सञ्चारमन्त्री रेखा शर्मालाई प्रश्नः टिकटकबाट सरकार आतंकित भएकाे हाे ?

A+ A A-

सरकारले आज अकस्मात सामाजिक सञ्जाल टिकटक बन्द गर्ने निर्णय गरेपछि त्यसबारे पक्ष विपक्षमा प्रतिक्रियाहरू आइरहेका छन् । किन सरकार यसरी सो लोकप्रिय सञ्जाल बन्द नै गर्नुपर्ने अवस्थामा पुग्यो भन्ने चासोको विषय बनेको छ । यही विषयमा सरकारका प्रवक्ता एवं सञ्चार तथा सूचना प्रविधिमन्त्री रेखा शर्मासँग कुराकानी गरेका छौँ ।

अभिव्यक्ति स्वतन्त्रता नै कुठिन्त हुनेगरी टिकटक बन्द गर्नुपर्ने अवस्थामा सरकार कसरी आइपुग्यो ?

टिकटकबाट सामाजिक सद्भावमा खलल पारेका कुराहरू धेरै पहिलाबाट आइरहेका थिए । यसले पछिल्ला दिनहरूमा सामाजिक सद्भाव विथोल्ने गतिविधि बढाएको थियो । साम्प्रदायिकता भढ्काउने खालका गतिविधि टिकटकमार्फत बढी भयो भन्ने गुनासो आएको थियो । यसरी गुनासोहरू बढी आएपछि यसलाई नियमन गर्नेलगायतका विषयमा सरकारले अलि पहिलाबाटै तयारी गरेको थियो । संयोगले आज निर्णय भयो । राजनीतिक क्षेत्रमा पनि यसबारे छलफल भइरहेको थियो ।

टिकटकबाट सरकार किन आतंकित भएको हो ?

सरकार त्यसरी आतंकित भएको होइन, सरकारले गरेका राम्रा काम प्रचार भएका थिए, दुवै तरिकाले हेर्नुपर्छ । सरकरात्मक र नकरात्मक दुवै किसिमले हेर्नुपर्छ । टिकटकबाट आतंकित भएर यो निर्णय लिएको भन्दा पनि सामाजिक सद्भाव विथोलिने गतिविधि बढेकाले हामीले त्यस कोणबाट निर्णय लिएका हौँ ।

भारत, अमेरिकालगायत देशमा भूराजनीतिक कारणबाट पनि टिकटक बन्द गरिएका छन्, नेपालमा पनि बन्द गरिँदा यो भूराजनीतिसँग पनि जोडिन्छ कि ?

यो भूराजनीतिमा जोडिने कुरा होइन, यो चीनमा पनि चल्दैन । हाम्रा छिमेकमा पनि चल्दैन । त्यसैले यसलाई भूराजनीतिक कोणबाट हेर्न मिल्दैन । यो सामाजिक सद्भावसँग जोडिएको विषय मात्रै हो ।

कांग्रेसका महामन्त्रीद्वय गगन थापा र विश्वप्रकाश शर्माले टिकटक बन्द गर्ने निर्णय गलत हो भनेका छन्, यसरी सत्ता गठबन्धनबाटै विरोध हुँदा सरकार यो निर्णयबाट पछाडि हट्छ कि भन्ने आशंका देखियो नि ?

प्रविधिलाई नियमन गर्ने कुरामा सरकार अगाडि बढ्छ । टिकटकका सन्दर्भमा लामो समय छलफल भएर गरिएको निर्णय हो । यो फिर्ता हुँदैन ।

सरकारले अहिले टिकटक मात्र बन्द गर्ने निर्णय गरेको छ, यस्ता अन्य सञ्जालहरू पनि छन् । जस्तै रिल, फेसबुक, इन्स्टाग्राम । त्यस्ता सञ्जालका विषयमा के हुन्छ ?

आजको निर्णय टिकटकका विषयमा मात्र हो । रिललगायतका विषयमा निर्णय भएको छैन ।

प्रकाशित मिति: सोमबार, कात्तिक २७, २०८० १६:१७