भूकम्पमा बाँचेकी जेनिसा, जसले बुवालाई आफूहरू घर भत्किँदा च्यापिएको खबर गरिन् (भिडियो)

भूकम्पमा बाँचेकी जेनिसा, जसले बुवालाई आफूहरू घर भत्किँदा च्यापिएको खबर गरिन् (भिडियो)

A+ A A-

१७ कत्तिकको मध्यरात जाजरकोट मस्त निन्द्रामा थियो । जाजरकोटको भेरी नगरपालिका–१, रिम्ना पाखाकी सात वर्षीया जेनिसा बुढा, उनकी दिदी र तीन जना साथीहरूसँगै बसेर फिलिम हेर्दै थिए । मध्यरात ११ बजेर ४७ मिनेटको समयमा एक्कासी सातो लिने गरी कम्पन आयो ।

विनाशकारी भूकम्प जेनिसाले आफ्नी बज्यै र फूपूलाई गुमाइन् भने आमा र बहिनी गम्भीर घाइते भए । ‘हामी फिलिम हेर्दै थियौँ, सिटी बजाएको जस्तै भएको थियो । हलङ हलङ गर्‍यो, त्यो आफैँ गड्याङ गुडुङ आइगो, ममी भित्र खाटबाट उठेर आइगिन ममीलाई चोट लागेछ,’ जेनिसाले भनिन्, ‘त्यसपछि हामी त्यही चेपिएका थियौँ, फोन गरेर अंकललाई डाके ।’ नजिकै अर्को घरमा रहेका उनका अंकल आएर उनीसँगै उनकी आमा, दिदी, बहिनी र तीन जना साथीलाई उद्दार गरेपछि उनीहरूको ज्यान बच्यो ।

त्यसपछि जेनिसाले रोजगारीको सिलसिलामा विदेशमा रहेका बुवालाई फोन गरिन् । जेनिसाले म्यासेन्जर कलमा बुवालाई आफूहरू भूकम्पले घर भत्किँदा च्यापिएको खबर गरिन् । तर, नेटवर्कले राम्रोसँग काम नगरेपछि बुझिने गरी कुरा भने हुन नसकेको उनले बताइन् ।

भूकम्पले घर भत्किएर च्यापिएका आफूहरूलाई अंकललगायत छिमेकीले उद्धार गरेको उनले बताइन् । घरको अर्को कोठामा उनकी फूपू र बज्यै सुतेका थिए । तर, उनीहरुको घरले च्यापेर मृत्यु भयो । आमा कुञ्जन पुन र उनीकी बहिनी गम्भीर घाइते भए । ‘फूपू र बई बित्नु भयो, घाइते हाम्री ममी र नानी मात्रै । ममीको टाउकोमा थोरै चोट लागेको छ, हात र खुट्टा भाचिएको छ,’ जेनिसाले भनिन् । उनका तीन बहिनी छन् । जेनिसा र उनकी दिदीलाई भने केही नभएको उनले बताइन् ।

जेनिसा उनकी दिदी अहिले मामा घरको आश्रयमा छिन् । उनकी आमा र बहिनीको भेरी अस्पताल नेपालगन्जमा उपचार भइरहेको छ । जेनिसाको घर पूर्ण रूपमा ध्वस्त भएको छ । उनका मामाको घरमा पनि भूकम्पले पूर्ण क्षति पु¥याएको छ । उनीहरू अहिले पालमा बसेका छन् ।

सोमबार अपराह्न ४ बजेर ३१ मिनेटमा पुनः जाजरकोटको रामीडाँडालाई केन्द्रविन्दु बनाएर गएको भूकम्पको पराकम्पबाट जेनिसाका बाजे हर्कविर मगर त्रसित छन् । घरभित्र रहेका कुनै पनि सामग्रीहरू निकाल्न नपाएको भन्दै खुला आकाशमा रात बिताउनु पर्दा असहज भएको उनको दुखेको छ । शुक्रबार जाजरकोटको बारेकोट गाउँपालिका–१, रामीडाँडालाई नै केन्द्रविन्दु बनाएर गएको ६.४ रेक्टर स्केलको भूकम्पले १५३ जनाको ज्यान लिएको छ ।

सयौँले परिवारसँगै बस्ने बास गुमाएका छन् । उक्त विनाशकारी भूकम्पमा परी ज्यान गुमाउनेमा बालबालिका धेरै परेका छन् । प्रहरीले उपलब्ध गराएको तथ्यांकमा जाजरकोटमा ५० जना बालबालिकाले ज्यान गुमाएका छन् भने रुकुम पश्चिममा ३२ जना गरी ८२ जनाले ज्यान गुमाएका छन् ।

प्रकाशित मिति: मंगलबार, कात्तिक २१, २०८० १३:३८