विनाशकारी भूकम्प : प्रधानमन्त्री प्रचण्डले देखाएको तदारुकता

A+ A A-

प्रधानमन्त्री पुष्पकमल दाहाल प्रचण्ड स्वास्थ्यकर्मीसहित एका बिहानै भूकम्प प्रभावित रुकुम पश्चिम र जाजरकोट पुगे ।भूकम्प प्रभावित जिल्ला पुगेर मात्र फर्केनन्, दुवै जिल्लाका अस्पतालमा गएर घाइतेहरूलाई सरकार उनीहरूको साथमा रहेको बताए ।

दुःखमा परेका सर्वसाधारणका अगाडि प्रधानमन्त्री आफैँ पुगेर सान्त्वाना दिँदा पक्कै पीडितहरूको मनमा केही राहत महसुस भयो । यद्यपि कतिपयले प्रधानमन्त्री आफैँ नगएर उद्धार तथा राहतमा केन्द्रित हुनुपर्थ्यो भन्दै प्रचण्डको यो यात्राको आलोचना पनि गरेका छन् ।

जाजारकोट भूकम्प प्रभावितहरूको राहत तथा उद्धारमा सरकारले सकेसम्मको छिटो रेस्पोन्स गरेको देखिएको छ । प्रधानमन्त्री प्रचण्डको आफ्नै सक्रियताले पनि यो सम्भव भएको हो । भूकम्प गएको करिब १९ घण्टापछि रुकुम पश्चिमको सबैभन्दा प्रभावित आठबीसकोटमा पहिलो चरणको उद्धार कार्य सम्पन्न भइसकेको छ ।

सरकारले खोज, उद्धार र उपचारलाई व्यवस्थित गरिरहेको बताउँदै प्रधानमन्त्री प्रचण्डले नआत्तिन घाइते र प्रभावितलाई आग्रह गरे । ‘भूकम्पले गरेको क्षतिप्रति हामी दुःखी छौं । सरकारले तपाईंहरूका लागि उद्धार, राहात र अन्य विभिन्न कार्यक्रम गर्ने छ । तपाईंहरू नआत्तिनु होला,’ उनले भने ।

भूकम्प गएको थाहा पाउने वित्तिकै उद्धारको काममा कुनै कसर बाँकी नराख्ने योजनाका साथ सरकार लागि परेको उनले बताए ।

गएराति ११ बजेर ४७ मिनेटमा जाजरकोटको बारेकोट गाउँपालिका–१, रामीडाँडा केन्द्रविन्दु भएर ६.४ म्याग्निच्युडको विनाशकारी भूकम्प जाँदा जाजरकोट र रुकुम पश्चिममा ठूलो मानवीय र भौतिक क्षति भएको छ ।

भूकम्प राति गएकाले तत्काल काठमाडौंबाट भूकम्प प्रभावित क्षेत्रमा जान सम्भव थिएन । तर बिहान ५ बजे नै प्रधानमन्त्री प्रचण्डले जाजरकोट र रुकुम पश्चिममा भूकम्पमा परी घाइते भएकाको उद्धार र राहतमा खटिनको लागि तीनवटै सुरक्षा निकायलाई निर्देशन दिए ।

करिब सात बजेतिर प्रधानमन्त्री आफूसहित नेपाली सेनाको १६ जनाको मेडिकल टिम लिएर प्रभावित जिल्लामा पुगे । प्रधानमन्त्री प्रचण्डले विभिन्न अस्पताल पुगेर पीडितरहरूलाई भेटेर स्वास्थ्य अवस्थाको बारेमा जानकारी लिए ।

प्रधानमन्त्रीले आफू नेपालगन्ज फर्किँदा हेलिकोप्टरमा आफूसँगै ७ जना घाइते र ७ जना कुरुवालाई उद्धार गरेर नेपालगन्ज मेडिकल अस्पतालमा ल्याए । जाजरकोटबाट रुकुम आउँदा पनि प्रचण्ड चढेको हेलिकोप्टरमा जाजरकोटका घाइतेलाई चौरजहारी अस्पतालमा ल्याइएको थियो ।

भूकम्प प्रभावित दुवै जिल्लामा उद्धारका लागि सरकारले बिहानैदेखि सेनाको हेलिकोप्टर र स्काइ ट्रक परिचालन गरेको थियो । स्वास्थ्यकर्मीहरूको टोली पठाउन पनि ढिला गरेन ।

प्रधानमन्त्रीसँगै ऊर्जामन्त्री शक्ति बस्नेत र नेता जनार्दन शर्मा पनि जारजरकोट र रुकुम पश्चिका भूकम्प प्रभावित क्षेत्रमा पुगेका छन् । उनीहरू दुवै जना भूकम्प प्रभावित जिल्लाबाट निर्वाचित सांसद पनि हुन् ।

रुकुम पश्चिम र जाजरकोटका भूकम्प प्रभावितहरूको राहत तथा उद्धारका लागि सहज होस् भनेर सरकारले नेपाल एयरलाइन्सलाई रुकुम पश्चिमको चौरजहारीलाई केन्द्रित गरेर हवाई उडान गर्न लगायो । अन्य एयरलाइन्सहरूलाई तयारी अवस्थामा राख्यो ।

रुकुम पश्चिमको चौरजहारी र खलंगामा विमानस्थल छन् । तर जाजरकोटमा भएको विमानस्थल पनि सञ्चाललनमा छैन । रुकुमका विमानस्थलहरूमा साना ट्वीनअटर हवाई जहाज मात्र उडान हुने गरेका छन् ।

सशस्त्र प्रहरी बलको अस्पताल र वीर अस्पतालबाट स्वास्थ्यकर्मीको टोली पश्चिम रुकुम र जाजरकोटमा बिहानबाटै उपचारमा खट्यो । सशस्त्र प्रहरी बलको अस्पतालबाट ८ जना र वीर अस्पतालबाट ६ जना गरेर १४ जना स्वास्थ्यकर्मीको टोली नेपाली सेनाको स्काई ट्रकमार्फत प्रभावित जिल्लामा बिहानै पुगेका थिए ।

सरकारले दाङबाट विपद् उद्धारका लागि डीआरएस (डिजास्टर रेस्पोन्स सिस्टम) को कन्टेनर पश्चिम रुकुमतर्फ पठायो । त्यस्तै, सुर्खेतबाट दुईवटा डीआरएस कन्टेनर जाजरकोट पठायो । उक्त कन्टेनरमा खाद्यान्नबाहेक उद्धारका सबै सामग्रीहरू हुन्छन् ।

सरकारले कुरिनटार र सिनामंगलमा पनि डिजास्टर म्यानेजमेन्टको तालिम लिएको टोली तैनाथ राख्यो । महेश्वरी बाहिनी सुर्खेतबाट खोज तथा उद्धार टोली जाजरकोटमा खट्यो ।

नेपाली सेनाका सेना, शसस्त्र प्रहरी र नेपाल प्रहरीका विभिन्न टोलीहरू गएरातिदेखि नै खोज तथा उद्धारमा खटिए ।सरकारले जाजरकोट र रुकुम पश्चिमका भूकम्प प्रभावितको उद्धार र राहतका लागि ५–५ करोड रुपैयाँ पठाएको छ ।

प्रधानमन्त्री भूकम्प प्रभावित क्षेत्रमा सक्रिय रहे भने गृहमन्त्री नारायणकाजी श्रेष्ठले गृह मन्त्रालयमा बैठक बोलाएर जाजरकोट र रुकुम पश्चिमका भूकम्प पीडितको उद्धार र राहतका लागि राहत व्यवस्थापन कोषबाट ५–५ करोड रुपैयाँ तत्काल पठाउने निर्णय गरे ।

कतिपय घाइतेको स्थानीय अस्पताल र कतिपयलाई आवश्यकता हेरेर सुर्खेत र नेपालगञ्जमा उपचार गरायो । सरकारले सुर्खेतलाई मूल बेस र सहायक बेस नेपालगञ्जलाई बनाएर राहत वितरण कार्य एकद्वार प्रणालीमा सुरु गरेको गृहमन्त्री श्रेष्ठले जानकारी दिएका छन् । उनले भूकम्पका कारण केही सडक अवरुद्ध भएकाले खुलाउने प्रयास जारी रहेको बताए ।

प्रकाशित मिति: शनिबार, कात्तिक १८, २०८० १९:४४