जाजरकोट भूकम्पमा भाग्यले बाँचेकाहरूको पीडा- अन्न सबै पुरियो, के खाएर बाँच्ने ?

जाजरकोट भूकम्पमा भाग्यले बाँचेकाहरूको पीडा- अन्न सबै पुरियो, के खाएर बाँच्ने ?

A+ A A-

जाजरकोटको बारेकोट गाउँपालिका– १, रामीडाँडा केन्द्रविन्दु भएर शुक्रबार ११ बजेर ४७ मिनेटमा ६ दशमलव ४ म्याग्निच्युटको भूकम्पमा परी जाजरकोट र रुकुम पश्चिममा १५३ जनाले ज्यान गुमाए, सयौँ घरहरू ढले, ठूलो संख्यामा मानिसहरू घाइते भए । त्यो कठिन परिस्थितिका बाबजुद आफूलाई बचाउन सफल भएका सयौँले घरसँगै परिवार गुमाएका छन् ।

उक्त विनाशकारी भूकम्पबाट पीडित बनेकाहरू समस्यामा पर्न थालेका छन् । ‘भूकम्पले घर ध्वस्त भएको छ, घरसँगै भएको सबै अन्न पुरियो, के खाने ? कहाँ बस्ने ? भाँडाकुँडा पनि सबै घरसँगै पुरिए, पाल हालेर बसेका छौँ, जाडोको समय छ, के गरी बस्ने हो, लुगा किन्ने पैसा छैन, गोठमा भएका हल गोरु, बाख्रा, कुखुरा पनि मरे,' भेरी नगरपालिका– १, जाजरकोटकी शिवा बादीले भूकम्पबाट आफू बाँच्दाको क्षण र व्यहोर्नुपरेको क्षतिका बारेमा विक्षिप्त हुँदै शिलापत्रसँग भनिन् ।

भूकम्प आउँदा आफू झ्यालबाट हाम फालेर बाँच्न सफल भएको उनले बताइन् । ‘कान्छो छोरो मोबाइल चलाएर बसेको रहेछ, हामी सबै सुतिसकेका थियौँ, भूकम्प आयो घर हल्लियो, भत्किन सुरु भयो, त्यसै बेला ब्युझियौँ, गाउँभरि होहल्ला थियो, झ्यालबाट हाम फालेर बाँच्न सफल भएँ । कान्छो छोरालाई चोट लाग्यो ।’

शिवालाई भए भरको अन्न, लत्ता कपडा घरसँगै पुरिएपछि कसरी परिवार पाल्ने भन्ने चिन्ताले सताएको छ । भूकम्पले घर भत्काएको दुई दिनसम्म पनि उनको परिवार ओभानो छानोभित्र बस्न पाएको छैन । भेरी नगरपालिका– १, रावत गाउँकै केशरी विक पनि खुल्ला आकाशमुनि रात कटाउन बाध्य छिन् । जसोतसो ज्यान जोगाउन सफल केशरीको पनि भूकम्पका कारण घर र शौचालय ढलेका छन्, अन्न तथा कपडाहरू पुरिएका छन् । केशरीलाई पनि दैनिकी कसरी गुजार्ने भन्ने चिन्ताले सताएको छ ।

यस्तै, सोही गाउँका चञ्चल रावतको घरमा पनि क्षति पुगेको छ । केही समयअघि चट्याङ परेर जोगिएको घर भूकम्पले तहसनहस बनाएपछि चञ्चलको परिवार पनि खुला आकाशमुनि बस्न बाध्य छ । भूकम्पबाट चञ्चलको चार जनाको परिवार बाँच्न सफल भयो । तर, घरभित्र रहेको खाद्यान्न, सामान तथा लत्ताकपडाहरू सबै पुरिए ।

‘भित्र बस्ने ठाउँ छैन, पहिला चट्याङ परेर क्षति गरेको घर अहिले भूकम्पले पूरै ध्वस्त बनाइदियो, भाग्य भनौँ वा भगवान्‌को कृपाले परिवारका सदस्यहरूचाहिँ बाँच्न सफल भयौँ । विपद्ले बेला–बेला झस्काइरहेको हामीलाई फेरि के हुने हो, पत्तो छैन । त्रास उत्तिकै छ, खुल्ला आकाशमुनि पाल टाँगेर चिसोमा बसेका छौँ,’ उनले भने ।

सरकारले हालसम्म कुनै प्रकारको राहत उपलब्ध नगराएको उनको दुखेसो छ । भूकम्प गएको तीन दिन पुग्न लाग्दासमेत यहाँका स्थानीयले सरकारी तवरबाट कुनै राहत पाउन नसकेको गुनासो छ । साना बालबालिकासहित खुला आकाशमुनिको चिसो बासले थप समस्या निम्त्याएको छ । प्रारम्भिक चरणमा सरकारले आफूहरूलाई पाल टाँगेरै भए पनि सुरक्षित बासको व्यवस्थापन गर्नुपर्ने माग उनीहरूको छ ।

सरकारले भूकम्पपीडितहरूलाई राहत वितरण गर्न तय गरेको एकद्वार प्रणालीले पीडितहरूले समयमै राहत पाउन नसकेको भूकम्पको केन्द्र रहेको बारेकोट गाउँपालिकाका अध्यक्ष वीरबहादुर गिरीले बताए । ‘एकद्वार प्रणालीले हामीलाई निकै पीडा दिएको छ, पीडित त्रिपाल, कम्बल, खाद्यान्न नपाएर तड्पिइराखेका छन्,’ अध्यक्ष गिरीले भने, ‘सदरमुकाममा सीडीओले सबै कुरा होल्ड गरेर बसेका छन् । एकद्वार प्रणालीका नाममा राहत पुग्नैपर्ने ठाउँमा पुग्न नदिने काम भरहेको छ, एकद्वार प्रणालीको नाममा सहज राहत वितरणको बाटो नै बन्द गरिएको छ, यसले थप समस्या भएको छ ।’

भूकम्पपीडितहरूले राहत नपाएको गुनासो गरिरहँदा जाजरकोटका प्रमुख जिल्ला अधिकारी सुरेश सुनारले राहत वितरणमा कुनै समस्या नरहेको बताए । ‘एकद्वार प्रणालीबाट राहत वितरण भइरहेको छ, हामीसँग उपलब्ध राहत सामग्रीहरू सबै ठाउँमा समान वितरण गरिरहेका छौँ,’ उनले भने, ‘बाहिर जसरी राहत नै वितरण भएको छैन भन्ने कुरा छ, त्यसमा सत्यता छैन ।’

प्रकाशित मिति: सोमबार, कात्तिक २०, २०८० १६:२२