किन आउँछ डन्डिफोर ? (भिडियो)

A+ A A-

सामान्यतया किशोरावस्थामा डन्डिफोर आउने समस्याले धेरैलाई सताइरहेको हुन्छ । यो समस्याबाट छुटकारा पाउनका लागि किशोरकिशोरी विभिन्न उपाय अपनाइरहेका हुन्छन् ।

धेरैले डन्डिफोर आउनेबित्तिकै त्यसलाई कोट्याउने, निचोर्ने वा फोड्ने गरिन्छ । यसो गर्दा पाक्ने वा संक्रमण हुने छाला रोग विशेषज्ञ प्रा.डा. धर्मेन्द्र कर्ण बताउँछन् । उनी भन्छन्, ‘डन्डिफोरलाई चलाउने हो भने खत बस्छ । कालो दाग बस्छ । र, संक्रमण समेत हुन सक्छ ।’

सामान्यतया डन्डिफोर देखिएको अवस्थामा यो आफैँ निको भएर जाने गर्छ । तर, यसलाई कोट्याउने हो भने थप समस्या भने निम्त्याउन सक्छ । डन्डिफोरलाई दुई प्रकारमा विभाजन गरिएको डा. कर्ण बताउँछन् ।

उनी भन्छन्, ‘एउटा सामान्य रूपमा देखिने डन्डिफोर हुन्छ, जसलाई एक्ने भलगारिस भनिन्छ । र, अर्को टाउको, ढाडमा पिलोजस्तो आउने डन्डिफोर हुन्छ ।’

साधारण खालको सबैमा देखिने डन्डिफोर प्रायःजसो अनुहार, ढाड र छातीमा देखिने गर्छ । यो १५ देखि २५ वर्षको उमेर समूहमा देखिने गर्छ । कहिलेकाहीँ भने योभन्दा माथिको उमेर समूहमा पनि देखिन सक्छ ।

डा. कर्णका अनुसार शरीरको वृद्धि र विकास हुँदै जान्छ । त्यतिबेला विभिन्न किसिमका हर्मोनहरूका कारण शरीरमा चिल्लोपना बढ्दै जान्छ । र, चिल्लोपना निकाल्ने ग्रन्थी अनुहार, ढाड र छातीमा धेरै हुन्छ । चिल्लोपना धेरै निस्कने भए पनि चिल्लोपना निकाल्ने ग्रन्थीको मुख बन्द हुँदा खटिरा आउने हुन्छ ।

उनी भन्छन्, ‘र, त्यसलाई ब्ल्याक हेड र ह्वाइट हेड भन्ने गरिन्छ । यसलाई समयमै उपचार गरिएन भने त्यसमा संक्रमण भएर रातो हुने, पाक्ने र घाउ हुने हुन्छ । डन्डिफोर आउनु आफैँमा नराम्रो होइन । यो सामान्य विकासको एक प्रक्रिया हो । हरेक व्यक्तिलाई डन्डिफोर आउनैपर्छ ।

कस्ता व्यक्तिमा बढी ?

अस्वस्थकर खानपानको बढी प्रयोग गर्ने व्यक्तिहरूमा डन्डिफोरको समस्या धेरै देखिने गरेको डा. कर्ण बताउँछन् । उनी भन्छन्, ‘जंकफुड र धेरै डेरी प्रोडक्टहरूको प्रयोग गर्ने व्यक्तिमा यो समस्या बढी देखिने गर्छ । त्योबाहेक धेरै कस्मेटिकको प्रयोगले पनि यो समस्या निम्तिन सक्छ ।’

त्यस्तै, महिनावारी गडबडी हुने महिलामा यो धेरै देखिने गर्छ । साथै, तनावका कारण पनि डन्डिफोर धेरै देखिने गरेको डा. कर्णको भनाइ छ ।

भिडियो: