'घाइते बाघ' ग्लेन म्याक्सवेलले अफगानिस्तानविरुद्ध कसरी पल्टाए बाजी ?

A+ A A-

चमत्कारहरू दुर्लभ हुन्छन् बल र बुद्धिका साथ क्षमता देखाउने खेलकुदको क्षेत्रमा त झनै कम । तर चमत्कारमा विश्वास गर्नेहरूले मुम्बईको वानखेडे स्टेडियममा मंगलबार ग्लेन म्याक्सवेल रूप देखे । एउटा खेलाडीले आफ्नाे साहसले कतिसम्म गर्नसक्छ भन्ने कुरा म्याक्सवेलको इनिङ्सले देखाएको छ ।

म्याक्सवेलले अन्तिम चार बलमा दुई छक्का, त्यसपछि एक चौका र त्यसपछि छक्का प्रहार गरे । आफ्नो खुट्टामा उभिन नसक्ने अवस्थामा उनले यी शटहरू हिर्काएका थिए । उनी न त दौड्न सक्ने अवस्थामा थिए न त बल खेल्दा उनको खुट्टामा कुनै हलचल नै थियो ।

क्रिजमा उभिएर म्याक्सवेलले इतिहास रचे । खेलमा उनले दोहोरो शतक बनाए । जसमा उनले अन्तिम सय रन लगभग बिना दौड, पीडासँग संघर्ष गर्दै पूरा गरे । म्याक्सवेलले यस इनिङ्समा अष्ट्रेलियालाई हारबाट जोगाएनन् मात्रै, १ सय २८ बलमा २ सय १ रनको अविजित इनिङ खेलेर इतिहास लेखे ।

यस इनिङ्समा उनले पहिलो सय रनमा १० चौका र तीन छक्का प्रहार गरेका थिए । त्यसपछिको १ सय १ रनका लागि म्याक्सवेलले सात छक्का र ११ चौका प्रहार गरे । यस अवधिमा उनले अफगानिस्तानका फास्ट बलर र स्पिन बलरमाथि आक्रमण मात्र गरेनन्, दु:ख र असहजताको क्षणलाई पनि आफूमाथि हाबी हुन दिएनन् ।

क्रिकेट जगतमा म्याड म्याक्सी भनेर चिनिने ग्लेन म्याक्सवेलले आफू प्रतिभाशाली मात्र नभएर क्रिकेटकाे पागलपनको विशेषता पनि आफूमा रहेकाे देखाए । वास्तवमा, सानै उमेरमा आफ्नो प्रतिभाका कारण अष्ट्रेलियाको क्रिकेटमा चम्किएका ग्लेन म्याक्सवेलले अन्तर्राष्ट्रिय क्रिकेटमा त्यति सफलता पाउन सकेनन् । तर समय–समयमा आफ्नो चमक देखाउँदै आएका कारण उनी १० वर्ष अष्ट्रेलियाको एकदिवसीय टोलीमा रहे ।

क्रिकेट जगतले उनीबाट जुन किसिमको ब्याटिङको अपेक्षा गर्छ, त्यसका सबै रङ उनले वानखेडे स्टेडियममा सुन्दर ढंगले देखाए । २ सय १ रनको अपराजित पारी विश्व क्रिकेटमा छैटौँ वा त्याेभन्दा तलको वरियतामा रहेका ब्याट्सम्यानका लागि अहिलेसम्मकै उच्च स्कोर हो ।

म्याक्सवेलकाे रेकर्ड

ग्लेन म्याक्सवेल एकदिवसीय क्रिकेटमा ओपनिङ नगरी दोहोरो शतक बनाउने पहिलो ब्याट्सम्यान बनेका छन् ।अहिलेसम्म एकदिवसीय क्रिकेटमा सबै दोहोरो शतक ओपनरको नाममा थियो । यति मात्र होइन, एकदिवसीय क्रिकेटमा अस्ट्रेलियाका ब्याट्सम्यानले दोहोरो शतक बनाएको यो पहिलो पटक हो ।

उनले सबैभन्दा छिटो दोहोरो शतकको कीर्तिमान मात्र दुई बलमा गुमाए, इशान किशनले १ सय २६ बलमा यो उपलब्धि हासिल गरेका छन् । म्याक्सवेलले १ सय २८ बल खेले । यति मात्र होइन, एकदिवसीय क्रिकेटमा रन पछ्याउँदै पूरा गरेको यो पहिलो दोहोरो शतक हो ।

अफगानिस्तानविरुद्धको खेलमा ग्लेन म्याक्सवेल ब्याटिङ गर्न आउँदा अजमातुल्लाहले नवौँ ओभरको पहिलो दुई बलमै दुई विकेट लिएका थिए । यस्तो अवस्थामा म्याक्सवेलमाथि ह्याट्रिक बचाउने दबाब थियो र उनी जोगिए ।

अष्ट्रेलियाले चार विकेट गुमाएर ४९ रन बनाएको थियो र म्याक्सवेलले आफ्नो इनिङ्स यहीँबाट सुरु गरेका थिए । उनी विकेटमै रहँदा अफगानिस्तानको २ सय ९२ रनको जवाफमा अस्ट्रेलियाको स्कोर सात विकेटमा ९२ रन थियो ।

पूरै स्टेडियममा अफगानिस्तानको टोलीलाई बलियो समर्थन थियो । यस्ताे लागिरहेकाे थियाे कि अफगानिस्तानले विश्व क्रिकेटमा फेरि अर्काे उलटफेर गर्नेछ । याे बेला म्याक्सवेल २६ रनमा खेलिरहेका थिए । टोलीका कप्तान प्याट कमिन्स म्याक्सवेल नजिक आए । कमिन्सले एक छेउमा उभिएर हेरिरहँदा म्याक्सवेलले खेल परिवर्तन गर्न थाले ।

यस क्रममा एकपटक स्क्वायर लेगमा र एकपटक मिडअफमा उनको क्याच मिस भएको थियो । तर उनको विश्वास डगमगएन । उनले केही समयमै ७६ बलमा शतक पूरा गरे । अर्को छेउमा कमिन्सले दोहोरो अंक छुन सकेनन् ।

शतकपछि देखियाे असली रूप

म्याक्सवेलको वास्तविक रङ शतकपछि देखिन्थ्याे । उनी तुफानी ब्याट्सम्यानको रूपमा चिनिन्छन् तर दबाबका क्षणहरूमा उनी सधैँ कमजाेर देखिन्छन् । तर याे खेलमा पीडा र कष्ट सहेर पनि उनी अडिग रहे ।

शतकपछि उनले बायाँ खुट्टामा क्र्याम्प महसुस गरे र टिम फिजियो मैदानमा आउनुपर्‍यो । त्यतिबेला अस्ट्रेलियाको टोली जितबाट करिब सय रन टाढा थियो । उनको बायाँ खुट्टाको समस्या पछाडिको समस्यामा परिणत भयो र म्याक्सवेल धेरै पटक मैदानमा सुतेको देखियो ।

एक समय यस्तो आयो जब उनी रन लिने क्रममा मैदानमा मात्रै लडेका थिएनन्, क्रिजमा पुगेपछि उनलाई पीडा भएजस्तो लाग्थ्यो । उनलाई यहाँबाट खुट्टामा उभिन पनि गाह्रो भयो । उनीपछि ब्याटिङ गर्न क्रममा रहेका एडम जाम्पा दुईपटक मैदानमा आए ।

४१ औँ ओभरमा म्याक्सवेललाई स्ट्रेचरमा बाहिर लैजानुपर्छ हाेला भन्ने ठानिएकाे थियाे तर उनी फेरि आफ्नो खुट्टामा उभिए र जाम्पाले पेभेलियनमै पर्खनुपर्‍यो ।

२०१०-११ मा उनले अष्ट्रेलियाको घरेलु क्रिकेटमा १९ बलमा सबैभन्दा छिटो अर्धशतक बनाएर मानिसहरूलाई आकर्षित गरेका थिए र केही समयभित्रै एकदिवसीय टोलीमा स्थान बनाउन सफल भएका थिए ।

सन् २०१५ को विश्वकपमा घरेलु मैदानमा खेलेका उनले श्रीलंकाविरुद्ध मात्र ५१ बलमा शतक बनाए, जुन त्यतिबेला अस्ट्रेलियाका कुनै पनि ब्याट्सम्यानले बनाएको सबैभन्दा छिटो शतक थियो ।

क्रिकेटको प्रारम्भिक वर्षहरूमा उनको एउटै पहिचान थियो, 'यस ब्याट्सम्यानले जुनसुकै बलमा जुनसुकै शट खेल्न सक्छ ।' तर यी अपरंपरागत शट खेल्नु उनको सबैभन्दा ठूलो कमजोरी बनेको थियो र लापरवाहीपूर्वक शट खेल्दा उनी जुनसुकै बेला आउट हुन सक्छन् भन्ने डर पैदा गरिन्थ्याे ।

धेरै खेलमा बेतुकका शट खेलेकोमा उनको खिल्लीसमेत उडाइएको थियो । २०१५ को विश्वकपपछि लगातार एकदिवसीय खेलमा उनको औसत दश भन्दा कमको कारण टोलीबाट निकालिएकाे थियाे । उनको क्रिकेट करियर समाप्त हुने चरणमा थियो तर अस्ट्रेलियाली क्रिकेटले आफ्नो प्रतिभालाई यसरी खेर जान दिँदैन ।

म्याक्सवेलले आफ्ना साथी खेलाडीहरूबाट पनि समर्थन पाए र मानसिक चिकित्सकहरूबाट परामर्श लिए । उनी ६ महिनापछि क्रिकेट मैदानमा फर्किए । तर भित्र र बाहिरको चक्र जारी रह्यो । उनको ब्याटिङ स्ट्राइक रेट १ सय २७ भन्दा बढी भए पनि १ सय ३६ खेलमा उनको ब्याटिङ औसत ३६ पनि छैन ।

एकदिवसीय क्रिकेटमा चार शतक हानेका उनले अहिलेसम्म चार हजार रन पनि पूरा गरेका छैनन् । तर, लिग क्रिकेटमा उनलाई विश्वभरका टोलीले माग गरेका छन् । आईपीएलमा पनि उनी करोडौँ रुपैयाँमा लिलामी हुन्छन्, उनी किंग्स इलाभेन पञ्जाब, मुम्बई इण्डियन्स र रोयल च्यालेन्जर्स बैंगलोरको टोलीको हिस्सा भइसकेका छन् । तर आईपीएलमा उनको कुनै पनि इनिङ्स यादगार बन्न सकेको छैन । म्याक्सवेल यस विश्वकपलाई अविस्मरणीय बनाउने उद्देश्यले खेलिरहेका देखिन्छन् ।

(याे सामग्री बीबीसी हिन्दीकाे सहयाेगमा तयार पारिएकाे हाे ।)

प्रकाशित मिति: बुधबार, कात्तिक २२, २०८० ०८:३०