जाजरकोट भूकम्प : राजनीतिक दलहरू उद्धारदेखि अस्थायी बसोबास बनाउनसम्म सक्रिय

जाजरकोट भूकम्प : राजनीतिक दलहरू उद्धारदेखि अस्थायी बसोबास बनाउनसम्म सक्रिय

A+ A A-

'यता जिल्लामा भूकम्पपीडितहरूको व्यवस्थापनको काममा खट्नुपर्ने भएकाले उपचारकै क्रममा अचानक छोडेर हिँड्नुपर्‍यो । महाराजगञ्जस्थित टिचिङ हस्पिटलमा आज कानको सफल अप्रेसन भएको भन्ने सुनियो । शीघ्र तथा पूर्ण स्वास्थ्यलाभको कामना श्रीमतीजी !'

माथिको कुरा रुकुम पश्चिमका माओवादी केन्द्रका जिल्ला संयोजक सचिन रोकाले शनिबार सामाजिक सञ्जालमा लेखेका थिए ।

उनकी श्रीमतीको कानको अप्रेसन गराउन उनी काठमाडौंमा थिए । तर, शुक्रबार राति ११.४७ मा जाजरकोटमा भूकम्प गयो । उक्त भूकम्पले जाजरकोट र रुकुमपश्चिममा धनजनको क्षति भयो ।

भूकम्म मध्यराति गएकाले त्यही समयमा रुकुम जान सम्भव थिएन । उनी दोस्रो दिनमा नै श्रीमतीलाई उपचारका लागि काठमाडौंको त्रिवि शिक्षण अस्पतालमा छोडेर गृहजिल्ला पुगे र उद्धार राहतमा खटिएका छन् ।

अहिले भूकम्प प्रभावित क्षेत्रहरूमा राजनीतिक दल र तिनका भ्रातृ संगठनहरू उद्धार, प्राथमिक उपचार र राहतमा खटेका छन् । उद्धार र प्राथमिक उपचारको काम लगभग सकिएकाले अब राहत वितरण र अस्थायी बासका लागि काम सुरु भएको छ ।

रोका आज रुकुम पश्चिमको भूकम्प प्रभावित मुसिकोट नगरपालिका राहत वितरण र अस्थायी बसोबासका लागि त्रिपाल टाँग्ने काममा लागेको बताए । उनले भने, ‘आज मुसिकोट नगरपालिकाका ११, १२ र १३ नं वडामा राहत वितरण र त्रिपाल टाँग्ने काममा छु । शनिबारदेखि निरन्तर म र पार्टीका सबै साथीहरू प्रभावित सबै पालिका वडाहरूमा काममा खटेका छौँ ।’

सरकारबाट वितरण भएको राहत जिल्ला प्रशासन कार्यालयमा दर्ता भएर सिधै पालिका पालिकामा पठाएको छ । त्यसको वितरणमा पनि राजनीतिक दलले सहयोग गरेका छन् ।

भूकम्प गएदेखि नै राजनीतिक दलका नेता/कार्यकर्ताहरू उद्धार, खोजकार्य र घाइते, मृतकको व्यवस्थापनकव कार्यमा खटिएका र पार्टीले पनि भूकम्प प्रभावित क्षेत्रमा खट्न निर्देशन दिएको माओवादी केन्द्रका केन्द्रीय सदस्य वसन्त शर्माले बताए । उनले भने, ‘म भूकम्प जाँदा जाजरकोट सदरमुकाम खलंगामा थिएँ । मलगायत सबै साथीहरू रातभरि उद्धार, खोज र प्राथमिक उपचारमा खट्यौँ । अहिले क्षति भएका घरहरूबाट अन्नपात, गाईवस्तु, लुगाकपडा निकाल्ने काम गरिराख्नुभएको छ । पालिकासँगको समन्वयमा राहत वितरणमा पनि खट्नुभएको छ ।’

एमाले जिल्ला कमिटीले जिल्लाभरिका नेता/कार्यकर्ताहरूलाई भूकम्प प्रभावित पालिकामा जनताको काममा खट्न निर्देशन दिएको जाजरकोट जिल्ला कमिटीका अध्यक्ष खिमबहादुर शाहीले बताए । उनले भने, ‘अस्तिसम्म उद्धार, खोजमा खटेका थियौँ । अब भत्केका घरहरूबाट सामान निकाल्ने, वस्तुभाउ निकाल्ने । पूर्ण क्षति भएका, आंशिक क्षति भएका घरहरूको डाटा संकलन गरे राख्ने काममा खटेका छौँ । पालिकासँग समन्वय गरेर राहत वितरणमा लागेका छौँ । भूकम्प प्रभावित पालिकाहरूमा अरु ठाउँबाट नेता/कार्यकर्ताहरू आएर खट्नुभएको छ ।’

एमालेनिकट अनेरास्ववियुका उपाध्यक्ष नारायण घर्ती शनिबारदेखि जाजरकोटको भूकम्प प्रभावित क्षेत्रमा उद्धार, प्राथमिक उपचार, राहत वितरणमा खटेका छन् । स्थानीय तह, जिल्ला प्रशासनसँग समन्वय गरेर अनेरास्ववियु खटिरहेको उपाध्यक्ष घर्तीले बताए । उनले भने, ‘हाम्रो संगठनले पहिलो चरणको उद्धार र उपचारको काममा सहयोग गर्‍यो । अहिले भत्केका घरबाट खाद्य, लुगाकपडा निकाल्ने र स्थानीय साधन स्रोत प्रयोग गरेर अस्थायी टहरा बनाउन सुरु गरेका छौँ । राहत वितरणमा पनि पालिकालाई सहयोग गरिरहेका छौँ ।’

माओवादी केन्द्रको जाजरकोट जिल्ला पार्टीले पनि आफ्ना नेता/कार्यकर्ताहरूलाई भूकम्प प्रभावित क्षेत्रमा खटाएको छ । ‘शुक्रबार भूकम्प गयो । त्यही समयदेखि सबै उद्धार राहतमा खटेका छौँ । हाम्रो पार्टी, भ्रातृ संगठनहरू दिनरात प्रभावित गाउँगाउँमा जनताको सहयोगमा खट्नुभएको छ । अब अस्थायी टहरा बनाउने तयारीमा छौँ । आजसम्म त्रिपाल टाँग्ने, राहतका सामग्री वितरणमा पालिका र वडासँग समन्वय गर्दै काममा खटिरहेका छौँ । यो काम पुनर्निर्माणसम्म चल्नेछ ।’

जाजरकोटमा कांग्रेसले आफ्ना नेता/कार्यकर्ताहरूलाई भूकम्प गएको दिनदेखि नै जनताको काममा खटाएको जिल्ला समन्वय समिति सदस्य चित्रप्रसाद शर्माले बताए । उनले भने, ‘सुरुमा उद्धार, उपचारमा सहयोग गर्‍यौँ । अहिले भत्केका घरबाट सरसामान निकाल्ने काम भइरहेको छ । पुरिएका वस्तुहरू निकालेर महामारी नफैलियोस् भनेर व्यवस्थापनमा लागेका छौँ । पालिकासँग मिलेर राहत वितरणमा पनि खटेका छौँ । पुनर्निर्माणसम्म सबै नेता/कार्यकर्ताहरू लाग्न पार्टीले निर्देशन दिएको छ ।’

अहिले घर भत्केर मानिसहरू भित्र बस्ने अवस्था छैन । सबैको बास बाहिर नै छ । अहिले टेन्ट लगाउने, आएको राहत पालिका र वडासँग समन्वय गरेर जनताको घरघरमा टाँगिदिने, मृतकका परिवारलाई सान्त्वना दिने, सुरक्षित तरिकाले बस्नुपर्छ भनेर सम्झाउने बुझाउने काम आठबिसकोट नगर कमिटीले गरिरहेको माओवादी केन्द्रका नगर अध्यक्ष मानबहादुर चँदाराले बताए । उनले भने, ‘पहिलो चरणको काम सकिएको छ । अब राहत वितरण, अस्थायी बसोबास टेन्ट लगाउने भत्केका घरबाट सामानहरू निकाल्ने काम गरिरहेका छौँ । हाम्रो पालिकामा चारवटा टोली बनाएर हरेक वडावडामा खटेका छौँ ।’

भूकम्पपछि कुनै राजनीतिक दल नभनेर सबै स्थानीयहरू उद्धार, उपचार, राहत वितरण, घरमा पुरिएका सामान निकाल्ने, टेन्ट टाँग्ने, प्रभावितहरूसँग हरेक दुःखमा खटेर लागेका सानीभेरी गाउँपालिका उपाध्यक्ष कमला रोका पुनले बताइन् । उनले भनिन्, ‘भूकम्पदेखि अहिलेसम्म यहाँ कुनै राजनीतिक दल, तेरोमेरो भन्ने छैन । सक्ने जति र घाइते नभएका सबै उद्धारमा, राहत वितरणमा र आजबाट अस्थायी बास बनाउने मिल्ने ठाउँ बास बनाउन थाल्नुभएको छ । पालिकाभरि सबैको सहयोग छ । को कताका भन्ने केही छैन ।’

जाजरकोट भेरी नगरपालिका मेयर सीपी घर्तीले हिजोसम्म सबैले सहयोग गरेर सहज भएको तर आजबाट सबै राजनीतिक दलहरूले मानवीयता बिर्सेर राजनीति गरेको गुनासो गरे । उनले भने, ‘अब पालिकामा राजनीतिक दलका कारण समस्या उत्पन्न भयो । पालिकाले क्षति भएकाको वर्गीकरण गरेको छ । तर, यहाँ दलहरूले आ–आफ्ना मानिसलाई राहत वितरण गर्दा समस्या आयो । आजबाट राजनीतिक दलहरूले खुल्ला रुपमै राजनीति गर्न थाले, यो हाम्रो नगरपालिकाका लागि दुर्भाग्य हो । यो तुरुन्त रोक्नुपर्छ ।’

राजनीतिक दलहरूको सहयोग र समन्वयमा बारेकोट गाउँपालिकाले भूकम्प प्रभावित जनताको काम गरिरहेको गाउँपालिका अध्यक्ष वीरबहादुर गिरीले बताए । उनले भने, ‘सबै राजनीतिक दलहरूको समन्वय र सहयोगमा सुरुदेखि नै काम भइरहेको छ । उहाँहरूले सहयोग गर्दा नै हामीलाई काम गर्न सहज भएको छ । नत्र यस्तो प्राकृतिक प्रकोपमा एक्लै स्थानीय सरकारले के गर्न सक्छ । उद्धार, उपचार, खोज कार्य र राहत वितरणमा सहयोग गरिराख्नुभएको छ ।’

हिजोसम्म सबैले सहयोग गर्दा सहज भएको भए पनि अब राजनीतिक दल र तिनका भ्रातृ संगठनहरू राजनीतिक प्रतिनिधित्वसहित राहत वितरण र अन्य काममा सहगोग गरिरहेको पालिकाका प्रतिनिधिहरू बताउँछन् ।

प्रकाशित मिति: मंगलबार, कात्तिक २१, २०८० १९:०६