पर्यटनमन्त्रीको ‘राहत’ले ज्येष्ठ नागरिकलाई हवाई यात्रा झन् महँगो

A+ A A-

संस्कृति, पर्यटन तथा नागरिक उड्डयन मन्त्री योगेश भट्टराईले राहत दिन खोजेका जेष्ठ नागरिकलाई हवाई यात्रा झन् महंगो पर्ने भएको छ । मन्त्री भट्टराईले जेष्ठ नागरिकलाई हवाई भाडामा ५० प्रतिशत छुटको व्यवस्था गर्ने घोषणा गरेका थिए ।

वायुसेवा संचालकहरुले जेष्ठ नागरिकलाई हवाई भाडामा ५० प्रतिशत छुट दिन शर्त तोकेपछि यस्तो अवस्था आएको हो । वायुसेवा संचालकले तोकिएको अधिकतम भाडादरमा मात्रै ५० प्रतिशत छुट दिने निर्णय गरेका छन् ।

वायु सेवा संचालक संघको विहीबार (९ असोज) बसेको संचालक समिति बैठकले तोकिएको अधिकतम भाडादरमा ५० प्रतिशत छुट दिने निर्णय गरेको छ ।

‘छुट सुविधा ‘अपर लिमिट’को हवाई भाडादरमा मात्र लागू हुनेछ,’ संघले गरेको निर्णयमा उल्लेख छ ।

कसरी महंगो पर्छ ?

अहिले काठमाडौंबाट विराटनगर जानको लागि तोकिएको अधिकतम भाडादर ७ हजार ६ सय रुपैयाँ हो । तर, पर्सि (आगामी आइतबार) विराटनगरबाट काठमाडौं फर्कनको लागि विभिन्न एयरलाइन्सले २ हजार २ सय रुपैयाँमा पनि टिकट उपलब्ध गराइरहेका छन् । विराटनगरबाट काठमाडौं फर्कने अधिकतम भाडा पनि ७ हजार ६ सय रुपैयाँ नै हो ।

तर, संघले गरेको निर्णय कार्यान्वयनमा आएको हुन्थ्यो भने पर्सि विराटनगरबाट काठमाडौं फर्कने जेष्ठ नागरिकले ३ हजार ८ सय रुपैयाँ तिर्नुपथ्र्यो । जबकि सोही दिन छुट सुविधा नपाएका नागरिकले २ हजार २ सय रुपैयाँमा नै विराटनगरबाट काठमाडौं आउन पाएका छन् ।

दशैंको बेलामा मात्रै होइन, अन्य सामान्य समयमा पनि तोकिएको अधिकतम भाडादरभन्दा निकै सस्तोमा हवाई यात्रा गर्न सकिन्छ । जस्तो कि काठमाडौं–विराटनगरको अधिकतम भाडा ७ हजार ६ सय रुपैयाँ भएपनि सामान्य समयमा २ हजार ५ सयदेखि ३ हजार रुपैयाँसम्ममा टिकट पाइन्छ । तर, सोही समयमा पनि जेष्ठ नागरिकले ३ हजार ८ सय रुपैयाँ नै तिर्नुपर्ने हुन्छ ।

काठमाडौं–नेपालगञ्जको अधिकतम हवाई भाडा १० हजार रुपैयाँ हो । तर, सामान्य समयमा यो रुटमा ३ हजार ५ सय रुपैयाँदेखि ४ हजार रुपैयाँमा टिकट पाइन्छ । जबकि पर्यटनमन्त्री भट्टराईले दिएको ‘राहत’ उपभोग गर्ने जेष्ठ नागरिकले ५ हजार रुपैयाँ तिर्नुपर्छ ।

काठमाडौं–धनगढीको अधिकतम हवाई भाडा १२ हजार ९ सय रुपैयाँ छ । सामान्य समयमा सो रुटका लागि ३५ सयदेखि ४५ सयसम्ममा नै टिकट पाइन्छ । अवदेखि सामान्य समयमा पनि जेष्ठ नागरिकले साढे ६ हजार रुपैयाँभन्दा बढी तिर्नुपर्ने भएको छ ।

यस्तै, काठमाडौं–पोखरा रुटको अधिकतम हवाई भाडादर ४ हजार ७ सय रुपैयाँ हो । सामान्य समयमा सो रुटमा १ हजार ५ सय रुपैयाँ पनि टिकट पाइन्छ । तर, सरकारले दिएको सुविधा उपभोग गर्ने जेष्ठ नागरिकले भने सामान्य समयमा पनि २३ सय रुपैयाँभन्दा बढी तिरेर यात्रा गर्नुपर्ने भएको छ ।

वायुसेवा संचालकका अरु शर्त

सरकारले तोकेको सुविधा प्रयोग गर्नको लागि जेष्ठ नागरिकका लागि वायुसेवा संचालकले अरु पनि शर्त तोकेका छन् । कम्पनीको कार्यालयमा आएर आफू विपन्न भएको स्वघोषणा गरेपछि मात्रै हवाई भाडामा ५० प्रतिशत छुट दिने संचालकको शर्त छ ।

‘७० वर्षमाथिका विपन्न जेष्ठ नागरिकले हवाई भाडामा ५० प्रतिशत छुट पाउनका लागि सम्बन्धित वायुसेवा कम्पनीको कार्यालयमा आई स्वयमले आफू विपन्न भएको व्यहोरा स्वघोषणा गर्नुपर्नेछ,’ संघले जारी गरेको विज्ञप्तिमा उल्लेख छ ।

अन्य शर्तहरुमा टंक रुटमा हवाई सेवा संचालन गर्ने वायुसेवा कम्पनीले प्रतिदिन प्रतिसेक्टरमा २ जना विपन्न जेष्ठ नागरिकलाई मात्र यो सुविधा उपलब्ध गराउने भनिएको छ ।

यस्तै, स्टल रुटमा हवाई सेवा संचालन गर्ने वायुसेवा कम्पनीहरुले प्रतिदिन प्रतिसेक्टरमा १ जना विपन्न जेष्ठ नागरिकलाई मात्र यो सुविधा उपलब्ध गराउने संघको निर्णय छ । संघले गरेको यस्तो निर्णय आगामी दशैंको घटस्थापनाको दिनदेखि कार्यान्वयन हुने भनिएको छ ।

प्रकाशित मिति: शनिबार, असोज ११, २०७६ ०३:५२