जाजरकोट र रुकुम पश्चिममा विद्यार्थीलाई खुला चौरमै राखेर पढाउने तयारी

A+ A A-

तिहार तथा छठ पर्वका लागि २५ कात्तिकदेखि बन्द रहेका देशभरका सामुदायिक विद्यालयसहित भूकम्प प्रभावित क्षेत्र जाजरकोट र रुकुम पश्चिममा पनि आज (मंगलबार) देखि पठनपाठन सञ्चालन हुँदै छ । १७ कात्तिकको राति जाजरकोटको रामीडाँडा केन्द्रविन्दु भएर गएको ६ दशमलव ४ म्याग्निच्युडको भूकम्पबाट यी दुई जिल्लाका अधिकांश विद्यालयमा पूर्णदेखि आंशिक क्षति भएपछि पठनपाठमा समस्या देखिएको छ । भूकम्पले विद्यालय भवनमा क्षति पुर्‍याएपछि खुला चाैरमा पढाउने तयारी गरिएको छ ।

याे पनि..

नेपालमा गएका डरलाग्दा भूकम्प, राजा पनि मारिएका थिए

शनिबार सम्पन्न जिल्ला विपद् व्यवस्थापन समिति जाजरकोटको बैठकले भूकम्पबाट आंशिक क्षति भएका विद्यालयमा सम्बन्धित स्थानीय पालिका र विद्यालय व्यवस्थापन समितिसँगको समन्वयमा पठनपाठन सुरु गर्ने निर्णय गरेको छ ।

भूकम्पले बढी क्षति पुर्‍याएको जाजरकोटको भेरी नगरपालिका र नलगाड नगरपालिकाले जोखिममा रहेका विद्यालयमा सुरक्षित स्थान छनोट गरी कक्षा संचालन गर्ने निर्णय गरेका छन् ।

भेरी नगरपालिकाका प्रमुख चन्द्रप्रकाश घर्तीले विद्यालयहरूलाई पालिकासँगको समन्वयमा पठनपाठन चलाउन भनिएको बताए । उनका अनुसार, भेरी नगरपालिकामा ५६ वटा विद्यालयमा १२ हजार ७ सय विद्यार्थी अध्ययनरत छन् ।

यस्तै, नलगाड नगरपालिकाका शिक्षा, युवा तथा खेलकुद शाखा प्रमुख बलवीर विकले सोमबारदेखि नै सबै विद्यालयमा पठन पाठन सुरु गर्न लागेको बताए । उनका अनुसार, अति जोखिम भएका विद्यालयमा प्रशासन खोलेर सिकाइ केन्द्र स्थापना गर्ने काम सम्पन्न भएपश्चात् मात्र पठनपाठन सुरु गर्ने योजना छ ।

एक साताभित्र सम्पूर्ण विद्यालयमा टेन्ट र त्रिपालबाट भए पनि पठनपाठन सञ्चालन हुने उनले जानकारी दिए । नलगाडमा ७१ विद्यालय रहेकोमा ५४ वटामा क्षति पुगेको छ ।

रुकुमपश्चिमको आठबिसकोट नगरपालिकाले अस्थायी टहराबाट पठनपाठन सुरु गर्ने जनाएको छ । शिक्षा, युवा तथा खेलकुद शाखाका प्रमुख इन्द्रबहादुर विष्टका अनुसार, विभिन्न दातृ निकायको सहयोगमा निर्माण गरिएका अस्थायी टहराबाट नगर क्षेत्रमा रहेका सम्पूर्ण विद्यालयमा पठपाठन सुरु गर्न लागिएको बताए । आठबिसमा ६४ वटा विद्यालय रहेकोमा ५२ वटा विद्यालयमा पूर्णदेखि आंशिक क्षति पुग्दा २ सय ५२ कक्षा कोठा प्रभावित भएका छन् ।

यस्तै, भूकम्पका कारण जाजरकोटमा ७५ हजार ८ सय ५३ विद्यार्थीमध्ये २२ हजार ७ सय ५९ र रुकुम पश्चिममा ५७ हजार ८ सय ३४ मध्ये १७ हजार ३ सय ५१ जना गरी झण्डै ४० हजार विद्यार्थी प्रभावित भएको जनाइएको छ । जाजरकोटमा ४ सय २३ र रुकुम पश्चिममा ३ सय १३ वटा विद्यालय छन् ।

यीमध्ये २ सय ८ विद्यालयमा भूकम्पका कारण पूर्ण क्षति पुग्दा ४ सय १८ विद्यालय भवनमा आंशिक क्षति पुगेको सामाजिक विकास मन्त्रालयले जनाएको छ ।

यस्तै, भूकम्पका कारण ६७ विद्यार्थीको मृत्यु र ७१ जना विद्यार्थी घाइते भएका थिए । जाजरकोटमा ३२ विद्यार्थीको मृत्यु भएको थियो भने ३५ जना विद्यार्थी घाइते हुँदा रुकुम पश्चिममा ३५ विद्यार्थीको मृत्यु र ३६ विद्यार्थी घाइते भएका थिए । भूकम्पका कारण एक जना शिक्षकको मृत्यु, दुई जना घाइते र एक जना कार्यालय सहयोगीको मृत्यु भएको सामाजिक विकास मन्त्रालयको तथ्यांकमा उल्लेख छ ।

प्रकाशित मिति: सोमबार, मंसिर ४, २०८० ०९:०३