मन्त्री ज्वालाले भने– द्रुत बस सेवा रोकिएको होइन, तिहारको बिदा सकिएलगत्तै पूर्ण क्षमतामा चलाउँछौँ

मन्त्री ज्वालाले भने– द्रुत बस सेवा रोकिएको होइन, तिहारको बिदा सकिएलगत्तै पूर्ण क्षमतामा चलाउँछौँ

A+ A A-

संविधान दिवसदेखि सञ्चालनमा आएको रत्नपार्क–सूर्यविनायक द्रुत बस सेवा पूर्ण रूपमा सञ्चालन गर्न हाललाई रोकिएको छ । प्राविधिक र व्यवस्थापकीय पक्षमा देखिएका समस्याको हल गर्दै तिहार बिदा सकिएलगत्तै पुन: सञ्चालनमा आउने भौतिक पूर्वाधार तथा यातायातमन्त्री प्रकाश ज्वालाले बताएका छन् ।

‘दसैँदेखि तिहारसम्म राजधानीका सडकहरूमा जाम हुँदैन, यही बेला प्राविधिक र व्यवस्थापकीय समस्या सुल्झाउन द्रुत बस सेवा रोकिएको हो,’ मन्त्री ज्वालाले भने, ‘तिहारको बिदा सकिएकै दिनदेखि पूर्ण क्षमतामा द्रुत बस सञ्चालन हुनेछ ।’

'दसैँदेखि तिहारसम्म जाम नहुने समयमा द्रुत बस सेवा रोकिएपछि सामाजिक सञ्जाल र केही मिडियामा चर्चा गरिएको छ । तर, द्रुत बस सेवा रोकिएको होइन, अहिले २५ वटा मात्र द्रुत बस चलेका थिए, त्यो संख्या बढाएर लैजाने गरी तयारी थालिएको छ,’ मन्त्री ज्वालाले भने ।

गत असोज ३ देखिदेखि द्रुत बस पाइलट प्रोजेक्टका रूपमा सञ्चालन गरिएको थियो । अब पूर्ण रूपमा सञ्चालन गर्न लागिएको छ । रत्नपार्कदेखि धेरै सार्वजनिक बसहरू द्रुत लेनबाट सूर्यविनायक पुग्नेछन् । द्रुत बसको सर्भिस लेन पनि पूर्ण रूपमा प्रयोगमा आउनेछ ।

विगत एक महिनामा द्रुत बस सञ्चालनको अनुभव यातायात व्यवस्था विभाग, बागमती प्रदेश सरकार र यातायात व्यवसायीले लिएका छन् । देखिएका समस्याहरू हल गर्ने गरी मन्त्री ज्वालाले विभागका महानिर्देशकको नेतृत्वमा समिति पनि गठन गरेका छन् ।

‘द्रुत बसको लेनमा अब डोरी लगाइनेछ भने २५ वटा मात्र हैन, त्यो रुटमा चल्ने लगभग धेरै सार्वजनिक सवारीहरू गुड्नेछन्,’ यातायात व्यवस्था विभागका महानिर्देशक उद्धव रिजालले भने ।

रत्नपार्क–सूर्यविनायक चल्ने सबै सार्वजनिक बसहरू द्रुत लेनमा गएपछि बाँकी सडक लेन पनि खुल्ला हुनेछ । राजधानी काठमाडौंको जाम कम गर्ने, सवारीसाधनविहीन ‘भुईं मान्छे’लाई सार्वजनिक सवारी साधनमा आकर्षित गर्ने उद्देश्यले द्रुत बस सेवा सञ्चालन गरिएको हो ।

प्रकाशित मिति: सोमबार, कात्तिक १३, २०८० १६:१३