स्कुल पढाउने काम छाेडेर ड्रागन फुट्स खेतीमा तनहुँकी गौली

A+ A A-

तनहुँकाे व्यास नगरपालिका-२ कालिकामार्ग निवासी कल्पना गौली १६ वर्ष शिक्षण पेसामा थिइन् । उनीसँग प्राविदेखि मावि तहसम्म अङ्ग्रेजी विषयमा अध्यापन गराएको अनुभव छ । गौलीले अध्यापनपछि घरमै बुटिक व्यवसाय सुरु गरिन् ।

करिब १५ वर्षसम्म बुटिक व्यवसाय गरिसकेकी उनी यतिबेला भने व्यावसायिक कृषि पेसामा संलग्न छिन् । उनले व्यास नगरपालिका–५ ढोडेनीमा ‘ड्रागन फ्रुट’को खेती सुरु गरेकी हुन् ।

प्रकृति र माटोसँग रमाउन र यही क्षेत्रलाई साधान केन्द्रको रूपमा स्थापित गराउन आफू यस व्यवसायतर्फ लागेको किसान गौलीको भनाइ छ । वार्षिक २० हजार रुपैयाँ बुझाउने गरी करिब नौ रोपनी जग्गा २० वर्षका लागि भाडामा लिएर उनले व्यवसाय थालेकी हुन् ।

१८ वैशाख २०७९ मा ‘माँ अम्बे अलौकिक कृषि फार्म’ दर्ता गरी सञ्चालन गरेकी गौलीले पहिलो वर्षमा १२ लाख रुपैयाँभन्दा बढीको ड्रागन फ्रुट बिक्री गरिसकेकी छन् । वैशाखमा फूल खेल्न सुरु भएको ड्रागन फ्रुट ६० दिनभित्र खान योग्य हुन्छ भने मङ्सिर महिनासम्म फल्ने उनको भनाइ छ ।

उनले भनिन्, 'अहिले त व्यवसायीहरू फार्ममै आएर लैजानुहुन्छ, पहिले गाडीमा बजारसम्म लैजानु पर्ने अवस्था थियो, उनले प्रतिकिलो पाँच सयदेखि ६ सय रुपैयाँसम्म ड्रागन फ्रुट बिक्री गर्दै आएकी छन् ।

गौलीले गत वर्ष भारतको हैदराबादबाट दुई हजार एक सय वटा ड्रागन फ्रुटका बिरुवा ल्याएर फार्ममा पाँच सय पोल निर्माण गरी एउटा पोलमा चार वटाका दरले ड्रागन बिरुवा लगाएकी थिइन् । करिब ८० लाख रुपैयाँमध्ये ४२ लाख ५० हजार ड्रागन फ्रुटको खेतीमा लगानी गरेको उनले बताइन् । उनले भनिन्, 'फार्ममा ड्रागन फ्रुटका साथै च्याउ, मौरी, फलफूललगायतका बहुआयामिक किसिमले खेती गरेको छु ।' गौलीले यस वर्ष तीन लाख रुपैयाँभन्दा बढीको ड्रागनका बिरुवा बिक्री गरिन् । प्रतिबिरुवा दुई सयदेखि पाँच सय रुपैयाँसम्म बिरुवा बिक्री गरेको उनले बताइन् । ड्रागनका बिरुवा लिन तनहुँलगायत विभिन्न जिल्लाबाट मानिस आउने गरेको उनको भनाइ छ ।

किसान गौलीले व्यास नगरपालिका–३ मा ‘व्यास कोसेली घर’ समेत सञ्चालन गर्दै आएकी छन् । स्थानीयस्तरमा उत्पादित अर्गानिक तरकारी, घरेलु सामग्री, घरेलु कपडालगायत सामग्री उक्त कोसेली घरमा बिक्री गर्ने गरेको उनले जनाइन् ।

प्रकाशित मिति: शनिबार, कात्तिक १८, २०८० ०५:१५