धादिङ घटनाले कांग्रेसमा समीकरण फेरबदलकाे संकेत, देउवातिर जान लागेका हुन् गगन ?

धादिङ घटनाले कांग्रेसमा समीकरण फेरबदलकाे संकेत, देउवातिर जान लागेका हुन् गगन ?

A+ A A-

नेपाली कांग्रेस धादिङको जिल्ला सम्मेलनमा देखिएको दृश्यले कांग्रेसको आन्तरिक समीकरण फेरबदलको संकेत गरेको छ । नेता डा. शेखर कोइराला प्रमुख अतिथि बनेको कार्यक्रम सभापति शेरबहादुर देउवा समूहका नेताहरूसँग मिलेर महामन्त्री गगन थापानिकट नेताहरूले बहिष्कार गरेपछि केन्द्रमा देउवा र गगनबीच ‘प्याचअप’ हुन लागेको रूपमा चर्चा भएको छ । जबकि १४औं महाविधेशनमा शेखर र गगन मिलेर देउवासँग प्रतिस्पर्धा गरेका थिए ।

तर, पछिल्ला दिनहरूमा शेखर र गगनबीच दूरी बढिरहेको स्पष्ट देखिएको छ । धादिङ घटनाले यसलाई थप बल मिलेको छ । खासगरी मन्त्री बनाउने विषयले शेखर र गगनबीच दूरी बढेको थियो, कोशी प्रदेशमा शेखरले लिएको ‘बोल्ड’ निर्णयमा गगनले साथ नदिएपछि उनीहरूको दूरी झन् बढेको छ ।

त्यसमाथि गगननिकट नेताहरूले धादिङ शेखरले उद्घाटन गरेको जिल्ला सम्मेलल बहिष्कार गरेपछि उनीहरूबीचको दूरी निकै टाढा बढेको देखिएको छ । धादिङ घटनाले देउवा र गगन मिल्न लागेको स्पष्ट संकेत दिन्छ । पछिल्ला दिनहरूमा गगननिकट नेता तथा कार्यकर्ताहरूले सामाजिक सञ्जालमा देउवानिकट नेताको प्रशंसा गरिरहेको देखिन्छ ।

१८ कात्तिकमा भएको जिल्ला सम्मेलनमा सभापति शेरबहादुर देउवा र महामन्त्री गगन थापा समूहले बहिष्कार गरेको थियो । कांग्रेस धादिङका सभापति रामनाथ अधिकारी शेखर कोइराल समूहका नेता हुन् । उनी प्रतिनिधिसभा सदस्य पनि रहेका छन् ।

कांग्रेस नेता शेखर कोइरालाले उद्घाटन गरेको सम्मेलन देउवानिकट केन्द्रीय सदस्य दिलमान पाख्रिन, र १४औँ अधिवेशनमा सभापतिमा पराजित तथा नीकलकण्ठ नगरपालिकाका प्रमुख भीमप्रसाद ढुंगाना र निवर्तमान सभापति गगन थापानिकट रमेश धमलाको समूहले बहिष्कार गरेको छ ।

सम्मेलनको अघिल्लो दिन उनीहरूले पत्रकार सम्मेलन गरेर पार्टीलाई विधानत: संचालन गर्न पटकपटक आग्रह गर्दा पनि सभापति अधिकारीले स्वेच्छाचारी ढंगबाट पार्टी संचालन गरेकाले बहिष्कार गर्नुपरेको बताएका थिए ।

जिल्ला कार्यसमितिले विधानविपरीत २० प्रतिशतभन्दा बढी सदस्य नियुक्ति गरेको, गर्नुपर्ने काम नगरेको, निवर्तमान सभापति तथा पराजित सभापतिको परामर्श नलिएको, विभागहरू गठन नगरेको आरोप पनि सभापति अधिकारीमाथि लगाएका छन् ।

‘उहाँहरू (देउवा-गगननिकट नेताहरू) को कारण केही पनि छैन । केही कुरा जिल्लामा मिलाउनुपर्नेछ भन्दै शेखर दाइलाई भेट्न पुग्नुभएको थियो । सम्मेलनको अघिल्लो दिन कसरी सम्मेनल रोक्ने ? तिब्बतसँग सिमाना जोडिएको छ । ६ घण्टा हिँडेर थप ५ घण्टा गाडीमा यात्रा गरेर सदर मुकाम आइपुगिन्छ । प्रतिनिधिहरू हिँडेको अवस्थामा कसरी सम्मेलन रोक्ने,’ सभापति अधिकारीनिकट एक नेताले शिलापत्रसँग भने ।

जवाफमा शेखरले उनीहरूलाई सम्मेलनमा आएर आफ्ना कुरा राख्न भनेका थिए । ‘आफ्नै घर हो, सम्मेलनमा आएर कुरा राख्नुस् । संस्थागत पार्टीको कार्यक्रममा कुरा राख्नुस् । असहमति काठमाडौं आएपछि जिल्ला सभापतिसँग राखेर समास्या के हो समाधान गरौंला भन्नुभयो तर उहाँहरूले मान्नुभएन,’ ती नेताले भने ।

सम्मेलनमा प्रमुख अतिथि बनेका शेखरले जनताले पार्टीका लागि काम गरेकोमा खुसी रहेको बताए । ‘धेरै साथीहरूले नआउने भनेर नाम लिनुभयो । राजनीति हो, को आयो को आएन, को बस्यो बसेन, भाषण कसले गरे गरेन, सरोकारको विषय भएन । दूरदराजमा बसेर दु:ख गर्ने साथीहरूको जमात छ । म खुसी छु,’ शेखरले सम्मेलनमा भने ।

जिल्ला सम्मेलन भए पनि भनेजस्तो नभएको धमलाले बताए । जिल्ला तहमा आएका समस्या सभापतिले समाधान गर्नुपर्ने भए पनि सभापतिले काम नगरेको उनले बताए ।

‘आन्तरिक रूपमा सभापतिले मिलाउनुपर्ने कुराहरू धेरै थिए । आन्तरिक व्यवस्थापनमा धेरै चुनौतीहरू बढेको सन्दर्भलाई मिलाएर मात्र अघि बढौँ भन्दा उहाँले गम्भीर रूपमा लिनुभएन । संगठनलाई राम्रो बनाएर लैजानुपर्छ भन्दा सभापतिले सुन्नुभएन,’ धमलाले शिलापत्रसँग भने ।

विधानबमोजिम नभएको कुरा सच्याउने, सँगै प्रतिस्पर्धा गरेका समूहलाई व्यवस्थापन गर्नुपर्नेमा नगरेको र आफ्नै समूहकाे पनि व्यवस्थापन नभएको असन्तुष्ट पक्षको आरोप छ ।

‘केन्द्रीय गुटगत प्रभावले यस्तो अवस्था आएको होइन । उहाँ एक्लै सभापति हुनुभएको होइन । निकटतम प्रतिस्पर्धिलाई समेत सँगै लिएर हिँड्नु भएन भने पार्टी कमजोर हुन्छ,’ धमलाले भने, ‘मिलाएर संगठन गर्छु भन्नुभएको थियो, त्यो भएन । पार्टीलाई एक बनाएर लैजानुपर्छ भन्ने कार्यकर्ताको भावनाको सुनुवाइ भएन ।’

महामन्त्री थापानिकट पूर्वक्षेत्रीय सभापति तथा नेविसंघ केन्द्रीय सदस्य कृष्ण रिजालले कार्यकर्तालाई समेत सम्मेलनमा जान रोकेको आरोप छ ।

‘नेताहरूले समन्वय नभएर पछिल्लो परिस्थिति सिर्जना भएको हो । हामी देखिएपछि को कताको भन्न त पाइयो । समन्वय गर्नुपर्ने जिम्मा त सभापतिको हो नि । उहाँलाई भोट हालेर नजिते बर्बाद हुन्छ भन्नेहरू किन विरोधमा लागे बुझ्न पर्‍याे नि । कार्यकर्ता जानबाट रोकिएको भए सम्मेलनमा मास कहाँबाट हुन्थे,’ रिजालले शिलापत्रसँग भने ।

सम्मेलनमा केही साथीहरूको उपस्थित नभएको जिल्ला सभापति अधिकारीले बताए । आफूलाई लगाइएको आरोप बनावटी मात्र रहेको उनले बताए ।

‘बनावटी आरोप मात्र हो । कात्तिक १५ गते जिल्ला कार्यसमितिले सबै कार्यपत्र, सभापतिको राजनीतिक प्रतिवेदन, सचिवको सांगठनिक प्रतिवेदन, कोषध्यक्षको आयव्यव विवरण पास गरेको थियो । १७ गते सम्मेलन स्थगित गर्नुपर्छ भनेर बेलुका ६ बजे भन्नुभयो मैले मानिनँ । बिगार भनेको त्यही हो,’ सभापति अधिकारीले भने ।

एक महिना पर सार्न भनेको सम्मेलन तोकिएको मितिमा गरिएकाले विवाद बनाउन खोजिएको अधिकारीले बताए । जिल्ला कार्यसमितिले एक भएर निर्णय गरेको उनले बताए ।

‘सभापतिलाई असफल बनाउन उहाँहरूले कदम चाल्नुभएको हो । व्यवस्थापनको कुरामा केन्द्रीय राजनीति हेर्ने हो भने सबैलाई न्याय गरेको छु । धादिङमा म पाँचपटक सभापति भएको व्यक्तिले सबैलाई व्यवस्थापन नगरी सम्मेलन सुरु गर्‍याे होला ? साथीहरू आफैँ डराएर भाग्नुभएको हो,’ जिल्ला सभापति अधिकारीले भने ।

कांग्रेसले जागरण अभियानमा केन्द्रीय प्रतिनिधि खटाएको थियो । केन्द्रीय प्रतिनिधि रामचन्द्र खड्काको उपस्थितिमा भदौ १९ गते जिल्ला सम्मेलन गर्ने भनेर साउन २० गते निर्णय भएको थियो । वर्षाको कारणले जिल्ला सम्मेलन सारियो ।

असोज १७ गतेको जिल्ला कार्यसमितिको बैठकले कात्तिकमा सम्मेलन गर्ने निर्णय गरेको थियो । ढुंगानाको कात्तिक २२ गतेदेखि वैदेशिक भ्रमण भएकाले १८ गते गर्ने प्रस्ताव उनैले गरेका थिए । गुटको प्रभावले सम्मेलनमा विवाद भएको जिल्लाका नेताको बुझाइ छ ।

जिल्ला कार्यसमितिमा पछि ४ जना थप गरिएको थियो । विधान बमोजिम २ जना मात्र थप्न मिल्नेमा आन्तरिक सहमति गरेर ४ जना थपिएको थियो । ती सदस्यहरू ढुंगाना समूहका व्यक्तिहरू हुन् । दीपक कोइराला, बद्री अर्याल, शान्ता बानियाँ, श्याम सुवेदी नियुक्त भएर कार्यमिति बैठकमा समेत सहभागी भैसकेका थिए ।

धादिङबेँसीको कभर्डहल परिसरमा भएको सम्मेलनमा २ हजार २०७ जना क्षेत्रीय प्रतिनिधिहरूकाे सहभागिता रहेको थियो ।

प्रकाशित मिति: बुधबार, कात्तिक २२, २०८० १६:१३