कोशी प्रदेशमा सभापतिले फोहोर गर्नुभयो, उहाँले नै सोहर्नुपर्छ- गगन थापा

A+ A A-

नेकपा माओवादी केन्द्र र नेकपा (एकीकृत समाजवादी) शुक्रबार सरकारमा प्रवेश गरेसँगै कोशी प्रदेशसभा झनै अस्थिरतातर्फ अघि बढेको छ । नेकपा एमालेको समर्थनमा मुख्यमन्त्री बनेका कांग्रेसका केदार कार्कीले दुई पार्टीका दुई सांसदलाई मन्त्री बनाएका छन् । योसँगै एमालेले सरकारबाट बाहिरिने चेतावनी दिएको छ ।

विघटनको दिशामा अघि बढेको कोशी प्रदेश सभाको विषयले कांग्रेस विभाजित छ । यहीबीच महामन्त्री गगनकुमार थापाले कोशीको सबै जिम्मा सभापति र वरिष्ठ नेता डा. शेखर कोइरालाले लिनुपर्ने जिकिर गरेका छन् । पोखरामा शनिबार बिहान पत्रकारसँगको कुराकानीमा सभापतिले गठबन्धनका बैठकबारे थाहै नदिई एकलौटी निर्णय गर्ने गरेको भन्दै उनी रूष्ट देखिए । ‘पार्टीको सभापति र वरिष्ठ नेताले यसको हल के गर्ने भन्ने उहाँहरुले खोज्नुपर्छ । सभापतिलाई घरमै गएर भनेको छु- तपाईंले गरेको फोहोर हो तपाईंले नै सोहर्नुहोला । फोहोर तपाईंले गर्ने अनि सोहर्न हामीलाई नबोलाउनुहोला,’ थापाले भने, ‘सोहर्न सकिनँ भन्नुभए जाने हो । अहिलेसम्म आफैँ सोहर्छु भन्नुभएकाले आफैँ गर्नुहुन्छ ।’

संघ र प्रदेश सरकारको प्रभावकारी दिशा नै नभएको महामन्त्री थापाको टिप्पणी छ । दलभन्दा पनि तीन जना नेताले एकलौटी गरेर गठबन्धन चलाएको र आफूहरूलाई केही थाहा नहुने गरेको उनको आरोप छ । ‘गठबन्धनको बैठक बस्यो भनिन्छ, गठबन्धनको बैठक होइन,’ थापाले भने, ‘प्रचण्ड, शेरबहादुर र माधव नेपालको बैठक हो । त्यसो भएकाले उहाँहरुलाई जे सजिलो लाग्छ त्यही गर्नुहुन्छ । मन्त्रालय थप्न मन लागे थपिदिनुहुन्छ, घटाउन मन लागे घटाइदिनुहुन्छ ।’

गठबन्धनमा भएकाले सरकारको बचाउ गर्नुपर्ने भए पनि सरकारका गतिविधि देखेर आफूले त्यसो गर्न नसकेको महामन्त्री थापाले सुनाए । ‘यस्तो अपारदर्शी, अराजनीति यस्तो अपरिपक्वकै कारण सरकारले अहिले दिशा गुमाएको छ । यो सरकार भएन भने के हुन्छ जुन यो सरकार हुँदा भइरहेको छ ? म सरकारको बचाउ गर्न पर्ने हो तर सकिरहेको छैन,’ उनले भने ।

आफूहरू मंसिरमा बस्ने महासमिति बैठकको तयारीमा जुटेको र सबै विषय त्यहाँ उठाउने थापाले सुनाए । समसामयिक विषय, नीतिगत अडान, सांगठनिक अवस्था, गठबन्धन र सरकारलगायत विषयमा महासमिति बैठकमा छलफल हुने थापाले जानकारी दिए ।