलीसँगको छोटो संगतमै प्रसाईं भड्किनुको खास कारण प्रसाईंका अपेक्षित आकांक्षाको संबोधन नहुनु नै हो । त्यसमा मेडिकल कलेजले सम्बन्धन पाउन नसक्नु र २०७९ म‌ंसिरको चुनावमा प्रसाईंले झापामा एमालेबाट टिकट नपाउनु नै प्रमुख कारण देखिएको छ । उनी झापा ३ बाट चुनाव उठ्न चाहन्थे । त्यसै अनुसार राजनीतिक लगानी गर्न थालेका थिए । तर अध्यक्ष ओलीले प्रतिनिधसभा त के प्रदेशसभाको टिकटकसमेत दिएनन् । त्यही दिनबाट रनाहामा परेका प्रसाईं ओलीमाथि जाइलाग्न थाले । टिकट नपाएका प्रसाईं एमालेको चुनावी अभियानमा सक्रिय भएनन् भलै एमालेको चर्को विरोध गरेर मत प्रभावित भने पारिदिएनन् ।

सरकार गठनका प्रक्रिया सुरु हुन थालेपछि एमाले र ओलीविरुद्ध विषवमन गर्न थालेका प्रसाईं अहिले एमालेसँग वारपारको लडाइँमा जस्तो देखिनेगरी आक्रामक भएका छन् । ओलीमाथि गम्भीर आर्थिक अनियमितताका आरोप लगाउँदै प्रसाईं छुद्र र गैरराजनीतिक अभिव्यक्ति र चरित्र हत्यामा लागेका छन् । राष्ट्रिय स्वतन्त्र पार्टीका सांसद ढाकाकुमार श्रेष्ठले मन्त्री बन्न आवश्यक रकम जुटाउन प्रसाईंसँग आर्थिक सहयोग मागेको अडियो सार्वजनिक गरेर सांसद पद नै खाइदिएपछि एमाले नेता महेश बस्नेतसँग टसल पर्न थाल्यो । एमाले अध्यक्ष ओलीविरुद्ध चर्को आक्षेपमा प्रसाईं लागेपछि बस्नेत ओलीसँग बिग्रेको सम्बन्ध सुधारका लागि प्रतिवादमा उत्रिन थाले । सार्वजनिक अभिव्यक्तिलेमात्रै नपुगेर बस्नेतको समूह प्रसाईंलाई मोसो दल्न पुग्यो ।

२२ असोज २०८० सालमा एमाले निकट युवा संघको अगुवाइमा प्रसाईंंलाई यलो प्यागोडा होटलमा दलको मोसोको प्रतिवाद प्रसाईंको समूहले झापामा लगतै बस्नेत उपस्थित कार्यक्रममा पोख्याे । २५ असोजमा झापाको अर्जुनधारा नगरपालिका आयोजित युवासंघको कार्यक्रमा प्रसाईंं समर्थकले एमालेका २५ भन्दा बढी गाडी तोडफोड गरिदिए । काठमाडौंको रिस प्रसाईंको समूहले ३ दिनपछि झापामा फेरे । एमालेविरुद्ध देशव्यापी बदनामीको अभियान चलाएका प्रसाईंसँग त्यसै पनि एमाले नेता र कार्यकर्ता आक्रोशित थिए । २२ असोजको घटना खासमा प्रसाईंलाई तर्साउने युवा संघको प्रयास थियो तर प्रसाईं थप आक्रामक भए ।

झापामा बस्नेतमाथि प्रसाईंको समूह आक्रामक भएपछि थप बिग्रिन थालेको प्रसाईं र बस्नेत सम्बन्ध भिडियो काण्डले थप चर्कियो । बस्नेतले एक जना महिलासँग एउटै बेडमा बसेर टिकटक बनाउँदै गरेको भिडियो बाहिरियो । यो भिडियो प्रसाईंकै समूहले सार्वजनिक गरेको बस्नेत समूहको आरोप थियो । यही मैकामा प्रसाईं समूहले भाइरल बनाइदिए । त्यसले प्रसाईं र बस्नेतको दुश्मनी इगोमा पुगेको देखिन्छ । एकातिर प्रसाईंले झापामा बिगारेको एमालेको माहोल अर्कातिर तुच्छ शब्दसँग विषवमन गरेपछि ओली पनि आक्रोशित गत शनिबार एमालेको पत्रकार सम्मेलनले पनि एमाले–प्रसाईं सम्बन्धकाे टकराव देखाउँछ । व्यक्तिगत दुश्मनीका कारण प्रसाईंको अभियानविरुद्ध लागेका बस्नेतको प्रतिवाद प्रयासलाई एमालेले त्यसदिन स्वामित्व लिइदियो र ७ मंसिरमा प्रसाईंको आन्दोलनको प्रतिवाद गर्न युवा संघ र अनेरास्ववियुको ब्यानरमा एमाले सडकमा निस्किँदैछ । अर्थात् एक जना दुर्गा प्रसाईंविरुद्ध सिंगो एमाले प्रतिवादमा उत्रिएको छ ।

प्रसाईंको भड्काउपूर्ण, संविधानको मर्मविपरीत र गणतन्त्रकै खिलापमा दिएको अभिव्यक्तिविरुद्ध आफूहरू सडकमा उत्रिएको एमालेको दाबी छ । प्रसाईंले आफूहरूले लडेर ल्याएको व्यवस्थाका विरुद्ध र आफ्नो पार्टी अध्यक्षका विरुद्ध जथाभावी आरोप लगाएकाले प्रतिवाद गर्नु परेको एमाले नेता विशाल भट्टराई बताउँछन् । शिलापत्रसँग उनले भने, ‘उनको अतिवादी सोच हो । उनले नेताहरूका बारेमा व्यक्तिगत गालीगलौज गर्न थाले । पार्टी अध्यक्षले कम्बोडियामा लगानी गरेको भन्दै आधारहीन हल्ला फैलाए । आधारहीन कुरा बोल्दा उनीमाथि कानुन लाग्नुपर्ने हो तर लागेको छैन । लोकतन्त्रमा आफ्ना कुरा शान्तिपूर्वक बोल्न पाउँछन् तर व्यक्तिगत रूपमा गाली गर्न पाइँदैन ।’

टिकट नपाएर ओलीसँग रुष्ट भएका प्रसाईंं राजा फर्काउने महाअभियानमा लागेका छन् । उनले १ फागुनमा महाअभियानको घोषणा गर्दा पूर्वराजा ज्ञानेन्द्र शाहको परिवार उपस्थित गराएका थिए । आफूले राजसंस्था र राष्ट्रवादी आन्दोलनको सुरुवात गरेको प्रसाईंंले घोषणा गरे । एमाले ग्रासरुट अभियानमा लाग्ने अनि प्रसाईंं महाअभियान भनेर राजा फर्काउने अभियानतिर लागे । एमालेको अभियान नै प्रभावित हुने गरी महाअभियान सुरु गरेपछि एमालेले कारबाही तयारी गर्दै थियो । तर कारवाही गर्नुअघि नै प्रसाईंंले एमाले त्यागेको घोषणा गरेका थिए ।

प्रसाईंंले ‘नागरिक बचाउ महाअभियान’ ब्यानरमा १ फागुन ०७९ मा राष्ट्र, राष्ट्रियता, धर्म संस्कृति र नागरिक बचाउन भन्दै अभियान सुरु गरेका थिए । झापाको काँकडभिट्टास्थित मेची नदीबाट प्रसाईंंले अभियान सुरु गर्दा पूर्वराजा ज्ञानेन्द्र शाह र उनका छोरा पूर्वयुवराज पारस शाह पनि मञ्चमा थिए । पूर्वराजा शाहले परेवा उडाएर कार्यक्रम उद्घाटन गरे । तर शाहले उक्त कार्यक्रमलाई सम्बोधन गरेनन् ।

प्रसाईंंले यो अभियानमा सहभागी हुन पूर्वराजादेखि प्रधानमन्त्री पुष्पकमल दाहाल ‘प्रचण्ड’ तथा विभिन्न दलका प्रमुखहरूलाई गरी ११ जनालाई आह्वान गरेका थिए । तीमध्ये प्रधानमन्त्री तथा दलका नेता भने कार्यक्रममा गएका थिएनन् । प्रसाईंंले आफूले सञ्चालन गरेको यो अभियानलाई ‘राजावादी वा गणतन्त्र विरोधी अभियानका रूपमा नसोच्नुहोला’ भनेर सूचना जारी गरेका थिए । यो अभियानपछि उनले बैंक तथा वित्तीय संस्थाहरूको ब्याजदर ६ प्रतिशतभन्दा कम हुनुपर्ने भन्दै अभियानको सुरुवात गरेका थिए । त्यही अभियान अहिले देशव्यापी भएको छ र त्यसको आडमा प्रसाईं बलियो बन्दै गएका छन् र एमालेसहित दलहरू प्रसाईंसँग डराउने अवस्थामा पुगेका छन् ।

गत फागुनबाट एमालेविरुद्ध लागेका प्रसाईंले एक महिनाअघि एमाले अध्यक्ष ओलीले कम्बोडियाको टेलिकममा लगानी गरेको एक पत्रकार सम्मेलनमा आरोप लगाए । यो विषयमा विभिन्न भारतीय सञ्चारमाध्यमले समेत समाचार छापेको बताउँदै प्रसाईंंले त्यसको प्रमाण आफूसँग भएको दाबी गरे । प्रसाईंको आरोपपछि ओली पनि थप आक्रामक भए । झापामा भएका धेरै कार्यक्रममा ओलीले प्रसाईंको कडा शब्दमा आलोचना गरे । ओलीले विभिन्न कार्यक्रममा प्रसाईंंको भनाइलाई खण्डन गरे ।

प्रकाशित मिति: बुधबार, मंसिर ६, २०८० ०८:१०