दोहोरो करको मारमा सुर्खेतका अटो रिक्सा व्यवसायी

A+ A A-

सुर्खेतको वीरेन्द्रनगर नगरपालिकामा अटो रिक्सा व्यवसाय गर्ने लक्ष्मण मोक्तानले भेरी अञ्चल यातायात व्यवस्था कार्यालय नेपालगन्जमा नवीकरण कर र रुट पर्मिट करका रूपमा ६ हजार ३ सय रुयैयाँ तिरे । उनले यता वीरेन्द्रनगर नगरपालिकालाई पनि सवारी दस्तुरका नाममा ५ हजार र रुट पर्मिटका नाममा ४ सय रुपैयाँ थप शुल्क तिरे ।

वीरेन्द्रनगर नगरपालिकामा ५ सयभन्दा बढी अटो रिक्सा व्यवसायी रहेका छन् । उनीहरूबाट नगरपालिका र यातायात व्यवस्था कार्यालयले दोहोरो कर लिने गरेका छन् । यातायात व्यवस्था कार्यालयले दर्ता र नवीकरणका नाममा लिने गरेको छ भने नगरपालिकाले सवारी कर र सिफारिस दस्तुरका नाममा कर लिने गरेको छ । यसरी यहाँका रिक्सा व्यवसायीहरूले यातायात व्यवस्था कार्यालय र नगरपालिकालाई गरेर दोहोर कर तिर्नुपर्ने बाध्यता छ ।

अटो रिक्सा व्यवसायबाट स्वरोजगार बन्न चाहनेका लागि दोहोरो कर हुँदा आफूहरूलाई समस्या भएको अटो रिक्सा सञ्चालक वीरबहादुर बिष्टले बताए । ‘हामी स्वरोजगार बन्नका लागि अटो रिक्सा खरिद गरेर व्यवसाय सञ्चालन गरेका छौं, उनले भने, ‘तर, नगरपालिका र यातायात व्यवस्था कार्यालयमा दोहोरो कर तिर्नुपर्दा भने हामीलाई समस्या भएको छ ।’

दोहोरो करका कारणले आफूहरूले एउटा रिक्साको वार्षिक २० हजारसम्म कर तिर्नुपर्ने बाध्यता रहेको अटो रिक्सा व्यवसायी रामबहादुर बिकले बताए । ‘नगरपालिका र यातायात व्यवस्था कार्यालयलाई कर बुझाउनुपर्छ । यातायात व्यवस्था कार्यालयले पनि रुट पर्मिटका नाममा कर लैजाने गरेको छ ।’ उनले भने, ‘अहिले हामी व्यवसायीहरूलाई करको दोहोरो मार परेको छ ।’

यातायात सेवा कार्यालय सुर्खेतका अनुसार स्थानीय तहले नै साना सवारीसाधनको कर लिने गरेकाले अहिले अटो रिक्साको दर्ता र नवीकरण कर लिने गरेको हो ।

‘अहिले स्थानीय तहले नै सवारी सेवा कर र रुट पर्मिट कर लैजाने गरेको छ । हामीले चाहिँ दर्ता र नवीकरणको कर उठाउने गरेका छौं,’ प्रमुख सुनील लिम्बूले बताए, ‘सवारी सेवा कर स्थानीय तहले नै उठाउने गरेको छ ।’

नगरपालिकाको कार्यपालिकाले नगरपालिकाभित्र चल्ने अटो रिक्साबाट सवारी कर लैजाने नीति बनाएको र त्यहीअनुसार सवारी कर लिने गरेको वीरेन्द्रनगर नगरपालिकाका सूचना अधिकारी दिपेन सुवेदीले बताए । साना सवारीसाधनको कर उठाउनका लागि संघीय सरकारले स्थानीय तहलाई नै जिम्मा दिएका कारणले उठाइएको सूचना अधिकारी सुवेदीको भनाइ छ ।