एमालेको मध्य पहाडी लोकमार्ग अभियान के हो ?

A+ A A-

नेकपा एमालेले यही १४ मंसिरमा मध्य पहाडी लोकमार्गकाे अन्तिम विन्दु सुदूरपरिश्चम प्रदेशको बैतडी जिल्लाको झुलाघाटदेखि लाेकमार्गकाे जिराे प्वाइन्ट कोशी प्रदेशको पाँचथर जिल्लाको चिवाभञ्ज्याङसम्म ‘झुलाघाट–चिवाभञ्ज्याङः समृद्धिका लागि सङ्कल्प यात्रा’ अभियान सुरु गर्दै छ ।

यो अभियानमा एमालेले १८७९ किलोमिटर लामो यात्रा तय गर्ने छ । एमालेले अभियान मध्य पहाडी लोकमार्गले छाेएका जिल्लाहरूमा विभिन्न कार्यक्रम गर्ने छ । जसका लागि पूर्वबाट उपमहासचिव प्रदीप ज्ञवाली र पश्चिमबाट उपमहासचिव विष्णु रिमालको टिमले अवलोकन गरेका छन् । तिहारभन्दा पहिला दुवै टोलीले मध्य पहाडी लोकमार्गको अवलोकन गरेर पार्टीलाई जानकारी दिएका छन् ।

एमालेले यो अभियानलाई जनतासँग जोड्ने अभियानको रुपमा अर्थ्याएको छ । एमालेले मध्य पहाड देशकाे मूख्य भूभाग भएकाे भन्दै यसका विभिन्न आयम र विकासबारे याे अभियानले बहस ल्याउने बताएकाे छ । उपमहासचिव ज्ञवालीले भने, 'नेपाल हिमाल पहाड र तराई छ । सबैभन्दा बढी भूभाग ओगट्ने पहाड हो । यहाँको विकासको सन्दर्भमा १० वटा आधुनिक शहर निमार्ण गर्ने, पहाडी क्षेत्रमा विकास र पूर्वाधार प्रर्याप्त पुगेका छन् । तर विकास पहाड पुग्दा नागरिक तराई झर्ने र विदेश पुग्ने लहर चलिरहेको छ । पहाडमा विकासका चुनौती, बसाइसराइलाई कसरी रोक्न सकिन्छ । त्यसलाई समृद्धिको आधार बनाउन सकिन्छ । पहाड समृद्ध नहुँदासम्म देशमा विकास पूरा हुँदैन ।'

उनले अगाडि भने, ‘नेपाल मुख्यतया पहाडी मुलुक हो । यसको विकास पहिलो आवश्यकता हो । यहाँ विकास भएको छ । तर बसाइसराइ जारी छ । यहाँ रोजगारीको व्यवस्था हुन सकेको छैन । समाजिक सद्भाव र राष्ट्रिय एकता खलबलाउने प्रकृतिका काम भएका देखिन्छन् । यसलाई रोक्नुपर्छ । लोकतन्त्रप्रति वितृष्णा फैलाउने प्रवृत्ति हावी हुन खोजेको छ । केही भएन भन्ने भाष्य निमार्ण गर्न खोजिँदै छ । यो गलत हो । यही किसिमका सन्देश दिन अभियान सुरु गर्न थालिएको हो ।’

समाज अझै सद्भावमा चलिरहेको भन्दै उनले यी सबै मान्यतालाई अझ बलियो बनाउने अभियानको मूख्य उद्देश्य भएको बताए ।

उनले भने, 'कम्युनिस्ट पार्टी स्थापनाको ७५ वर्ष पुगेको छ । यो ७५ वर्षमा के काम भए । त्यो सम्झने छौँ । यो अभियानमा मधेशलाई पहाड उकाल्ने र हिमाललाई पहाड झार्ने अभियान रहेको छ ।'

उनले अगाडि भने , ‘निराशको खेती बढिरहेको छ । समस्या छन् तर पनि देशमा राम्रा काम भइरहेका छन् । राम्रा कामको बारेमा जानकारी दिने, जनतासगँ सम्वाद गर्ने । अझ देशलाई राम्रो बनाउन सकिन्छ, राम्रो बनाउने शक्ति हामी हौँ भनेर सन्देश दिने गरी अभियान चल्ने छ ।’

गत वर्ष सरकारको दुई महिने यात्रामा विराम लागेपछि एमालेले मिसन ग्रास रुट अभियान चलाएको थियो । उक्त अभियान दुई महिना चलाएको थियो । उक्त अभियानमा शीर्ष नेताहरूलाई फरक फरक भूगोलमा खटाएको थियो । पार्टी सदस्यता नवीकरण गर्नेदेखि नयाँ पार्टी सदस्य बनउने, स्थानीय कमिटीमा भएका समस्या सुन्ने समाधान गर्ने गरी अभियान संचालन गरेको थियो । जुन अभियान सोचे जस्तो सफल पनि नभएको र असफल पनि नभएको एमालेले निष्कर्ष निकालेको थियो ।

अहिले मध्य पहाडी लोकमार्गमा करिब १९–२० दिनको अभियान संचालन गर्ने तयारी अन्ति चरणमा पुगेको छ । यो अभियानमा एमालेले आमसभामा मात्र गर्ने छैन, स्थानीयसँग अन्तर्क्रिया, छलफल गर्ने छ । विद्यार्थीसँग, किसानहरूसँग बहस छलफल गर्ने ज्ञवालीले बताए ।

उनले भने, ‘यो १९–२० दिनमा हामीहरू आम सभा मात्र गर्ने छैनौं । किसानसँग उनका समस्याका बारेमा, विद्यार्थीसँग उनका समस्याका बारेमा बहस छलफल र अन्तर्क्रिया गर्ने छौँ । पहाडका समस्याका बारेमा अभियान बढी केन्द्रित हुने छ ।’

यो अभियान एमालेको पूर्व-पश्चिम पुग्ने दोस्रो अभियान हो । एमालेले संविधानसभाबाट संविधान बनेपछि सरकारको नेतृत्व गरेको थियो । तर गठबन्धनको सहमतिअनुसार ९ महिनापछि माओवादीलाई प्रधानमन्त्री दिने सहमति पालन नगरेपछि प्रचण्डले कांग्रेससँग मिलेर गठबन्धन बनाए । माओवादीले एमालेको साथ छोडेपछि सरकारबाट बाहिरियो । र उसले अभियान चलायाे त्यतिबेला । सुखानी स्मृति दिवसको अवसर पारेर २०७३ फागुन २१ गते मेची–महाकाली अभियान झापाबाट सुरू गर्‍यो ।

अभियानको क्रममा फागुन २३ गते सप्तरीको मलेठस्थित गजेन्द्रनारायण औद्योगिक क्षेत्रमा राखेको आमसभा बाहिर प्रहरीको गोली लागेर पाँच जनाको मृत्यु भयो । पिताम्बर मण्डल, सञ्जन मेहता, वीरेन्द्र महतो, प्रसौनीका आनन्द साह र इनर यादवको प्रहरीको गोली लागेर मृत्यु भएको थियो । उक्त घटनापछि एमालेले अभियान बीचमा नै छोड्यो ।

त्यसपछि एमालेले उक्त अभियान मधेशमा गरेन । सिधै २७ फागुनमा हेटौँडाबाट सुरु गरेर कञ्चनपुर पुग्यो । एक आमसभा सुर्खेतमा गर्‍याे । सुर्खेतमा अभियान सकिएको घोषणा गरिएको थियो ।

एमालेले अहिलेकाे मध्य पहाडी अभियानका लागि विभिन्न जनवर्गीय संगठनलाई पनि परिचालन गर्ने छ ।

यो अभियानलाई एमालेका अध्यक्ष केपी शर्मा ओलीले १४ गते मंसिरमा झुलाघाटमा राष्ट्रिय झण्डा फराएर उद्घाटन गर्ने छन् । एमालेको सचिवालयसम्मका नेताहरू अभियानमा हुने छन् भने अरु नेताहरू प्रदेशअनुसार जोडिने ज्ञवालीले जानकारी दिए ।

अभियानमा एमालेको कोषबाट अतिआवश्यक खर्च गरिने छ । अन्य खर्च अभियान जुन जिल्लामा हुन्छ त्यही जिल्लाको पार्टी कमिटीले व्यहोर्ने व्यवस्था गरेको पनि ज्ञवालीले बताए । ‘पार्टी कोषबाट केही रकम खर्च भए पनि अरु खर्च सम्बन्धित पार्टी कमिटीले व्यहोर्ने छ । पार्टीको शीर्ष नेतृत्व अभियानमा हुने छ । नेता कार्यकर्ताहरू जनताको घर घरमा जाने छन् । जनतासँग बस्ने खाने र उनका कुरा सुन्ने छन् ।’

प्रकाशित मिति: शुक्रबार, मंसिर १, २०८० १४:४०