माओवादी कार्यालयमा तालाबन्दी गरेर द्वन्द्वकालका घाइतेहरूले छतबाट हाम फाल्छौँ भनेपछि...

माओवादी कार्यालयमा तालाबन्दी गरेर द्वन्द्वकालका घाइतेहरूले छतबाट हाम फाल्छौँ भनेपछि...

A+ A A-

सशस्त्र द्वन्द्वकालमा घाइते भएका माओवादी केन्द्रका कार्यकर्ताहरूले सातबुँदे माग राख्दै तीन महिनादेखि काठमाडौंमा शान्तिपूर्ण आन्दोलनमा छन् । माओवादी केन्द्रका अध्यक्ष तथा प्रधानमन्त्री पुष्पकमल दाहाल प्रचण्डसहितका नेताहरूलाई उनीहरूले अहिलेसम्म भेट्न पाएका छैनन् । पार्टी सरकारमा हुँदा पनि बेवास्ता गरिएको भन्दै उनीहरूको गुनासो छ ।

पार्टी अध्यक्ष प्रचण्डसहित शीर्ष नेताहरूलाई भेट्न नपाएपछि सशस्त्र द्वन्द्वकालका घाइतेहरूले बुधबार बिहान पेरिसडाँडास्थित पार्टी कार्यालयमा एक घण्टा तालाबन्दी गरेका छन् । सशस्त्र द्वन्द्वकालका घाइतेहरूलाई पार्टीले बेवास्ता गरेको भन्दै उनीहरूले कार्यालयभित्र पसेर तालाबन्दी गरेका हुन् । उनीहरूले बिहान १० देखि ११ बजेसम्म पार्टी कार्यालयभित्र पसेर भित्रबाट तालाबन्दी गरेका थिए ।

मुख्यसचिव डोरप्रसाद उपाध्याय पार्टी कार्यालयमै थिए । तर, घाइतेहरू पार्टी कार्यालयभित्र प्रवेश गरेपछि मुख्यसचिव उपाध्याय भने बाहिर निस्किएका थिए । त्यसपछि उनीहरूले भित्रबाट पार्टी कार्यालयको मुख्य प्रवेशद्वारमा ताला लगाइदिएका थिए । पार्टी कार्यालयमा आफूहरूले तालाबन्दी गरेपछि मुख्यसचिव उपाध्यायले उपमहासचिव जनार्दन शर्मालाई खबर गरेको आन्दोलनरत घाइते नरबहादुर दमाईंले जानकारी दिए ।

'हामीले कार्यालयभित्र प्रवेश गरेर ताला लगायाैँ । त्यसपछि मुख्यसचिव उपाध्यायले उपमहासचिव शर्मालाई जानकारी गराएछन् । शर्मा आएपछि हाम्रो वार्ता भयो,' दमाईंले शिलापत्रसँग भने । दमाईंका अनुसार उपमहासचिव शर्माले आज (बुधबार) नै प्रधानमन्त्री प्रचण्डसँग भेटाउने सहमति भएको छ ।

दमाईंले आफूहरूलाई सिंहदरबारभित्र जान पनि प्रतिबन्ध लगाइएको र नेताहरूले पनि भेट्न नचाहेको बताए । 'तीन महिनादेखि काठमाडौंमा बसिरहेका छौँ । हामीलाई सिंहदरबारभित्र जान प्रतिबन्ध लगाउनुका साथै नेताहरूले भेट्न नमानेपछि पार्टी कार्यालयभित्र पसेर भित्रबाट ताला लगाएका हौँ,' उनले भने, 'ताला फोड्छौँ भनेका थिए । ताला फोड्ने भए छतबाट हाम फाल्छु भनेपछि जनार्दन शर्मासँग वार्ता भएको हो । हाम्रा माग पूरा नभए छतबाट हाम फाल्छु ।’

घाइतेहरूको उपचार र जीविकोपार्जनका लागि केही गरिदिन भन्दै तीन महिनादेखि सिंहदरबार र माओवादीका नेताहरूकोमा धाउँदा पनि माग सुनुवाइ नभएपछि पेरिसडाँडामा तालाबन्दी गर्नुपरेको अर्का घाइते धनवीर भण्डारीले बताए ।

‘माओवादीका मन्त्री र प्रधानमन्त्रीका प्रमुख राजनीतिक सल्लाहकारलाई आफ्ना ७ बुँदे माग राख्दै ज्ञापनपत्र बुझायौँ । तर, कतैबाट सुनुवाइ भएन । दिउँसो १ बजे प्रधानमन्त्री भेटाउने प्रतिबद्धता जनार्दन शर्माले गर्नुभएको छ । नभेटाए पेरिसडाँडामै आमरण अनशन बस्छौँ,’ उनले भने ।

माओवादी केन्द्रका मुख्यसचिव उपाध्यायले भने पार्टी कार्यालयमा तालाबन्दी नभएको र उपमहासचिव शर्मासँग घाइतेहरूले छलफल गरेको बताए । ‘साथीहरूले तालाबन्दी गर्नुभएको होइन । जनार्दनजी पनि कार्यक्रमका लागि आउनुभएको थियो । बसेर छलफल भएको हो । अरु केही त्यस्तो भएको छैन,’ उनले भने ।

प्रकाशित मिति: बुधबार, कात्तिक १५, २०८० १२:३३