जिदान भन्छन्– मेस्सी जादुमयी खेलाडी हुन्

A+ A A-

सन् १९९८ मा फिफा विश्वकप जितेका स्टार फुटबलर जिनेदिन जिदान र सन् २०२२ को विश्वकप विजेता लियोनल मेस्सीबीच भेटघाट भएको छ । विश्वको प्रसिद्ध ब्रान्ड एडिडासको पहलमा मेस्सी र जिदानबीच भेटघाट भएको हो ।

जिदान लामो समयसम्म रियल मड्रिडमा आबद्ध थिए भने मेस्सी मड्रिडको चिरप्रतिद्वन्द्वी क्लब बार्सिलोनामा लामो समयसम्म आबद्ध भए ।

खेल मैदानमा कमै मात्र उनीहरु आमनेसामने भए, तर जिदानले मड्रिडमा मुख्य प्रशिक्षक र सहप्रशिक्षकको भूमिका निभाउँदा भने मेस्सीले जिदानको प्रशिक्षण पाएको मड्रिडसँग लामो समयसम्म प्रतिद्वन्द्वीको रूपमा खेले ।

सन् २०२१ मा रियल मड्रिडको प्रशिक्षण छाडेपछि जिदान कुनै पनि क्लबमा आबद्ध छैनन्, मेस्सी पनि युरोपको प्रतिस्पर्धात्मक लिगबाट बाहिर छन् । उनी अहिले अमेरिकी क्लब इन्टरमायामीबाट खेल्छन् ।

दुवैले एकअर्कालाई राम्रोसँग नचिने पनि जिदान र मेस्सी दुवै एकअर्काका प्रशंसक हुन् । किनभने दुवै जादुमयी खेलाडी हुन् ।

यसबीचमा जिदानले मेस्सीलाई जादुमयी खेलाडी भनेका छन् । जिदान मेस्सीबारे भन्छन्, ‘मेस्सीलाई वर्णन गर्ने एउटै शब्द छ, जादु । म र मेस्सी सधैँ एकैसाथ हुँदैनौँ । त्यसैले आजको दिन विशेष छ, आज म भन्न सक्छु कि म उनको कति प्रशंसा गर्छु ।’

उनी थप भन्छन्, ‘मलाई लाग्छ कि मेस्सी जादुमयी खेलाडी हुन्, यो अर्थमा कि बल प्राप्त गर्नुअघि उनलाई अब के गर्ने भनेर थाहा हुन्छ ।’

मेस्सीले पनि जिदानको प्रशंसा गर्न कुनै कसर बाँकी छाडेनन् । उनले भनेका छन्, ‘मलाई लाग्छ, जिदान इतिहासकै एक महान् खेलाडी हुन् । पहिले पनि र अहिले पनि म जिदानको प्रशंसा गर्छु ।’ फ्रान्सका जिदान एक्ला फुटबलर पनि हुन्, जसलाई मेस्सीले खेल सकिएपछि जर्सी मागेका थिए । अर्थात् मेस्सी जिदानलाई पहिल्यैबाट महान् फुटबलरको रूपमा हेर्थे ।

एडिडासको कार्यक्रममा भेट भएपछि दुवैले पुनः एकपटक जर्सी साटासाट पनि गरेका छन् ।