पोखरा महानगरको बर्बरता : ‘गरिब–दुःखी’माथि लात्ती–मुक्का !

A+ A A-

धनाढ्यहरू ‘गरिब–दुःखी’ माथि कतिसम्म क्रुर हुन्छन् ? यसको ज्वलन्त उदाहरण आधा अर्बका मालिक (सम्पत्ति विवरणअनुसार)पोखरा महानगरपालिकाका मेयर धनराज आचार्यले देखाएका छन् । चाडबाडको समयमा मेयर आचार्यको निर्देशनमा फेवाताल किनारमा चटपट, पानीपुरी बेच्ने महिलाहरूलाई हटाउने नाममा निर्घात कुटपिट भएको छ ।

बुधबार र बिहीबार साँझ नगर प्रहरी र नेपाली प्रहरीले त्यहाँ व्यवसाय गरेर जीविका चलाइरहेका महिलालाई कुटपिट गरेको हो । तर, महिलामाथि हातपात गर्नेमा नेपाल प्रहरीभन्दा पनि महानगरपालिकाको प्रहरी संयन्त्र उद्दत थियो । नगर प्रहरीले महिला र किशोरीमाथि लात्ती–मुक्का बर्साएको हो ।

दसैं–तिहारले स्कुल विदा भएकाले १५ वर्षीय लोकमाया सुनार आमालाई चटपट–पानीपुरी व्यापारमा सघाउन फेवा किनार पुगिरहन्छिन् । बुधबार साँझ आमा अम्बिका र लोकमायासँगै थिए । नगर प्रहरी आएर सामान लैजान खोज्यो । अम्बिकाले नदिएपछि दोहोरो तानातान भयो । त्यतिबेला आमामाथि हात हालेपछि लोकमायाले सहन सकिनन् । आमालाई छोड्दिनु भनेर दोहोर प्रतिकार हुँदा लोकमाया पनि कुटिइन् । उनको अनुहार र ढाडमामा महिला नगर प्रहरीले मुक्का बर्साए । ‘मम्मीलाई केही नगर्नु भनेर जाँदा मलाई लात्तीले हाने । ढाड दुखेको छ । घुँडामा डाम छ,’ कक्षा १० मा अध्ययनरत लोकमायाले घटनापछि सुनाइन् ।

हेटौंडाकी हीरा नेगी बाथ रोगबाट पीडित छन् । श्रीमान् पनि बिरामी भएको र अर्थोपार्जन गर्न नसक्ने भएपछि उनी छोरीलाई लिएर फेवा किनारमा चटपट व्यापार गर्छिन् । चटपट बेचेरै हुने आम्दानीले परिवार त चलेको छ नै, उपचार खर्च पनि धानिएको छ । बुधबारको घटनापछि हीरा दुःखी सुनिइन्, ‘सुःख छ भने दोबाटोमा सामान फिजाउन जान्छ ? धन्दा गरेर खाने ? इज्जत छ बा–आमाको । चटपट बेच्ने लुरोलंगडो मान्छेको सामान उठाइदिने ! नगरपालिकामा त दसैं तिहारको भत्ता आउँछ । हामीलाई आउँछ र ?’

भगवती तामाङ बुधबार साँझ ७ बजे ताल किनारमै थिइन् । घर जाने तरखर गर्दागर्दै नगर प्रहरी आइपुगे । त्यसपछि भागाभाग गर्ने क्रममा नगर प्रहरीले उनको सामान खोसिदिए । त्यसको विरोध गर्दै उनी बिहीबार नगरपालिका अगाडि आएकी थिइन् । ‘धनीले जसरी पनि खान पाउने, गरिबले खान नपाउने ? ल भन्नुस् त । राति ७ बजे ठेला खोस्न आए । साथीहरू लिएर आइज भन्थे । राति मेरो ठेला हेर्ने कि साथी खोज्न जाने ?’

सर्वोच्च अदालतले फेवातालको वरिपरि वर्षायामको उच्चतम पानीको किनाराबाट ६५ मिटरसम्मको क्षेत्रका संरचना ६ महिनाभित्र भत्काउन विपक्षीको नाममा गत असारमा आदेश जारी गरेको थियो । त्यसको पूर्णपाठ गत असोजमा सार्वजनिक भएको छ । तर, यसमा महानगरपालिकाको कुनै प्रगति छैन । यही विषय निकालेर भगवतीले मेयर आचार्यलाई चुनौती दिइन्, ‘ऋण गरेर जोडेको सामान उठाएसी के बेच्ने ? चाडबाडको बेलामा यस्तो गरेर हुँदैन । पहिला ६५ मिटर फाल्नुस् अनि हामी पनि हट्छौं ।’

पीडित महिलाहरू बिहीबार दिउँसो महानगरपालिकाको कार्यालयमा मेयरलाई भेटेर आफ्ना कुरा राख्न पुगेका थिए । तर, माथिको आदेश भन्दै नगर प्रहरीले गेटभित्र छिर्न दिएनन् । त्यसपछि मिडियासँग आफ्ना कुरा राखेर उनीहरू फर्किए ।

आफूहरूलाई निश्चित समय तोकेर भए पनि व्यवसाय गर्न दिनुपर्ने र सामान जफत गर्न नहुने व्यवसायीको माग छ । मेयर धनराज आचार्य यो घटनाबारे बोल्न चाहँदैनन् । उनले आफू अस्पतालमा रहेको र यस विषयमा नबोल्ने बताए । नगर प्रहरी प्रमुख पुरुषोत्तम थापाले कसैमाथि कुनै पनि हालतमा दुव्र्यवहार नभएको दाबी गरे । ‘हामीले सामान लिएर आउँदा कसरी दुव्र्यवहार हुन्छ ? सार्वजनिक ठाउँमा व्यवसाय गर्न पाइँदैन । हामीले त्यहाँ उहाँहरु र रेष्टुरेन्टको सामान पनि नियन्त्रणमा लिएका छौं,’ उनले भने ।

नगर प्रहरीले कुटपिट गरेको विषयमा महानगरपालिकाकै जनप्रतिनिधि असन्तुष्ट छन् । पोखरा–६ का वडाध्यक्ष विष्णुबहादुर भट्टराईले फेवा किनारका रेष्टुरेन्ट व्यवसायीलाई हटाउने उद्देश्य भए पनि महिलाहरूमाथि त्यस्तो घटना भएको र त्यो गलत भएको बताए । ‘त्यहाँ रेष्टुरेन्टवालाले मिचेरै काम गरेकाले त्यसलाई रोक्ने उद्देश्यसहित अभियान हो,’ नगर प्रहरीले हातपात गरेको घटनामा उनले भने, ‘नगर प्रहरीले हातपात गर्न हुँदैन ।’

प्रकाशित मिति: बिहीबार, कात्तिक २३, २०८० २०:५९