मध्यरातकाे भूकम्पले पश्चिम रुकुममा ठूलाे क्षति, अहिलेसम्म १४ काे मृत्यु

A+ A A-

जाजरकोटलाई केन्द्रविन्दु बनाएर शुक्रबार राती आएको भूकम्पबाट मानवीय र भौतिक क्षतिका विवरणहरु आउन थालेका छन् । पश्चिम रुकुमको आठविसकोटमा १४ जनाको मृत्य भएको खबर आएको छ ।

पश्चिम रुकुमको आठविसकोट नगरपालिकाकाे वडा नं ११ मा ७ जना, वडा नं १२ मा ४ जना, वडा नं १३ मा ३ जनासहित जम्मा १४ जनाको मृत्यु भएको आठबिसकोट नगरपालिकाकी उपप्रमुख धनकुमारी शाहीले जानकारी दिइन्। शाहीका अनुसार उनीहकाे पहिचान भने खुलेको छैन्। शिलापत्रसँग शाहीले अहिलेसम्म वडा नम्बर १२ मा तीन जना र ११ नम्बर वडामा सात जनाको मृत्यु भएको / अन्य घाइतेहरुको उद्धारकार्य जारी रहेकाे बताइन्।

घाइतेहरुलाई नेपाल प्रहरी तथा स्थानीयको सहयोगमा उद्दार गरी आठविसकोट नगरपालिका ९ मा रहेको नगर अस्पतालमा उपचार भइरहेको छ । शनिबार राती ११ बजेर ४७ मिनेटमा जाजरकोटको लामीडाँडा केन्द्रविन्दु भएर ६ दशमलव ४ म्याग्निच्युडको भूकम्प जाँदा कर्णालीका विभिन्न जिल्लामा ठूलाे क्षति भएकाे अनुमान गरिएकाे छ । दैलेख, जाजरकोट, रुकुम पश्चिम, सल्यान लगायतका जिल्लाका धेरै घरमा क्षति पुगेको छ।

केही ठाउँमा सुख्खा पहिरोसमेत गएको छ । रातीको समय भएकाले विवरण संकलन गरी उद्दार र राहतका काम गर्न समस्या भएको बताइएकाे छ । कतिपय स्थानमा टेलिफोन टावरले काम नगर्दा सूचना संकलनमा समस्या भइरहेको छ। कर्णाली प्रदेशका आन्तरिक मामिला तथा कानुन मन्त्री कृष्ण जिसीले जाजरकोटमा नेपाली सेना, सशस्त्र प्रहरी र नेपाल प्रहरी परिचालन भएकाे जानकारी दिए । उनका अनुसार क्षतिको विवरण र सूचना संकलन भइरहेको छ ।

त्यसैगरी, जाजरकोटको खलंगामा एकजनाको मृत्यु भएको खबर छ । प्रमुख जिल्ला अधिकारी सुरेश सुनारले खलंगामा एकजनाको मृत्यु भएको जानकारी आएपनि विस्तृत विवरण प्राप्त नभएको बताएका छन् ।

साथै, जाजरकोटमा भूकम्पका कारण पर्खाल भत्किँदा एक प्रहरी अधिकारी घाइते भएको पनि बताइएको छ । प्रहरी सहायक निरिक्षक यमराज रोकाय घाइते भएका हुन् । मध्यराती भएकाले क्षतिको विवरण आधिकारिक प्राप्त हुन सकिरहेको छैन । तरपनि, कालिकोट, पश्चिम रुकुम, जाजरकोट, सल्यानलगायतका जिल्लामा भएको क्षतिको विवरण आउन थालेको छ ।

प्रकाशित मिति: शनिबार, कात्तिक १८, २०८० ०१:३७