बालोन डी’ओर विजेताको नाम घोषणा हुँदै, मेस्सी र हालान्ड कसले जित्लान् यो उपाधि ?

बालोन डी’ओर विजेताको नाम घोषणा हुँदै, मेस्सी र हालान्ड कसले जित्लान् यो उपाधि ?

A+ A A-

विश्व प्रसिद्ध फुटबल अवार्ड बालोन डी’ओर विजेताको घोषणा अक्टोबर ३० अर्थात् भोलि सोमबार हुँदै छ । यस अवार्ड प्राप्त गर्नु कुनै पनि फुटबलरको सपना हो, किनभने यसलाई सबैभन्दा प्रतिष्ठित व्यक्तिगत फुटबल उपाधि मान्ने गरिएको छ ।

यसपटक लियोनल मेस्सी, अर्लिङ हालान्ड, किलियन एमबाप्पे, मोहम्मद सलाह, भिनिसियस जुनियर, जुलियन अल्भारेजजस्ता ३० चर्चित खेलाडीहरू यस अवार्डको मनोनयनमा परेका छन् ।

तर, हाल अमेरिकी क्लब इन्टर मायामीबाट खेलिरहेका मेस्सी र इंग्लिस क्लब म्यानचेस्टर सिटीका हालान्ड बालोन डी’ओर उपाधिका सम्भावित विजेता हुन् । उसो त मेस्सीले बालोन डी’ओर सातपटक जितिसकेका छन् । सबैभन्दा बढी बालोन डी’ओर पाएर कीर्तिमानी बनाउने ३६ वर्षे मेस्सी एक्ला खेलाडी हुन् ।

उता हालान्डले गत सिजन ट्रेबल उपाधि हात पारे । उनले युरोपियन च्याम्पियन्स लिग, प्रिमियर लिग र एफए कप जित्दा सबै प्रतिस्पर्धामा ५२ गोल गरे । हालै युरोपका उत्कृष्ट खेलाडी बनेर यूईएफए अवार्ड पाएका सिटीका हालान्डलाई यसपटक बालोन डी’ओरको एक दाबेदार खेलाडी मानिएको छ ।

तर, उनले ट्रेबल जिते पनि मेस्सीले विश्वकप, फ्रेन्च सुपर कप र लिग वान जितेकाले मेस्सीले नै बालोन डी’ओर जित्ने टिप्पणी भइरहेका छन् । मेस्सीले गत सिजन पीएसजीका लागि ३२ गोल गर्दा २५ गोलका लागि असिस्ट दिए । फुटबल विज्ञहरूका अनुसार विश्वकपमा उत्कृष्ट नतिजा ल्याउन सफल भएकै कारण पनि मेस्सीले बालोन डी’ओर जित्नेछन् । कतारमा भएको विश्वकप जित्दा मेस्सीले सात गोल गरेका थिए, उनी विश्वकपकै उत्कृष्ट खेलाडी घोषित भएका थिए ।

विश्वचर्चित फुटबल प्रशिक्षक पेप ग्वार्डिओला अहिले म्यानचेस्टर सिटीका प्रशिक्षक छन् । यसअघि ग्वार्डिओलाले बार्सिलोनामा पनि प्रशिक्षकको भूमिका निर्वाह गरिसकेका थिए ।

उनले प्रशिक्षण दिइरहेका हालान्ड बालोन डी’ओरको दौडमा छन् भने उनले प्रशिक्षण दिइसकेका खेलाडी मेस्सी पनि यसपटक आठौँ बालोन डी’ओर जित्ने होडमा छन् ।

यस्तोमा हालान्ड र मेस्सीलाई नै प्रशिक्षण दिइसकेका ग्वार्डिओलाले यसपटकको बालोन डी’ओर कसले जित्छन् भनेर धारणा राखेका छन् ।

मेस्सी र हालान्डमा कसले बालोन डी’ओर जित्नुपर्छ भनेर सोधिएको प्रश्नमा उनी भन्छन्, ‘मेस्सीका लागि सबैभन्दा खराब सिजन बाँकी खेलाडीहरूका लागि उत्कृष्ट हुन जान्छ । यसपटक हालान्ड र मेस्सी दुवै बालोन डी’ओरका लागि योग्य छन् ।’

उनी थप भन्छन्, ‘हालान्डले हामीलाई ट्रेबल उपाधि दिलाउन मद्दत गरे, जसका कारण म हालान्डले यो उपलब्धि हासिल गरून् भन्ने चाहन्छु, म त्यो हेर्न चाहन्छु । तर, मेस्सीले विश्वकप जितेका छन्, उनले बालोन डी’ओर जिते भने त्यो अन्याय हुने छैन ।’

उनले मजाक गर्दै एउटा बालोन डी’ओर मेस्सीका लागि सधैँ दिइनुपर्ने र अर्को एक बालोन डी’ओर बाँकी खेलाडीका लागि छुट्याउनुपर्ने पनि बताएका छन् । ईएसपीएन र एजेन्सीको सहयोगमा

प्रकाशित मिति: आइतबार, कात्तिक १२, २०८० १५:५३