जाजरकोटमा भूकम्पपीडितको सास्ती, विपद् व्यवस्थापनका हाकिमको जापानमा मस्ती

जाजरकोटमा भूकम्पपीडितको सास्ती, विपद् व्यवस्थापनका हाकिमको जापानमा मस्ती

A+ A A-

शुक्रबार राति ११ बजेर ४७ मिनेटमा जाजरकोटको रामीडाँडामा भूकम्प जाँदै गर्दा राष्ट्रिय विपद जोखिम न्यूनीकरण तथा व्यवस्थापन प्राधिकरणका कार्यकारी प्रमुख अनिल पोखरेल जापानको उडानमा थिए ।

भूकम्पसम्बन्धी कार्यक्रममा सहभागी हुने तथा अध्ययन गर्नका लागि पोखरेल साढे ११ बजेको उडानमा जापानमा लागेका थिए । कार्यकारी प्रमुख पोखरेल जापान ओर्लिन नपाउँदै उनलाई भूकम्प आएको खबर पाइएसकेका थिए ।

५ दिनका लागि जापान उडेका पोखरेल तिहारअघि नेपाल फर्किने संभावना कम रहेको छ । मुलुक विपदमा परेका बेला त्यही विपदमा काम गर्ने निकायका प्रमुख भने विदेशमा मस्ती गरिरहेका छन् ।

जाजरकोट र रुकुम पश्चिमका नागरिक भूकम्पको विपद्ले सास्ती भोगिरहेका बेला विपद् व्यवस्थापनको जिम्मा पाएको निकायका प्रमुख विदेशमा मस्ती गरिरहेका छन् । उनी यो विपद्का बेला नेपाल आउन चाहिरहेका छैनन् ।

विपद् आएको ४ दिन बितिसक्दा पनि गृह मन्त्रालयले पनि उनलाई नेपाल फर्काउन कुनै पहल गरेको छैन । गृह मन्त्रालय स्रोतका अनुसार पोखरेल गृह र प्राधिकरणका अधिकारीसँग पनि खासै समन्वयमा रहेका छैनन् ।

प्राधिकरण स्रोतले दिएको जानकारीअनुसार पोखरेल तिहारअघि कार्यालयमा आउने छैनन् । स्रोतले भन्यो, ‘उहाँ ५ दिनका लागि बिदामा जानुभएको हो, खै अब तिहार बिदा पनि हुन लाग्यो, उहाँ तिहारअघि कार्यालय आउनुहुन्न होला ।’

यस्तो विपद्को बेला भ्रमण समय छोट्याएर फर्किनुपर्ने सामान्य नैतिकता पनि देखाएका छैनन् र गृह मन्त्रालयले उनलाई उक्त नैतिकता देखाउन आग्रह पनि गरेको छैन । अहिले प्राधिकरणका कर्मचारी प्रमुखबिना नै विपद् व्यवस्थापनको कार्यमा सक्रिय भइरहेका छन् ।

प्राधिकारीका सूचना अधिकारी धुव्रबहादुर खड्काले शिलापत्रलाई दिएको जानकारीअनुसार पोखरेल जापानमा भए पनि प्राधिकरण विपद् व्यवस्थापनमा जिम्मेवारीअनुसार काम भइरहेको छ । शिलापत्रसँग खड्काले भने, ‘उहाँ ५ दिनका लागि जापान जानुभएको हो, सरोकारवालासँग समन्वय गरिरहनुभएको होला, हामी आफ्नो जिम्मेवारीअनुसार काम गरिरहेका छौँ ।’

प्राधिकरणका अधिकारीहरूका अनुसार भूकम्प तथा सुनामी विपद् व्यवस्थापनसँग सम्बन्धित विषयमा आयोजित अन्तर्क्रियामा सहभागी हुन उनी जापान गएका हुन् ।

खासमा पोखरेल नेपालमा मुख्य विपद्का बेलामा अधिकांश समय विदेशमा रहेन गरेका छन् । गत वर्ष डोटीमा भूकम्प गएको बेला पनि पोखरेल विदेशमै थिए । त्यतिबेला पनि उनी उतै बसेर समय कटाएका थिए । २३ कात्तिक ०७९ मा डाेटीमा आएकाे ६‍‍.६ रेक्टर स्केलकाे भूकम्पमा ६ जनाकाे निधन भएकाे थियाे । त्यतिबेला पाेखरेल एक कार्यक्रममा भाग लिन मेक्सिकाे पुगेका थिए । उक्त समयमा पनि उनी भ्रमण छाेट्याएर नेपाल आएका थिएनन् ।

उनीमाथि लामो समयदेखि प्राधिकरणका कर्मचारीले प्रश्न उठाइरहेका छन् । तर, राजनीतिक पहुँच बलियो बनाएकै कारण पोखरेल बच्दै आएका छन् । प्राधिकरणका अधिकांश काम परामर्शदाताका नाममा आफन्तलाई दिने गरेका छन् । सोहीकारण प्राधिकरणका कर्मचारी रुष्ट हुने गरेका छन् ।

हरेक गृहमन्त्रीका आफन्तलाई प्राधिकरणलाई जागिर र काम दिएर हात लिने गरेका छन् । हरेक महिनाजसो विदेश भ्रमणमा जाने गरेका पोखरेललाई अहिलेका गृहमन्त्री नारायणकाजी श्रेष्ठले पनि लगाम लगाउन सकेका छैनन् । उल्टै मन्त्री श्रेष्ठसँग विदेश भ्रमणमा गइरहेका हुन्छन् । पाेखरेल गृहमन्त्री श्रेष्ठसँगै असाेजमा चीन भ्रमणमा गएका थिए ।

प्रकाशित मिति: सोमबार, कात्तिक २०, २०८० २१:३६