खेलमार्फत पोखरामा प्रभाव जमाउँदै चीन, पाँच महिनामै अर्को ठूलो प्रतियोगिताको तयारी

खेलमार्फत पोखरामा प्रभाव जमाउँदै चीन, पाँच महिनामै अर्को ठूलो प्रतियोगिताको तयारी

A+ A A-

चीनप्रति नरम पोखरेली, पोखरा महानगरपालिका र स्थानीय केही संघसंस्थालाई साथमा लिएर चीनले पोखरामा एउटा भव्य खेल प्रतियोगिता आयोजनाको तयारी गरेको छ । नेपालस्थित चिनियाँ दूतावासले आगामी ९ मंसिर (२५ नोभेम्बर)मा पोखरामा अन्तर्राष्ट्रिय माउन्टेन क्रस–क्रन्ट्री प्रतियोगिता गर्दैछ ।

यो प्रतियोगिताका लागि पोखरा महानगरपालिका र नेपाल पर्यटन बोर्ड पनि आयोजक छन् । यसको मुख्य आयोजक नेपालस्थित चिनियाँ दूतावास हो । रोचक त, प्रतियोगिताका खेलाडी विमान नै चार्टर्ड गरेर चीनबाट ७ मंसिरमा पोखरा ओर्लंदै छन् । हिमालय एयरलाइन्सले चीनका ७४ खेलाडीसहित १०४ जनालाई पोखरा ल्याउने छ । यो प्रतियोगिताको आयोजनादेखि प्राविधिक जिम्मेवारीमा पोखराका संघसंस्थालाई राखिए पनि चीनबाटै छुट्टै टोली आउँदै छ । यही प्रतियोगिताका लागि १७ जना स्वास्थ्यकर्मी चीनबाटै आउँदै छन् । दूतावासले चिनियाँ समाचार एजेन्सी, टेलिभिजन पनि पोखरा ल्याउँदै छ ।

यो प्रतियोगिताको सहआयोजक चीनकै यूनान माउन्टेनियरिङ एण्ड आउटडोर स्पोर्टस् एसोसिएसन र होटल संघ पोखरा छन् । सहयोगीमा १३ संघसंस्था रहेकोमा ९ वटा त चीनकै छन् । चीनका प्रान्तीय सरकार, नेपालस्थित चिनियाँ दूतावासनिकट पोखराका मिडिया उद्यमी विश्वशंकर पालिखे संयोजक रहने गरी यो कार्यक्रम हुँदैछ । चिनियाँ इनर्जी ड्रिन्क ‘वार हर्स’ यो कार्यक्रमको मुख्य प्रायोजक हो ।

चीनले पोखरामा पाँच महिनाको अन्तरालमा ठूलो प्रतियोगिता गर्न लागेको दोस्रोपटक हो । यसअघि चीनले पोखरा महानगरपालिका, नेपाल पर्यटन बोर्डसँग मिलेर गत ८ असारमा ‘ड्रागन बोट रेस’ फेस्टिबल गरेको थियो । चीनले प्रतियोगिता गर्न लागेको थाहा पाएपछि भारतले पोखरा रंगशालामा त्यही दिन ‘योग शिविर’ आयोजना गरेको थियो ।

यो दुई कार्यक्रम हुँदा पोखराको मुख्य बजार क्षेत्रका एकतिरका बिजुली पोलमा बोट रेस र अर्कोतर्फको पोलमा योग शिविरको ब्यानर टाँसिएको थियो । यसले चीन र भारतले पोखरामा आफ्नो प्रभाव देखाउन खोजिरहेको संकेत मिल्थ्यो । यसपटक चीनले प्रतियोगिताको घोषणा गर्दासम्म भारतको तयारी केही देखिएको छैन । कार्यक्रम संयोजक पालिखे भूराजनीतिभन्दा पनि पर्यटन प्रवर्द्धनका लागि प्रतियोगिता गरिएको बताउँछन् । उनले अन्य देशले पोखरामा कार्यक्रम गर्नु राम्रो भएको बताए ।

२० लाख पुरस्कार, ८० लाख खर्च

यो प्रतियोगिता टिम, व्यक्तिगत, खुल्ला र विद्यार्थीतर्फ गरी ७ विधामा हुँदैछ । यी चार विधामा पुरस्कारमा मात्र २० लाख रुपैयाँ खर्च हुँदैछ । सबै विधाको रूटको सुरुवाती विन्दु फेवाताल किनार बाराहीघाट छ ।

टिम विधामा पहिलाे हुनेले ३ लाख ६० हजार रुपैयाँ, दाेस्राे हुनेले २ लाख ८८ हजार रुपैयाँ, तेस्राे हुनेले २ लाख १६ हजार रुपैयाँ, चौँथो हुनेले १ लाख ४४ हजार रुपैयाँ र पाँचौँ हुनेले ९० हजार रुपैयाँ पुरस्कार पाउने छन् । ४० किलोमिटरको यो विधामा नेपाल र चीनका १०/१० गरेर २० वटा टिम सहभागी हुने कार्यक्रम संयोजक पालिखेले पोखरामा शनिबार आयोजित पत्रकार सम्मेलनमा जानकारी दिए ।

च्यालेन्ज व्यक्तिगत विधामा पहिलाे हुनेले १ लाख ४४ हजार रुपैयाँ, दाेस्राे हुनेले १ लाख ८ हजार रुपैयाँ, तेस्राे हुनेले ५४ हजार रुपैयाँ, चौँथोदेखि सातौँसम्म हुनेले १८/१८ हजार र आठौँ, नवौँ र दसौँ हुनेले ९/९ हजार रुपैयाँ पुरस्कार पाउने छन् । ३८ किलोमिटर दूरीको यो विधामा १ सय ४० जना सहभागी हुँदै छन् । टिम र व्यक्तिगत खेलाडीहरू पोखराको रामदी, मट्टिखान, उल्लेरी, पुम्दीलगायत ठाउँ परिक्रमा गरेर फेवातालमा बोटिङ गर्दै बाराहीघाटमा आउने छन् ।

विद्यार्थीतर्फ छात्र–छात्रालाई निकै लोभलाग्दो रकम पुरस्कारमा दिइँदै छ जुन स्थानीय स्तरमा हुने प्रतियोगिताभन्दा दोब्बरजस्तै छ । यो विधामा पहिलाे हुने छात्र/छात्राले २५/२५ हजार रुपैयाँ, दाेस्राे हुनेले २०/२० हजार रुपैयाँ, तेस्राे हुनेले १५/१५ हजार रुपैयाँ, चौंथो हुनेले १०÷१० हजार रुपैयाँ र पाँचौ हुनेले ५/५ हजार रुपैयाँ पुरस्कार पाउने छन् । यो विधामा २ सय छात्र र एक सय छात्रालाई सहभागी गराउने तयारी छ । यसको रूट बाराही घाट, सहिदचोक, बिरौटा हुँदै बाराही घाट नै आउने गरी तोकिएको छ ।

खुल्ला दौड विधामा पुरस्कार राखिएको छैन । यसमा कति खेलाडी सहभागी हुन्छन् निश्चित छैन । यो प्रतियोगिताका आयोजक, सहआयोजकले कति आर्थिक भार व्यहोर्ने भन्ने निश्चित भइसकेको छैन । प्रतियोगिता सफल पार्ने र खर्च शीर्षकअनुसार बाँडफाँट गर्ने तयारी रहेको संयोजक पालिखेले बताए । उनकाअनुसार करिब ८० लाख रुपैयाँ खर्च हुने अनुमान छ ।

प्रकाशित मिति: आइतबार, मंसिर ३, २०८० ०७:३६