चित्रकलामा सुनैनाको फड्को : जनकपुरदेखि जापानसम्म चर्चा

A+ A A-

चित्रकलामा मिथिला क्षेत्रका महिला अब्बल बन्दै गएका छन् । कुनै बेला घर वरिपरी सीमित उनीहरुको चित्रकला अब विदेशसम्म पुगेको छ ।
जनकपुरधामकी सुनैना ठाकुर अहिले मिथिला चित्र प्रदर्शनका लागि जापान पुगेकी छन् । अहिले कलाकार सुनैनाको एकल मिथिला चित्रकला प्रदर्शनी जापानको टोकियोमा भइरहेको छ । २७ भदौदेखि शुरु भएको सो प्रदर्शनी एक महिनासम्म चल्नेछ ।जापानमा रहेकी कलाकार सुनैनाका अनुसार प्रदर्शनीमा महिला हिंसा, महिला सशक्तिकरण, समानता, अधिकार, शान्ति र समृद्धि, संस्कृतिलगायत विषयवस्तुमा तयार पारिएका ४० थान चित्र छन् ।

पति शम्भु ठाकुर र सासूआमाको साथकै कारण आफूले देश तथा विदेशमा आफ्नो कला प्रस्तुत गर्न पाएको सुनैना बताउँछिन् । आफूले आफ्नो गाउँठाउँ, कलासंस्कृति र समाजको यथार्थ चित्रमार्फत अरु देशका नागरिकलाई जानकारी गराउने गरेको उनको भनाइ छ ।जापानमा जारी उनको एकल चित्रकलाका साथै प्रदर्शनीमा हस्तकलाका सामग्रीहरू समेत राखिएका छन् । त्यस्तै मिथिला चित्रकला पेन्टिङ गरिएका टिसर्ट, ब्याग, रुमाललगायत वस्तुहरूसमेत प्रदर्शनीमा राखिएका छन् । प्रदर्शनीमा २० वटा पेन्टिङ बुक भइसकेको कलाकार ठाकुरले जानकारी दिइन् ।

मिथिला कलामार्फत महिला सशक्तिकरण, लैङ्गिक समानता र अधिकारको क्षेत्रमा योगदान पुर्याएबापत केही दिनअघि मात्रै सुनैनाले ५० हजार रुपैयाँ राशिको ‘संगति ग्राण्ट अवार्ड’ प्राप्त गरेकी थिइन् ।

यसअघि उनले लोककलातर्फ राष्ट्रिय ललितकला पुरस्कार, अमेरिकाबाट कमन ग्रायण्ड अवार्डलगायत राष्ट्रिय तथा अन्तर्राष्ट्रिय पुरस्कारसमेत प्राप्त गरेसकेकी छन् ।अमेरिका, श्रीलङ्का, भारतमा समेत एकल तथा सामूहिक चित्रकला प्रदर्शनी गरिसकेकी सुनैनाले जनकपुरधामको जानकी मन्दिर प्रांगणमा मिथिला आर्ट ग्यालरी र प्रशिक्षणसमेत सञ्चालन गर्दै आएकी छन् ।

उनले काठमाडौँको ठमेलमा समेत सुनैना मिथिला आर्ट ग्यालरी सञ्चालन गरेकी छन् । उनले पोखरा, जलेश्वर, काठमाडौंलगायत स्थानमा पनि सामूहिक र एकल चित्रकला प्रदर्शनी गरिसकेकी छन् ।

सुनैनाजस्तै प्रतिभाका धनी युवतीहरु जनकपुरमा धेरै छन् । उनीहरुले पनि देशका विभिन्न ठाउँमा हुने चित्रकला प्रदर्शनीमा आफ्नो कला प्रस्तुत गर्दै आएका छन् ।