कहाँ पुग्यो मुगुमा भएको सामूहिक हत्याको अनुसन्धान, के गर्दै छ प्रहरी ?

A+ A A-

मुगुमा चार जनाको बीभत्स रूपमा सामूहिक हत्या भएको चार दिन पुगेको छ । शुक्रबार जिल्लाको छायानाथ रारा नगरपालिका– ६, मुन्दु गाउँमा अज्ञात समूहले धारिलो हतियार प्रयोग गरी २८ वर्षीया श्रीदेवी बोहोरा, उनका छोराहरू ११ वर्षीय मनोज, आठ महिनाका रहर बोहोरा र आठ वर्षीया छोरी अप्सरा बोहोराको हत्या गरेको थियो ।

कात्तिक ८ गते बिहानदेखि ताला लगाएको देखेपछि छिमेकीले १० गते शुक्रबार बिहान ९ बजेतिर ढोका खोलेर हेर्दा चारै जनाको बीभत्स हत्या गरिएको अवस्थामा गाउँलेहरूले देखेका थिए ।

वैदेशिक रोजगारीको सिलसिलामा कतारमा रहेका मृतक श्रीदेवीका श्रीमान् दीपक बोहोरा शनिबार घर पुगेपछि सोही दिन चारै जनाको शव जिल्ला अस्पताल मुगुमा ल्याइएको छ ।

घटनास्थल मुगु सदरमुकाम गमगढीदेखि पूर्व ४ घण्टाको दूरीमा छ । पोस्टमार्टमका लागि जिल्ला अस्पताल ल्याइएका आफ्ना श्रीमती र छोराछोरीको हत्यारा पत्ता नलागुञ्जेल शव नबुझ्ने अडान दीपकले लिएपछि पोस्टमार्टमसमेत हुन सकेको छैन ।

घटनालगत्तै जिल्ला प्रहरी कार्यालयबाट प्रहरी नायब उपरीक्षक (डीएसपी) वीरेन्द्र थापासहितको विशेष अनुसन्धान टोली घटनास्थलमा खटिएर सूक्ष्म अनुसन्धान गरिरहेको छ ।

शनिबार कर्णाली प्रदेश प्रहरी कार्यालय सुर्खेत (हाल नेपालगञ्ज) बाट तालिमप्राप्त कुकुरसहित कर्णाली प्रदेश प्रहरी कार्यालय सुर्खेत र जुम्लाबाट प्रहरीको विशेष अनुसन्धान टोलीले घटनास्थलमा विभिन्न कोणबाट अनुसन्धान जारी राखेको छ ।

आइतबार कर्णाली प्रदेश प्रहरी कार्यालयका प्रमुख प्रहरी नायब महानिरीक्षक (डीआईजी) भीमप्रसाद ढकालसमेत घटनास्थलमा पुगेका छन् । घटना घटेको पूरै गाउँलाई उच्च निगरानीमा राखेर अनुसन्धान गरिएको भए पनि हालसम्म खास 'क्लु' भने प्रहरीले भेट्टाउन सकेको छैन ।

केही व्यक्तिलाई घटनामा संलग्न भएको हुन सक्ने आशंकामा उच्च निगरानीमा राखेको प्रहरीले उनीहरूविरुद्ध बलियो प्रमाण भने जुटाउन सकेको छैन ।

अनुसन्धानमा प्रयोग गरिएका कुकुरले समेत घटनासँग समन्धित कुनै सुराक फेला पार्न सकेका छैनन् । यद्यपि, आइतबार एक शंकास्पद व्यक्तिलाई प्रहरीले नियन्त्रणमा लिएर सोधपुछ भने गरेको छ ।

परिचय गोप्य राखिएका ती व्यक्ति केही दिनयता मुन्दु गाउँमा पटक-पटक आउजाउ गरेको पाइएकाले नियन्त्रणमा लिएर सोधपुछ गरिएको अनुसन्धानमा खटिएका एक प्रहरी अधिकृतले बताए ।

घटनाको प्रकृतिअनुसार श्रीदेवीले लगाएका गहना र उनले प्रयोग गर्दै आएको मोबाइल फोन नभेटिनुले लुटपाट गर्ने उद्देश्यले हत्या भएको हुन सक्ने आशंका प्रहरीले गरेको छ ।

प्रहरीको प्रारम्भिक अनुसन्धानबाट ढोकामा नयाँ ताला लगाइएको तथा घटनापश्चात् कतारमा रहेका मृतक श्रीदेवीका श्रीमान् दीपकलाई श्रीदेवीले प्रयोग गर्दै आएको मोबाइलको म्यासेन्जरबाट छोराछोरीको शवसहितको फोटो पठाएको खुलेको अनुसन्धानमा संलग्न ती अधिकृतले बताए ।

जिल्ला प्रहरीका कार्यालय मुगुका प्रमुख प्रहरी नायब उपरीक्षक (डीएसपी) वीरेन्द्र थापाले हालसम्म पनि घटनामा संलग्न व्यक्तिका बारेमा ठोस प्रमाण फेला परिनसकेको बताए ।

अनुसन्धान जारी रहेकाले प्रमाण फेला पर्नेबित्तिकै पत्रकार सम्मेलन गरेर जानकारी गराउने उनले बताए ।

प्रकाशित मिति: सोमबार, कात्तिक १३, २०८० १२:४५