भूकम्पले क्षतिग्रस्त आठबिसकोट नगरपालिका, मेयर केसी भन्छन्- पहिले उद्धार गरौँ, त्यसपछि राहत बाँडौला

भूकम्पले क्षतिग्रस्त आठबिसकोट नगरपालिका, मेयर केसी भन्छन्- पहिले उद्धार गरौँ, त्यसपछि राहत बाँडौला

मेयर रवि केसी ।

A+ A A-

जाजरकोटको रामीडाँडालाई केन्द्रविन्दु बनाएर गएको ६.४ रेक्टर स्केलको भूकम्पले जाजरकोट र रुकुमपश्चिममा ठूलो क्षति पुगेको छ । भूकम्पबाट रुकुम पश्चिमको आठबिसकोट नगरपालिका सबैभन्दा बढी प्रभावित बनेको छ ।

आठबिसकोट नगरपालिकामा भूकम्पमा परी अहिलेसम्म ४३ जनाको मृत्यु भएको मेयर रवि केसीले बताए । उनका अनुसार भूकम्पले पाँच हजारभन्दा बढी घरमा क्षति पुर्‍याएको छ । अहिले नगरपालिकाको सम्पूर्ण ध्यान उद्धारमा केन्द्रित रहेकाले क्षतिको विवरण संकलन नगरिएको उनले बताए ।

नगरपालिकामा भौतिक क्षति प्राय: सबै वडामा भए पनि ८, ९, १०, ११, १२ ,१३ र १४ नम्बर वडामा बढी भौतिक क्षति भएको नगरपालिकाका सूचना प्रविधि अधिकृत कुवेर बस्नेतले जानकारी दिए । उनले भने, ‘अहिलेको प्रमुख काम उद्धार हो । सबै जनशक्ति उद्दारमा खटेका छौँ । मानवीय क्षति कति भयो भनेर अहिले नै एकीनका साथ भन्न सकिने स्थिति छैन । १४ नम्बर वडामा २२ जना , १२ मा तीन जना , ९ मा २ जना , १३ मा ६-७ जनाको मृत्यु भएको प्रारम्भिक डाटा हो । अन्य वडामा पनि क्षति भएको छ ।’

नगरपालिकाको १ देखि ८ नम्बर वडामा मानवीय क्षति नभए पनि भौतिक क्षति भएको छ । घरहरू चर्केका छन् । मानिसहरू घरभित्र जान डराइरहेका छन् । घर नभत्केका वडामा पनि चर्केका कारण मानिसहरू घरमा बस्न डराइरहेका बस्नेतले बताए । उनले भने, ‘१ देखि ८ नम्बर वडामा मानवीय क्षति भएको छैन । तर, घरहरू चर्केका छन् । मानिसहरू घरभित्र बस्न डराइरहेका छन् ।'

बढी क्षति भएका वडामा स्वास्थ्यकर्मी र उद्दारकर्मी खटिएको मेयर केसीले बताए । गएराति ११ बजेर ४७ मिनेटमा जाजरकोटको बारेकोट गाउँपालिका–१, रामीडाँडा केन्द्रविन्दु भएर ६.४ रेक्टर स्केलको भूकम्प गएको थियो । भूकम्पमा परी जाजरकोट र रुकुम पश्चिममा गरी अहिलेसम्म १३६ जनाको मृत्यु भएको छ । जाजरकोटमा ९८ जना र रुकुम पश्चिममा ३८ जनाले ज्यान गुमाएका छन् ।