सौर्य सिमेन्टले मधेश प्रदेशमा 'सौर्य मिथिला लोक चित्रकला प्रतियोगिता २०८०' आयोजना गर्दै

सौर्य सिमेन्टले मधेश प्रदेशमा 'सौर्य मिथिला लोक चित्रकला प्रतियोगिता २०८०' आयोजना गर्दै

A+ A A-

सौर्य सिमेन्ट इन्डस्ट्रिजले चित्रकला प्रतियोगिता आयोजना गर्ने भएको छ । कम्पनीले आफ्नो व्यावसायिक सामाजिक उत्तरदायित्वअन्तर्गत 'सौर्य मिथिला लोक चित्रकला प्रतियोगिता २०८०' आयोजना लागेको जनाएको हो ।

प्रतियोगितामा प्रथम स्थान प्राप्त गर्नेलाई ७५ हजार, दोस्रो स्थान प्राप्त गर्नेलाई ५० हजार र तेस्रो स्थान प्राप्त गर्नेलाई २५ हजार प्रदान गरिने आयोजक कम्पनीले जनाएको छ । त्यस्तै, १२ जनालाई सान्त्वना पुरस्कारस्वरुप हरेकलाई ५ हजार रनगद पुरस्कार प्रदान गरिनेछ ।

कम्पनीका अनुसार, प्रतियोगितामा मधेश प्रदेशका १६ वर्षभन्दा माथिका महिला वर्गहरू सहभागी हुन सक्नेछन् । प्रतियोगिता विभिन्न तीन चरणमा सम्पन्न हुनेछ । पहिलो चरणमा सहभागी महिलाहरूले आफ्नो विस्तृत जानकारी एवं आफ्नो एक चित्रकलाको प्रतिलिपि कम्पनीको वेबसाइट/फेसबुक पेजको क्यूआर कोड स्क्यान गरी फारम भरेर बुझाउन वा उपलब्ध फारम डाउनलोड गरी आवश्यक सम्पूर्ण जानकारी उल्लेख गरी ह्वाट्सअप ९८०२३३५५८५ मार्फत पनि पठाउन सकिनेछ । साथै, भरिएको फारम र आफ्नो चित्रकला गाउँपालिका/ नपामार्फत पनि बुझाउन सकिने व्यवस्था मिलाइएको छ । फारम बुझाउने अन्तिम मिति २०८० मंसिर ८ रहेको छ ।

फारम साथ उपलब्ध गराइएको चित्रकलाका आधारमा सहभागीमध्ये ७५ सहभागीहरू दोस्रो चरणका लागि छनोट हुनेछन् । दोस्रो चरणमा प्रवेश गरेका समहभागीहरूले कम्पनीले उल्लेख गरेको विषयमा मिथिला चित्रकला क्यान्भासमा कोर्नुपर्नेछ । दोस्रो चरणको प्रतियोगिता सौर्य सिमेन्टको आफ्नो उद्योगभित्र सञ्चालन हुनेछ ।

फाइनल चरणका लागि ७५ सहभागीमध्ये उत्कृष्ट १५ सहभागीहरू छनोट हुनेछन् । यस चरणमा सहभागीहरूले सौर्य सिमेन्टको उद्योगको भित्तामा मिथिला चित्रकला बनाउनुपर्ने हुन्छ । सहभागीहरूले बनाएको चित्रकलाको मूल्याङ्कन निर्णायक समितिले गर्ने र सोहीअनुरुप पुरस्कृतसमेत गरिने कम्पनीले जनाएको छ ।