अर्बौं लगानीका २० वटा विमानस्थल बन्द, हर्क साम्पाङ रिझाउन मन्त्री किराँतीको धरानमा विमानस्थल बनाउने रहर

अर्बौं लगानीका २० वटा विमानस्थल बन्द, हर्क साम्पाङ रिझाउन मन्त्री किराँतीको धरानमा विमानस्थल बनाउने रहर

A+ A A-

धरान उपमहानगरपालिकाका प्रमुख हर्क साम्पाङले २२ कात्तिक २०८० मा संघीय सरकारलाई पत्र लेखेर धरानमा विमानस्थल बनाउन आग्रह गरे । संघीय सरकारको संस्कृति, पर्यटन तथा नागरिक उड्‌डयनमन्त्री सुदन किराँतीलाई पठाएको पत्र प्रमुख साम्पाङले फेसबुकमार्फत सार्वजनिक मात्रै गरेनन्, दिनमा तीन पटकसम्म स्टाट्स लेखे ।

अर्थात्, सामाजिक सञ्जालबाट मन्त्री किराँतीलाई दबाब बढाएका साम्पाङलाई मन्त्री किराँतीले सामाजिक सञ्जालबाटै जवाफ दिए । धरान उपमहानगरपालिकाका प्रमुख साम्पाङले सामाजिक सञ्जालमा पत्र सार्वजनिक गरेको १६ घण्टापछि मन्त्री किराँतीले सामाजिक सञ्जाल फेसबुकमै लेखे, ‘धरानमा विमानस्थल निर्माण अध्ययन समिति तत्काल गठन गर्न नागरिक उड्‌डयन महानिर्देशकलाई निर्देशन गरिएको छ ।’

नागरिक उड्‌डयन मन्त्री किराँती र धरान उपमहानगरका प्रमुख साम्पाङबीचको सामाजिक सञ्जालको सवाल जवाफ जति आश्चर्यजनक लाग्छ, त्यतिकै गम्भीर पनि । सरकारको लगानीमा अहिलेसम्म ५३ वटा विमानस्थल रहेका छन् । तीमध्ये २० वटा विमानस्थल पूर्ण रूपमा बन्द छन् । सडक यातायातको पहुँच विस्तारसँगै लामो समय सञ्चालनमा रहेका विमानस्थल बन्द हुने अवस्थामा पुगेका हुन् । जस्तो, सदरमुकाम दिक्तेलसम्म सहज सडक पहुँचसँगै खोटाङको लामीडाँडा र खानीडाँडा विमानस्थलमा सञ्चालनमा समस्या भयो । जसकारण तीनवटा विमानस्थल रहेको खोटाङमा केही वर्षदेखि उडान हुनै समस्या भएको छ, यात्रुको अभावले गर्दा ।

त्यही समस्या सोलखुम्बुको फाप्लु विमानस्थलले भोगिरहेको छ । त्यसो त, माथिल्लो सोलुखुम्बुका दुईवटा विमानस्थल स्याङ्बोचे र काङ्देल विमानस्थल सञ्चालनमा छैनन् । पर्यटकीय सिजनका समयमा हेलिकोप्टर उडानमा सीमित भएको छ भने अरु बेलामा चौरी चराउन चौरका रूपमा विकसित भएका छन् । खोटाङ र सोलुको मात्र होइन, मनाङ विमानस्थलको पनि त्यही अवस्था छ । तिलिचो ताल र थोरङ्ला पास जाने पर्यटकलाई केन्द्रित गरी मनाङ गाउँमा बनाइएको विमानस्थलबाट उडान नै हुँदैन । सदरमुकाम चामेदेखि मनाङ गाउँसम्म सडक यातायात सहज भएपछि मनाङ विमानस्थल बन्द हुन पुगेको हो । उक्त विमानस्थलमा सरकारले लगानी बढाएर कालोपत्रेसमेत गरेको छ तर विमानस्थलमा वर्षमा एक साता पनि उडान हुँदैन ।

त्यसरी हेर्दा, गोरखाको पालुङटार विमानस्थल होस् वा चितवनको मेघौली विमानस्थल होस् । जहाँ सडकको पहुँच सहज पुग्यो, ती क्षेत्रका विमानस्थलबाट उडान बन्द हुन थालेको छन् । महेन्द्रनगर विमानस्थलदेखि जिरी विमानस्थलको अवस्था त्यही भएको हो । एकातिर सडक यातायातको पहुँच अर्कातिर यात्रुको अभावका कारणले रामेछापको खिजी चण्डेश्वरी विमानस्थल, लाङटाङ विमानस्थल, ढोरपाटन विमानस्थल र रोल्पा विमानस्थल पनि बन्द अवस्थामा छन् ।

यसरी हेर्दा राज्यको अर्बौं लगानी गरी निर्माण गरेका २० वटा विमानस्थल पूर्ण रूपमा बन्द छन् भने एक दर्जनभन्दा बढ्ता विमानस्थलचाहिँ हप्तामा एउटासम्म उडान भरेर जेनतेन धानिरहेका छन् । त्यसो भए थप विमानस्थल आवश्यक हो कि होइन ? भन्ने पनि उठ्न थालेको छ । त्यही बेलामा मन्त्री किराँतीले धरानमा विमानस्थल निर्माणका लागि अध्ययन समिति बनाउन नेपाल नागरिक उड्‌डयन प्राधिकरणका महानिर्देशक प्रदीप अधिकारीलाई निर्देशन दिएका छन् ।

राजनीतिक आग्रहका आधारमा विमानस्थलहरू बन्ने गरेका छन् । त्यसकै प्रभावमा परेर मन्त्री किराँतीले पनि धरानमा विमानस्थल बनाउन निर्देशन दिएको देखिन्छ । जस्तो, २०७९ को चुनावका बेलामा प्रधानमन्त्री पुष्पकमल दाहाल प्रचण्डले पालुङटार विमानस्थल सञ्चालन गर्ने वचन गोरखाबासीलाई दिएका थिए । काठमाडौंबाट सहजै सडक यात्राबाट पुग्ने पालुङटारमा विमानस्थल आवश्यक हो कि होइन ? भन्ने विमर्श नगरी प्रचण्डले उक्त आश्वासन दिएका थिए । यद्यपि, अहिलेसम्म उक्त आश्वासन कार्यान्वयन भएको छैन ।

चितवनको मेघौली विमानस्थल सञ्चालनमा पनि त्यही आश्वासन दिइएको थियो । सहज सडक पहुँचका साथै नजिकै भरतपुर विमानस्थल सञ्चालनमा हरेका कारण मेघौली विमानस्थलमा थप लगानी आवश्यक हो कि होइन ? भन्नेमा पनि विमर्श भइरहेको छैन । २०६३ सालमा संस्कृति, पर्यटन तथा नागरिक उड्‌डयन मन्त्री भएको मौकामा प्रदीपकुमार ज्ञवालीले गुल्मीमा विमानस्थल बनाउने निर्णय लिएका थिए । २०७९ चुनावको बेलामा चुनावी नारा नै बनेको यो विमानस्थल अहिलेसम्म नियमित सञ्चालनमा आउन सकेको छैन । राजनीतिक लाभका लागि कतिसम्म हुन्छ भन्ने उदाहारण इलामको विमानस्थल पनि हो । सडक यातायात सहज भएपछि बन्द भएको इलामको विमानस्थल दशकपछि पुनः सञ्चालनमा ल्याउन पूर्वप्रधानमन्त्री झलनाथ खनालले निकै जोडबल लगाए । उनको जोडबलकै कारण उद्घाटन पनि भयो । तर, विमानस्थल नियमित सञ्चालन हुन सकेको छैन ।

जसरी २०६३ सालमा ज्ञवालीले आफ्नो गृहजिल्लामा विमानस्थल बनाउने निर्णय लिए, त्यसरी नै २०७८ मा पर्यटनमन्त्री भएका प्रेम आलेले कञ्चनपुरको महेन्द्रनगरस्थित मझगाउँ विमानस्थलमा बजेट राखी शिलान्यास गरे । जबकि, नजिकै धनगढीमा ठूलो विमानस्थल चलिरहेको छ । अनि, २०७८ मा पूर्वप्रधानमन्त्री शेरबहादुर देउवाको गृहजिल्ला डडेल्धुरामा विमानस्थलको सम्भाव्यता अध्ययन गर्न भनेर बजेट छुट्याइएको थियो ।

राजनीतिक पहुँच देखाउन पूर्वप्रधानमन्त्री केपी शर्मा ओलीले जन्म जिल्ला तेह्रथुमको चुहानडाँडामा विमानस्थल बनाउने निर्णय लिएका थिए । त्यही विमानस्थलको सम्भाव्यता अध्ययन गर्न जाँदा तत्कालीन उड्‌डयमन्त्री रवीन्द्र अधिकारी र उड्‌डयन व्यवसायी आङछिरिङ शेर्पाको हेलिकोप्टर दुर्घटनामा निधन भएको थियो । राजनीति पहुँचकै आधारमा उदयपुरमा विमानस्थल निर्माणको प्रक्रिया अगाडि बढाइसकिएको छ । कांग्रेस नेता नारायण खड्काको प्रयासमा उदयपुरमा विमानस्थल बन्दै गर्दा माओवादी नेता हरिबोल गजुरेलहरूको पहुँचमा सिन्धुलीको कमलामाई नगरपालिकामा विमानस्थल बनाइँदैछ । टोपबहादुर रायमाझीको पहलमा अर्घाखाँचीमा पनि विमानस्थल निर्माणाधीन रहेको छ । उड्‌डयमन्त्री किराँती पनि धरानमा विमानस्थल बनाउने निर्देशनसँगै यही मेलोमा थपिएका छन् ।

प्राधिकरणका प्रवक्ता जगन्नाथ निरौलाले मन्त्री किराँतीको निर्देशन लिखित रूपमा आइनसकेको बताए । शिलापत्रसँग निरौलाले भने, ‘मैले पनि सार्वजनिक रूपमा सुनेको छु तर लिखित रूपमा आएको जानकारी छैन ।’ अर्कातिर विमानस्थलको संख्या ५३ पुगे पनि नेपाली आकाशमा उड्ने जहाजको संख्या भने ५१ वटामा सीमित छन् । अझ दुर्गममा उड्ने जहाजको संख्या ११ मात्रै छन् । पञ्चायतकालमा नेपाल वायुसेवा निगमसँग २१ वटा जहाज थिए, अहिले ४ वटा मात्र छन् । दुर्गममा सेवा दिने १० वटा ट्विनअटर भएकोमा अहिले एउटामा सीमित रहेको छ । विमानस्थल थपिँदै जाँदा जहाज भने तुलनात्मक रूपमा थपिएका छैनन् । यस्तो अवस्थामा विमानस्थलमा अर्बै लगानी गरेर मात्रै नहुने टिप्पणी भइरहेको छ ।

प्राधिकरणका प्रवक्ता निरौलाको भनाइमा अधिकांश विमानस्थल सञ्चालनका लागि योग्य भए पनि विमानको अभावले उडान हुन नसकेको बताउँछन् । केही विमानस्थल भने भौतिक रूपमा सञ्चालनमा समस्या हुने अवस्थामा रहेका छन् । उनले भने, ‘केही विमानस्थलहरू विमान अभावका कारण र केही भने भौतिक अवस्थाका कारणले नै सञ्चालन हुन नसकेका हुन् । थप विमानस्थल आवश्यक हो कि होइन भन्ने कुरा चाहिँ मैले भन्न सक्दिनँ ।’

यी हुन् बन्द रहेका विमानस्थल:

स्याङ्बोचे विमानस्थल
काङ्देल विमानस्थल
खिजी चण्डेश्वरी विमानस्थल
जिरी विमानस्थल
लाङटाङ विमानस्थल
गोरखा पालुङटार विमानस्थल
मेघौली विमानस्थल
मनाङ विमानस्थल
ढोरपाटन विमानस्थल
रोल्पा विमानस्थल
रुकुम चौरजहारी विमानस्थल
मसिनेचौर विमानस्थल
कालीकोट विमानस्थल
टीकापुर विमानस्थल
महेन्द्रनगर विमानस्थल
दार्चुला विमानस्थल

प्रकाशित मिति: बिहीबार, कात्तिक २३, २०८० १३:२०

शिलापत्र संवाददाता

प्रतिक्रिया दिनुहोस्

भर्खरै

रञ्जितासहितको फोटो राख्दै रेशम चौधरीले लेखे- छिट्टै लुम्बिनी र सुदूरपश्चिम सरकारबाट समर्थन फिर्ता लिन्छौँ

टी-२० सिरिज: वेस्ट इन्डिज 'ए' विरुद्ध नेपालले सुरुमा बलिङ गर्ने, सोमपाल र करण बेन्चमा

रवि लामिछानेलाई अर्जुननरसिंहको चुनौती- कांग्रेसले प्रधानमन्त्रीको अफर गरेको भए प्रमाण सार्वजनिक गर्नुस्

अपडेट: इलाम-२ मा अहिलेसम्म २२ प्रतिशत मत खस्यो

कान्तिलोकपथ दैनिक तीन घण्टा मात्रै खुल्ने

लोकप्रिय

सरकार ढाल्न कांग्रेसले दाेहाेराे संवाद थालेपछि प्रचण्डले तयार पारे तीन विकल्प

सहकारी ठगीले इलाम २ मा तनाव दिएपछि रवि लामिछानेको नयाँ स्टन्ट, धन्यवाद दिन गृह मन्त्रालय पुग्ने को हुन् ?

बुद्धनगरमा कांग्रेस–एमालेका चार नेताकाे वार्ता, बालकाेट पुग्दासम्म गगन थापा निराश

२५ अर्ब किलोमिटर टाढाबाट आयो पृथ्वीमा सन्देश, उत्साहित भए नासाका वैज्ञानिक

प्रचण्ड सरकारमा सहभागी हुँदै नाउपा, रञ्जितानिकट चौधरी मन्त्री बन्ने

विचार

चीनमा एउटै भूकम्पले लिएको थियो ८ लाख ३० हजारको ज्यान (भिडियो)

तीन जनाको मुट्ठीमा ३ करोड जनताको लोकतन्त्र

बीसौँ शताब्दीका प्रभावशाली नेता लेनिन (भिडियो)

ब्लग

सधैँ हाँसीखुसी देखिने गाउँकी काकी, डाक्टर र अर्जुन मैनालीले राेजेकाे गलत बाटाे

छोटो तर मनमोहक पदयात्रा 'लाङटाङ'

एक जनमुखी प्रधानपञ्चको नाममा

शिक्षा

कक्षा १२ को परीक्षा आजदेखि, तीन लाख ९० हजार परीक्षार्थी सहभागी हुँदै

बालेनको प्रयाससँगै काठमाडौंका सामुदायिक विद्यालयमा आकर्षण, गुणस्तर धान्न भने चुनौती

डीएभी विद्यालयमा राग र तालमिश्रित सांस्कृतिक कार्यक्रम ‘तरङ्ग’ सम्पन्न