रहस्यमय बन्दै मुगु सामूहिक हत्या प्रकरण, प्रहरी भन्छ- प्रगतिउन्मुख छौँ

A+ A A-

यतिबेला तालिमप्राप्त कुकुरसहित नेपाल प्रहरीमा विशेष अनुसन्धानमा दख्खल राखेका प्रहरी अनुसन्धान अधिकृतहरू मुगुमा छन् । छायानाथ रारा नगरपालिका-६, मुन्दु गाउँमा ८ कात्तिकमा अज्ञात समूहले एकै परिवारका चार जनाको बीभत्स हत्या गरेको घटनाको अनुसन्धानका लागि प्रहरीको ‘मर्डर इन्भेस्टीकेसन एक्पर्ट टिम’ सहितको टोलीले घटनाको अनुसन्धान गरिरहेको छ ।

उनीहरूलाई अनुसन्धानमा तालिमप्राप्त कुकुरले समेत सहयोग गरिरहेका छन् । कर्णाली प्रदेश प्रहरी तालिम केन्द्र सुर्खेत (हाल नेपालगन्ज), प्रदेश प्रहरी कार्यालय सुर्खेत र जुम्ला प्रहरीको विशेष अनुसन्धान टोली पनि अनुसन्धानमा खटिएको छ । प्रहरीले घटनालाई विभिन्न कोणबाट विश्लेषण गर्दै अनुसन्धान जारी राखेको छ । उक्त बीभत्स सामूहिक हत्या भएको बिहीबार (आज) ९ दिन पुग्दासमेत प्रहरीले ‘क्लु’ भने अझै पनि भेट्न सकेको छैन ।

यद्यपि, घटनाबारे अनुसन्धान मात्र नभई प्रगति उन्मुख रहेको कर्णाली प्रदेश प्रहरी कार्यालय सुर्खेतका प्रवक्ता प्रहरी वरिष्ठ उपरीक्षक गोपालचन्द्र भट्टराई बताउँछन् । ‘हामीले उक्त घटनामा प्रहरीमा लामो समय हत्याका ठूला घटनाको अनुसन्धानमा सफल भएका अनुसन्धान विज्ञबाट विभिन्न चरणमा अनुसन्धान गरिरहेका छौँ,’ उनले भने, ‘अहिले सार्वजनिक गरिहाल्नु पर्ने गरी सफल नभए पनि हामी प्रगति उन्मुख छौँ ।’

८ कात्तिकमा मुन्दु गाउँमा अज्ञात समूहले धारिलो हतियार प्रयोग गरी २८ वर्षीया श्रीदेवी बोहोरा, उनका छोराहरू ११ वर्षीय मनोज, आठ महिनाका रहर बोहोरा र आठ वर्षीया छोरी अप्सरा बोहोराको हत्या गरेको थियो । घटना घटेको दुई दिनपछि अर्थात् १० कात्तिकबाट अनुसन्धान खटिएको तालिमप्राप्त कुकुरसहित प्रहरीको विशेष टोली घटनास्थलमा खटिएको थियो । घटना घटेको लामो समयसम्म पनि प्रहरीको अनुसन्धान हत्यारा नजिक पुग्न सकेको छैन, जसले घटना थप रहस्यमय बन्दै गएको छ ।

घटनाको अनुसन्धानको निरीक्षण तथा सघाउमा कर्णाली प्रदेश प्रहरी कार्यालय सुर्खेतका प्रमुख प्रहरी नायब महानिरीक्षक (डीआईजी) भीमप्रसाद ढकालसमेत मुगु पुगेर फर्किएका छन् । अनुसन्धानमा प्रयोग गरिएका कुकुरले घटनासँग सम्बन्धित कुनै सुराक फेला पार्न सकेका छैनन् ।

प्रहरीले अनुसन्धानका क्रममा दर्जन बढी व्यक्तिलाई सोधपुछ गरेको छ । शंकास्पद व्यक्तिलाई उच्च निगरानीमा राखेको छ । तर, उनीहरूलाई पक्राउ गर्ने बलियो प्रमाण फेला पार्न नसकिएको अनुसन्धानमा खटिएका एक प्रहरी अधिकृतले बताए । प्रहरीले छिमेकी गाउँ तथा बाह्य जिल्लामा पनि अनुसन्धानको दायरा बढाएको छ ।

घटनाको प्रकृतिअनुसार श्रीदेवीले लगाएका गहना र उनले प्रयोग गर्दै आएको मोबाइल फोन नभेटिनुले लुटपाट गर्ने उद्देश्यले हत्या भएको हुन सक्ने आशंका प्रहरीले गरेको छ । प्रहरीको प्रारम्भिक अनुसन्धानबाट ढोकामा नयाँ ताला लगाइएको तथा घटनापछि कतारमा रहेका मृतक श्रीदेवीका श्रीमान् दीपकलाई श्रीदेवीले प्रयोग गर्दै आएको मोबाइलको म्यासेन्जरबाट छोराछोरीको शवसहितको फोटो पठाएको खुलेको अनुसन्धानमा संलग्न ती अधिकृतले बताए ।

८ कात्तिक बिहानदेखि ताला लगाएको देखेपछि छिमेकीले १० कात्तिक बिहान ९ बजेतिर ढोका खोलेर हेर्दा चारै जनाको बीभत्स हत्या गरिएको अवस्थामा गाउँलेहरूले देखेका थिए । जिल्ला प्रहरी कार्यालय मुगुका प्रमुख प्रहरी नायब उपरीक्षक (डीएसपी) वीरेन्द्र थापाले हालसम्म पनि घटनामा संलग्न व्यक्तिबारेमा ठोस प्रमाण फेला नपरेको बताए ।

प्रकाशित मिति: बिहीबार, कात्तिक १६, २०८० १७:५४