विश्वकपकै झल्को दिनेगरी फुटबलमय भए पूर्वीपहाडी जिल्ला, प्रतियोगिताहरूमा भारतदेखि भुटानसम्मका टिम

विश्वकपकै झल्को दिनेगरी फुटबलमय भए पूर्वीपहाडी जिल्ला, प्रतियोगिताहरूमा भारतदेखि भुटानसम्मका टिम

A+ A A-

पूर्वीपहाडी जिल्ला पाँचथरका विभिन्न ठाउँ यतिबेला फुटबलमय भएका छन् । विश्वकप फुटबलकै माहाैल झल्काउने गरी गाउँमा फुटबलकाे चर्चा र आकर्षण छ । यहाँ मात्र होइन, छिमेकी ताप्लेजुङ, तेह्रथुम, इलामका गाउँगाउँमा फुटबल प्रतियोगिता जारी छन् ।

हिउँद लागेसँगै पहाडी जिल्लामा साना, मझौला र ठूला पुरस्कार राशि भएका फुटबल प्रतियोगिता हुने गरेका छन् । चाडबाडको समय पारेर वडा, पालिका, जिल्लास्तरका प्रतियोगिता भइरहेका छन् । आमन्त्रण गोल्डकपमा छिमेकी भारतका टिमहरू पनि सहभागी छन् । प्रतियाेगिताहरूमा हजारदेखि लाख रुपैँयासम्मका पुरस्कार राखिएका छन् ।

जिल्ला खेलकुद विकास समिति पाँचथरका अध्यक्ष सन्तोष मोक्तानले शिलापत्रसित भने, ‘केही प्रतियोगिता हुने तयारीमा छन् । यसाे हुनुले फुटबल क्षेत्रको विकासमा योगदान गर्छ भन्ने विश्वास छ, पूर्वीपहाडले फुटबललाई निकै माया गर्छ । यसलाई व्यवस्थित गर्नका लागि राज्यले सहयोग गर्नुपर्छ ।’

छिमेकी जिल्लाका खेलाडीहरू प्रतियोगितामा सहभागी हुन्छन् । ग्रामिण क्षेत्रमा आयोजना हुने प्रतियोगितामा ठूलो संख्यामा टिमको सहभागिता रहन्छ । पाँचथरको जेभालेमा आयोजना भएको प्रतियागितामा ३ दर्जन टिमको सहभागिता थियो ।

फुटबल हेर्न दर्शकको उल्लेख्य सहभागिता हुने गरेकाे छ । अन्य कार्यक्रमकाे तुलनामा फुटबलमा आकर्षण धेरै देखिन्छ ।

कतै प्रतियोगिता सकिएका छन् भने कतै हुने क्रममा छन् । दशैँ, तिहार, चासोक तङ्नामलगायतका पर्वको माैका पारेर गाउँगाउँमा फुटबल प्रतियोगिता भइरहेका छन् । यसले खेलाडीको व्यस्तता बढाएको छ । पूर्वखेलाडी टंक राई भन्छन्, ‘लुकेर रहेका प्रतिभाको पहिचान गर्न सहज बनाएकाे छ, पछिल्ला वर्षमा प्रतियोगिताको संख्या बढ्दै गएको पाइन्छ, धेरैले मन पराउने, नियम बुझ्ने प्रतियोगिता भएकाले फुटबलप्रतिको आर्कषण निक्कै छ ।’

अब गाउँगाउँमा बर्खा नलागिञ्जेलसम्म प्रतियोगिता हुन्छन् तर चाडबाडको बेलामा बढी प्रतियोगिता हुने गरेका छन् ।

सातजना खेल्न मिल्नेदेखि ११ जना खेल्न मिल्ने खेल मैदानमा प्रतियोगिता भइरहेका छन् । जिल्लाकै पहिचान झल्काउने किसिमका ठूला प्रतियोगिताको पनि तयारी हुँदै छ । ‘खेलकुदका माध्यमबाट पर्यटन प्रवर्धनसमेत हुने लक्ष्य राखिएकाे भन्दै लिखर्कमा जारी फुटबल प्रतियोगिता आयोजक समितिका अध्यक्ष श्याम राईले भने, ‘युवालाई सिर्जनशील बनाउन पनि प्रतियोगिताबाट सहयोग पुग्छ ।’

विभिन्न क्षेत्रबाट सहयोग संकलन गरेर प्रतियोगिता आयोजना गर्ने गरिएकाे छ । विदेशमा बस्ने, स्वदेशका व्यवसायी तथा शुभचिन्तकले सहयोग गर्छन् । अहिले स्थानीय तहहरूले यस्ता प्रतियोगिताका लागि सहयोग गरिरहेका छन् ।

एकैदिन विभिन्न ठाउँमा प्रतियोगिता भइरहेको पाइन्छ । फुटबल प्रतियोगिताले सकारात्मक माहोल सिर्जना गर्ने शनिबारदेखि हुन लागेको रानीटार गोल्डकपका आयोजक त्रिवेणी युवा क्लबका अध्यक्ष ललितमान फेजोङले बताए ।

प्रकाशित मिति: शनिबार, कात्तिक २५, २०८० ०६:३६