जाजरकोटमा भूकम्पले ३४ हजार बढी घरमा क्षति, ६७ हजार नागरिक विस्थापित

A+ A A-

गत शुक्रबार राति ११ बजेर ४७ मिनेटमा जाजरकोटको बारेकोट गाउँपालिका–१, रामीडाँडा केन्द्रविन्दु भएर गएको भूकम्पका कारण जाजरकोटमा ३४ हजार बढी घरमा क्षति पुगेको छ । भूकम्पबाट जाजरकोटमा ६७ हजार बढी नागरिक विस्थापित भएका छन् ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणले उपलब्ध गराएको बुधबार साँझसम्मको तथ्यांकअनुसार जाजरकोटमा कुल ९ हजार ७ सय ९४ घरमा पूर्ण क्षति पुर्‍याएको उल्लेख छ । त्यसैगरी, जिल्लामा कुल २४ हजार ७ सय ७ घरमा भूकम्पले आंशिक क्षतिसमेत पुर्‍याएको छ ।

जिल्लामा कुल ६७ हजार १ सय ७४ जना नागरिक भूकम्पका कारण विस्थापित भएको प्राधिकरणको तथ्यांक छ । त्यसैगरी, जाजरकोटमा मात्र भूकम्पका कारण १ लाख ५४ हजार ३ सय ९६ जना नागरिक प्रभावित भएका थिए ।

विस्थापित हुनेहरूमा सबैभन्दा धेरै कुशे गाउँपालिकामा रहेका छन् । पालिकामा कुल २५ हजार ८ सय १५ जना विस्थापित भएको प्राधिकरणको तथ्यांक छ ।

त्यसैगरी, नलगाड नगरपालिकामा १५ हजार ३ सय ४१ जना, भेरी नगरपालिकामा १४ हजार ९ सय ९७ जना विस्थापित भएका छन् । छेडागाड नगरपालिकामा १ हजार ८ सय १०, बारेकोट गाउँपालिकामा ५ हजार ६ सय ३२, जुनीचाँदे गाउँपालिकामा ३ हजार ४ सय ४९ जना नागरिकहरू भूकम्पका कारण विस्थापित भएका हुन् । शिवालय गाउँपालिकामा भने भूकम्पका कारण १ सय ३० जना नागरिक विस्थापित भएको प्राधिकरणको तथ्यांक छ ।

जाजरकोट र रुकुम पश्चिमका भूकम्प पीडितहरूका लागि अझै १० हजारभन्दा बढी टेन्ट र २९ हजार बढी त्रिपाल अभाव देखिएको छ । यी दुई जिल्लाका सात स्थानीय तहमा १० हजार २ सय ९४ वटा टेन्ट र २९ हजार ५ सय २७ वटा त्रिपाल आवश्यक रहेको प्राधिकरणले जनाएको छ ।

बारेकोट गाउँपालिकामा १ हजार ३५ वटा टेन्ट र २ हजार २ सय ८६ वटा त्रिपाल आवश्यक छ । त्यसैगरी, छेडागाड नगरपालिकामा १ हजार ९ सय ४५ वटा टेन्ट र ४ हजार ५ सय ४५ वटा त्रिपाल आवश्यक रहेको प्राधिकरणले जनाएको छ ।

शिवालय गाउँपालिकामा १६ वटा टेन्ट र ३२ वटा त्रिपाल र नलगाड नगरपालिकामा १ हजार २ सयवटा टेन्ट, ४ हजार २ सय १६ वटा त्रिपालको आवश्यकता रहेको प्राधिकरणको तथ्यांक छ । रुकुम पश्चिमतर्फ सानीभेरी नगरपालिकामा १ हजार २ सय ४६ वटा टेन्ट र ३ हजार ७ सय ४१ वटा त्रिपालहरू आवश्यक रहेको प्राधिकरणले जनाएको छ ।

आठबिसकोट नगरपालिकामा तीन हजारवटा टेन्ट र आठ हजारवटा त्रिपाल तथा चौरजहारी नगरपालिकामा १ हजार ५ सय ५२ वटा टेन्ट र ६ हजार १ सय २६ वटा त्रिपाल आवश्यक रहेको प्राधिकरणको तथ्यांक छ । भूकम्पले क्षति पुगेको सल्यानमा समेत तीन सयवटा टेन्ट र ५ सय ८१ वटा त्रिपाल आवश्यक रहेको जनाइएको छ । हालसम्म जाजरकोटमा ७३ वटा टेन्ट र ८३ वटा पारिवारिक टेन्ट वितरण भइसकेका छन् ।

प्राधिकरणलाई बुधबार प्राप्त मंगलबारसम्मको तथ्यांकअनुसार जाजरकोटमा ९ हजार १ सय १४ वटा पाल, १२ हजार ७६ वटा ब्ल्यांकेट वितरण भएको देखिन्छ । रुकुम पश्चिमतर्फ ३० वटा टेन्ट वितरण भएका छन् । त्यसैगरी, १ हजार सातवटा त्रिपालसमेत वितरण भएको तथ्यांक छ । हालसम्म रुकुम पश्चिमका दुई हजार ३ सय ६० वटा ब्ल्यांकेट वितरण भएको प्राधिकरणको तथ्यांक छ ।

प्रकाशित मिति: बिहीबार, कात्तिक २३, २०८० १२:०५