मुगु सामूहिक हत्या प्रकरण : पैसा कमाएको डाहमा आफन्तले गरेका थिए हत्या

A+ A A-

यही कात्तिक १० गते बिहान मुगुको छायानाथ रारा नगरपालिका– ६, मुन्दु गाउँमा एकै परिवारका चार जनाको हत्या भएको खबर बाहिरियो । कात्तिक ८ गते दसैँको रात उनीहरूको हत्या गरिए पनि दुई दिन ढिलो गरी उक्त खबर प्रहरीसमक्ष पुग्यो । कात्तिक १० गते बिहान करिब ९ बजेको समयमा प्रहरीलाई एकै परिवारका चार जनाको हत्या भएको खबर प्राप्त भयो ।

उक्त खबर प्राप्त हुनासाथ जिल्ला प्रहरी कार्यालय मुगुबाट प्रहरी टोली घटनास्थलतर्फ पुगेको थियो । प्रहरी घटनास्थल पुगेपछि घरमा नयाँ ताल्चा लगाएको अवस्थामा २८ वर्षीया श्रीदेवी बोहोरा, उनका ८ महिनाका छोरा रहर बोहोरा, ८ वर्षीया छोरी अप्सरा बोहोर र ११ वर्षीय छोरा मनोज बोहोराको शव फेला पर्‍यो । त्यसपछि प्रहरीले सिङ्गो गाउँलाई निगरानीमा राखेर हत्यारा प्रकाउ गर्न अनुसन्धान थाल्यो ।

अनुसन्धान थालेको करिब दुई हप्तापछि प्रहरीले एक जना आफन्तलाई पक्राउ गरेको छ । प्रहरी स्रोतका अनुसार पक्राउ पर्ने मुगुको छायानाथ रारा नगरपालिका– ७, पिनाका ३० वर्षीय गोरखबहादुर शाही हुन् । उनलाई प्रहरीले गएको सोमबार बाँकेको कोहलपुरबाट प्रकाउ गरेको हो । उनलाई पक्राउ गरी मुगु पुर्‍याएर उनीमाथि थप अनुसन्धान गर्दा मुन्दु गाउँका बोहोरा थरका अर्का व्यक्ति पनि पक्राउ परेको अनुसन्धानमा संलग्न एक प्रहरी अधिकृतले शिलापत्रलाई बताए ।

प्रहरीले प्रकाउ गरी गोरखबहादुरमाथि छानबिन गर्दा उनले घटनामा मुन्दु गाउँकै बोहोरा थरका एक युवक संलग्न रहेको बताएका थिए । त्यसपछि प्रहरीले बोहारा थरका ती युवालाई पनि पक्राउ गरेको छ । अनुसन्धानमा संलग्न ती अधिकृतका अनुसार उनीहरूले सामूहिक हत्या धनसम्पत्ति कमाएको रिस र डाहका कारण गरेको बुझिएको छ ।

मृतक श्रीदेवीका श्रीमान् दीपक बाेहाेरा विगत सात/आठ वर्षदेखि रोजगारीको सिलसिलामा विदेशमा बस्दै आएका छन् ।बोहोराले लामो समयसम्म विदेशमा बसेर कमाए । गाउँमा घर, सदरमुकाम मुगुको गमगढीमा लाखौँ रुपैयाँको जग्गा किनेपछि त्यसको डाह आफन्तलाई लागेको थियो ।

स्रोतका अनुसार पक्राउ परेका आफन्त गोरखबहादुर शाही श्रीदेवीकी आमाकी बहिनीका श्रीमान् अर्थात् श्रीदेवीका अंकल हुन् भने अर्का पक्राउ परेका बोहोरा थरका युवा मामाको छोरा दाइ नाता पर्छन् । स्रोतले दिएको जानकारीअनुसार मृतक श्रीदेवीका श्रीमान्‌ले विदेशमा कमाएको रुपैयाँले मुगु सदरमुकाममा ४०/४२ लाख रुपैयाँबराबरको जग्गा किनेका छन् ।

उक्त जग्गा र पैसा कमाएको देखेर त्यही रिस डाहका कारण आफन्तले हत्या गरेका बताइएकाे छ । प्रहरीका अनुसार गोरखबहादुर गाउँका एक नम्बर बदमासका रूपमा चिनिन्छन् । प्रहरीले प्रकाउ परेका उनीहरूलाई आज (शुक्रबार) दिउँसो २ बजे पत्रकार सम्मेलन गरेर सार्वजनिक गर्ने मुगुका डीएसपी (प्रहरी नायब उपरीक्षक) वीरेन्द्र थापाले जानकारी दिए ।

प्रकाशित मिति: शुक्रबार, कात्तिक २४, २०८० १३:२५