दक्षिण एसिया फेस्टिबल्स एन्ड कल्चर एकेडेमीका लागि ब्रिटिस काउन्लिसले माग्यो आवेदन

दक्षिण एसिया फेस्टिबल्स एन्ड कल्चर एकेडेमीका लागि ब्रिटिस काउन्लिसले माग्यो आवेदन

A+ A A-

ब्रिटिस काउन्सिलले एडिनबर्ग न्यापियर विश्वविद्यालयसँगको साझेदारीमा दक्षिण एसिया फेस्टिबल्स एन्ड कल्चर एकेडेमी (साफ्का) कार्यक्रममा सहभागिताका लागि आवेदन खुला गरेको छ । अहिले विश्वभर स्वतन्त्र र स्थापित कला र संस्कृति मेलाहरूको वृद्धि भइरहेको छ । सोको प्रतिक्रियामा यो आवेदन खुलाइएको हो ।

यो अग्रणी पहलले मेला पर्वप्रति उत्साहित र उद्योगका विज्ञहरूबीचको दूरी मेटाउने सेतुको काम गर्नेछ । यसले भारत र दक्षिण एसियाका उसका छिमेकी देशहरूमा अनलाइनमार्फत ज्ञान र अन्तरदृष्टि आदानप्रदानमा सहजीकरण गर्नेछ । दक्षिण एसिया फेस्टिबल्स एकेडेमीको इन्टरमिडियट कोर्स सन् २०२४ को जनवरीमा सुरु हुनेछ । यसको आवेदन भने सन् २०२३ को नोभेम्बर १९ सम्म खुला रहनेछ ।

साफ्कामा फेस्टिबल म्यानेजरहरूलाई फेस्टिबल व्यवस्थापनमा सफलताका लागि आवश्यक सीपयुक्त बनाउन विशेष गरी तयार पारिएका छोटा कोर्सहरू छन् । यी कोर्सहरूले अन्तर्राष्ट्रिय प्रोग्रामिङ र क्युरेसन, नेतृत्व र सुशासन, वित्तीय व्यवस्थापन, सञ्चालन र कर्मचारी व्यवस्थापन, मार्केटिङ र दर्शक विकास, जोखिम व्यवस्थापन र स्वास्थ्य एवं सुरक्षा, समानता, विविधता र समावेशीकरणलाई समेट्नेछ ।

ब्रिटिस काउन्सिल नेपालका निर्देशक शाहिदा म्याकडगल भन्छिन्, ‘फेस्टिबल व्यवस्थापनसम्बन्धी बलियो सीपको महन्त्वलाई अतिरञ्जित गर्न सकिन्न । बेलायतका विस्तृत र जीवन्त मेला/पर्वका दृश्यहरू हेर्दा हामीलाई के थाहा छ भने यस्ता मेलापर्वहरूको राम्रो व्यवस्थापन र दक्ष मेलापर्व व्यवस्थापकले कलाको क्षेत्रमा दिगोपना र वृद्धिका थप सम्भाव्यताहरू ल्याउन सक्छन् । कलाकार, अभिनेता र सृजनशीलता उद्यममा आबद्ध वा यसमा रुचि राख्ने व्यक्तिहरूलाई दक्षिण एसिया फेस्टिबल एकेडेमीले समावेशी परिस्थितिमा व्यावसायिक दृष्टिकोण विकसित गर्न असाधारण मौका उपलब्ध गराउनेछ भने अन्तरराष्ट्रिय मेला व्यवस्थापकहरूको विज्ञताबाट पनि उनीहरूले लाभ उठाउन सक्नेछन् ।’

‘विश्वभर नै मेला एवं पर्वहरू कलात्मक अभिव्यक्ति, सांस्कृतिक संवर्द्धन र समावेशिताका लागि मञ्चका रूपमा हेरिन्छ । यसले स्थानीय अर्थतन्त्रमा उल्लेख्य प्रभाव पार्न सक्छ । यसको सांस्कृतिक महत्त्व बेलायत र नेपाल दुवैतिर निकै धेरै छ, अनि यसले स्थानीय अर्थतन्त्रमा महत्त्वपूर्ण योगदान दिन सक्छ । एकेडेमीका लागि नेपालबाट आवेदन पाउने आशामा हामी छौँ,’ उनले भनिन् ।

साफ्काले उपलब्ध गराएको इन्टरमेडियट कोर्स तीन वर्षको अनुभवको परिणाम हो । यो एकेडेमिक बीएन कोर्स अनुसार बनेको हो । यसले दक्षिण एसियाको अद्वितीय मेलापर्व र सांस्कृतिक प्रसंगलाई अपनाएको छ ।

यो प्रोग्राममा बेलायत र दक्षिण एसिया दुवैका फेस्टिबल एकेडेमिक्स र विज्ञहरूले सिकाउँछन् । यो खासगरी पर्व निर्देशक, संस्थापक, उद्यमी र दक्षिण एसियाभर कला र संस्कृति मेलाका वरिष्ठ व्यवस्थापकका लागि तयार पारिएको हो । यो १० हप्ता अवधिको गहन, संरचित सीप विकास कार्यक्रम हो । वरिष्ठ नेतृत्वदायक भूमिकामा सक्रिय अनुभव देखाउन सक्ने अनि मेला र संस्कृतिको क्षेत्रमा ५ देखि १० वर्षसम्म काम गरेको अनुभव भएकाबाट आउने निवेदनलाई विचार गरिनेछ । प्रतिव्यक्ति खर्च ७५० पाउन्ड (१ लाख २१ हजार ५०० सय रुपैयाँ) लाग्नेछ । तर, ब्रिटिस काउन्सिलले प्रतिव्यक्ति ५०० पाउन्ड सहुलियत दिनेछ । अर्थात् कुल खर्च २५० पाउन्ड (४० हजार ५०० रुपैयाँ) मात्रै हुनेछ ।

दक्षिण एसिया फेस्टिबल्स एन्ड कल्चर एकेडेमीसम्बन्धी थप विवरण र इन्टरमिडियट लेभल कोर्सका लागि काउन्सिलको वेबसाइट गएर आवेदन दिन सकिने बताइएको छ ।

ब्रिटिस काउन्सिल बेलायत र विश्वका अन्य देशका मानिसबीच कला, शिक्षा र अंग्रेजी भाषाको माध्यमबाट सम्बन्ध बनाएर एकआपसमा आबद्धता, समझदारी र विश्वास निर्माण गरिरहेको अन्तर्राष्ट्रिय संगठन हो । त्यसैगरी, दक्षिण एसिया फेस्टिबल्स एन्ड कल्चर एकेडेमी ब्रिटिस काउन्सिल र एडिनबर्ग न्यापियर विश्वविद्यालयबीचको असाधारण साझेदार हो । यो दक्षिण एसियाभर मेला/पर्व र कला उद्योगको अभिवृद्धि र यी उद्योगलाई मजबुत बनाउन तयार पारिएको संस्था हो । नवप्रवर्तनमुखी बृहत् अनलाइन कोर्सहरूमार्फत एकेडेमीले कला पेसाकर्मीहरूको वृत्ति र विकासलाई मलजल गर्ने काम गर्दछ ।

प्रकाशित मिति: बुधबार, कात्तिक १५, २०८० १३:१९