नेपाल लाइफको ‘बिजिनेस रिभ्यु मिट’ सम्पन्न, चालु आवको बाँकी अवधिको सेल्स रणनीति तर्जुमा

नेपाल लाइफको ‘बिजिनेस रिभ्यु मिट’ सम्पन्न, चालु आवको बाँकी अवधिको सेल्स रणनीति तर्जुमा

A+ A A-

नेपाल लाइफ इन्स्योरेन्सको एकदिवसीय ‘बिजिनेस रिभ्यु मिट’ चालु आर्थिक वर्षको बाँकी अवधिका लागि सेल्स रणनीतिको तर्जुमा गर्दै सम्पन्न भएको छ । काठमाडौंमा आयोजना गरिएको उक्त कार्यक्रममा चालु आर्थिक वर्षको पहिलो त्रैमासको व्यापार समीक्षाका साथ बाँकी अवधिका लागि सेल्स रणनीति तर्जुमा गरिएको कम्पनीले जनाएको छ ।

'पराक्रमी गति आक्रामक नीति' भन्ने मूल नाराका साथ आयोजना गरिएको सो कार्यक्रममा कम्पनीका वरिष्ठ सञ्चालक कमलेशकुमार अग्रवाल, प्रमुख कार्यकारी अधिकृत प्रविणरमण पराजुली, नायब प्रमुख कार्यकारी अधिकृत अमितकुमार कयाल, नेसनल सेल्स हेड उमापति पोखरेललगायत उच्च व्यवस्थापकहरू तथा प्रादेशिक प्रमुखहरूको सहभागिता थियो ।

कार्यक्रममा कम्पनीका वरिष्ठ सञ्चालक अग्रवालले देश आर्थिक मन्दीबाट गुज्रिरहेको समयमा पनि कम्पनीले गरेको व्यवसाय उत्साहप्रद रहेको र यसलाई मूर्त रूप प्रदान गर्न अहोरात्र लाग्नुभएका सम्पूर्ण प्रगतिका सहयात्रीहरूलाई हृदयदेखि नै धन्यवाद दिए । उनले नेपाल लाइफ आफैँमा जीवन बीमा क्षेत्रमा गौरवशाली इतिहास बोकेको कम्पनी रहेको र अहिलेको विषम परिस्थितिमा पनि कम्पनीले जीवन बीमा बजारको २७ प्रतिशत बजार हिस्सा ओगट्दै बजारको लिडरको रूपमा आफूलाई स्थापित गराउन सफल भएको बताए ।

वरिष्ठ सञ्चालक अग्रवालले भने, 'विभिन्न परिस्थितिबाट गुज्रिँदै र त्यसबाट पाठ लिँदै आजको अवस्थामा आएको यस कम्पनीले बीमा बजारलाई मार्गनिर्देश गर्न पनि भूमिका निर्वाह गर्नुपर्छ । यस कम्पनीको सेल्स टिम तथा अभिकर्ता अत्यन्तै अनुभवी र परिपक्व भएकै कारण अहिलेको विषम अवस्थामा पनि कम्पनीले उत्कृष्ट व्यापार गर्नेमा म विश्वस्त छु । हाम्रो सेल्स टिमले आगामी दिनमा अथक मिहिनेत र परिश्रम गर्दै जीवन बीमाको बजारीकरण, सचेतना तथा बीमा बजारको विकास र बीमाको पहुँचलाई आमनागरिकसम्म पुर्‍याउन महत्त्वपूर्ण भूमिका निर्वाह गर्नमा जोड दिनुपर्छ ।'

कम्पनीका नायब प्रमुख कार्यकारी अधिकृत अमित कुमार कयालले हालसम्मको उपलब्धिका लागि सबैलाई धन्यवाद ज्ञापन गर्दै जीवन बीमा बजारको हिस्सालाई थप बृहत् बनाउनका निम्ति आग्रह गरे । उनले नेपाल लाइफ मार्केट लिडर भएको कारण यस कम्पनीको जिम्मेवारी पनि अधिक रहेको र सोलाई मनन गर्दै कार्यसम्पादन गर्न सबैमा अनुरोध गरे ।

कार्यक्रमामा प्रमुख कार्यकारी अधिकृत पराजुलीले कर्मचारी तथा अभिकर्ताहरूलाई चालु आर्थिक वर्षको पहिलो त्रैमासको कार्यसम्पादनका लागि धन्यवाद र चालु आर्थिक वर्षको व्यापार लक्ष्य पूरा गर्न दत्तचित्त भई कार्य गर्न आह्वान गरे । कम्पनीले आफ्नो आन्तरिक तथा बाह्य प्रणालीलाई समयसापेक्ष बनाउनका निम्ति डिजिटलाइजेसनको कार्य थालनी गरिसकेको उनले जानकारी दिए । निकट भविष्यमा बीमितहरूले यस कम्पनीद्वारा प्रदान गरिने सेवाहरू प्राप्त गर्न शाखा धाउनुपर्ने अवस्थाको अन्त्य हुने र बीमितहरूले घरै बसीबसी सम्पूर्ण सेवा थप छिटोछरितो, चुस्त र दुरुस्त तवरले प्राप्त गर्ने उनको भनाइ थियो ।

कार्यक्रममा नेशनल सेल्स हेड, सेल्ससँग सम्बन्धित विभागीय प्रमुखहरू तथा प्रादेशिक प्रमुखहरूले आ–आफ्ना प्रतिवेदनहरू प्रस्तुत गरे ।

प्रकाशित मिति: बुधबार, कात्तिक १५, २०८० १९:२६