सुरुमा राम्रो प्रदर्शन गरेर फाइनलमा चुक्दा यूएईलाई उपाधि सुम्पिन बाध्य भएको नेपाल

सुरुमा राम्रो प्रदर्शन गरेर फाइनलमा चुक्दा यूएईलाई उपाधि सुम्पिन बाध्य भएको नेपाल

तस्वीरहरूः क्यान ।

A+ A A-

नेपालमा भएको त्रिदेशीय टी- २० अन्तर्राष्ट्रिय क्रिकेटमा नेपालले आफ्ना सुरुवाती चारै खेलमा जित निकालेको थियो । केहीबाहेक खेलाडीहरू राम्रो लयमा थिए । समर्थकहरूलाई विश्वास थियो- फाइनलमा नेपालले सहज जित निकाल्ने छ ।

यसअघिका अन्य खेलहरू मूलपानीस्थित क्रिकेट मैदानमा खेलाइएको थियो । मूलपानीमा भएका दुई खेलमा नेपालले यूएईवीरद्ध नै ७ विकेट र ५ विकेटको जित निकालेको थियो ।

त्यस्तै नेपालले मूलपानीमै हङकङविरुद्धका दुई खेलमा ६ विकेट र ७९ रनको जित निकालेको थियो । यही सिरिजअन्तर्गत भएका चार खेलमा लगातार जित निकालेको र फाइनल खेल्ने यूएईलाई पनि दुई पटक पराजित गरेको नेपाल आत्मविश्वासका साथ मैदानमा उत्रिएको थियो ।

उता यूएई भने चारमध्ये तीन खेलमा पराजित र एक खेलमा हङकङविरुद्ध जित निकाल्दै फाइनलमा पुगेको थियो । तर, शुक्रबार त्रिवि क्रिकेट मैदानमा भएको खेलमा नेपाललाई चार विकेटले पराजित गर्दै यूएईले उपाधि चुमेको हो ।

शुक्रबार कीर्तिपुरमा पाहुना टोली यूएई बलिङ र ब्याटिङ दुवैमा नेपालविरुद्ध हाबी भएको थियो ।

टस हारेर सुरुवाती ब्याटिङ गरेको नेपालले १६२ रनको स्कोर खडा गर्दै यूएईलाई जितका लागि १६३ रनको लक्ष्य दिएको थियो । यूएईले उक्त लक्ष्य निर्धारित २० ओभर सकिन एक बल बाँकी छँदा ६ विकेट गुमाएर पूरा गर्‍यो ।

विजयी लक्ष्य पछ्याउने क्रममा यूएईले उत्कृष्ट सुरुवात गरेको थियो । यूएईका ओपनरद्वय मोहम्मद वासिम र आर्यन्स शर्माले उत्कृष्ट ब्याटिङ गर्दै आफ्नो टोलीलाई जिततर्फ अग्रसर बनाए ।

यो जोडीले पहिलो विकेटका लागि ४१ बलमा ७१ रनको साझेदारी गरे । वासिम ४५ रन र शर्मा २५ रनमा आउट भए ।

वासिम नेपालका तीव्र गतिका बलरसामु आक्रामक रहे । यस क्रममा नेपालको इनिङ सुरु गरेका सोमपाल कामीले पहिलो ओभरमा नै १७ रन खर्चिए । त्यसपछि पनि यूएईले नेपाली बलरलाई दबाबमा पारेका थिए ।

पावर प्लेमा युएईले बिनाविकेट ६७ रन बनाउँदै आफूलाई जिततर्फ अग्रसर बनाउँदा पहिलो विकेटका लागि नेपालले सातौँ ओभरसम्म प्रतीक्षा गर्नुपरेको थियो । सातौँ ओभरमा वासिम आउट भएसँगै नेपालले लयमा फर्किने प्रयास गर्‍यो । गुल्सन झाले पहिलो विकेट लिएसँगै नेपालले यूएईलाई दबाबमा पार्न खोजेको थियो ।

त्यस्तै कुशल मल्लले १०औँ ओभरमा दोस्रो विकेट लिए । उनले अर्यान्सलाई सन्दीप जोराबाट क्याच आउट गराए । लगत्तै ११औँ ओभरमा गुल्सनले आक्रामक ब्याटर आसिफ खानलाई ७ रनमै पेवेलियन फर्काए ।

तेस्रो विकेट लिएसँगै नेपालले यूएईको रनको गतिलाई रोक्ने प्रयास गर्‍यो । यद्यपि, यूएईका ब्याटरले सम्हालिएर खेल्दै घरेलु टोलीको योजना सफल हुन दिएनन् । यूएईका युवा ब्याटर भृत्य अरविन्दले २६ रन र बसिल हामिदले अविजित २२ रन बनाउँदै जित दिलाए ।

अन्तिम ओभरमा यूएईलाई जितका लागि ७ रन आवश्यक थियो । डेथ ओभरको सुरुआतमा करणले कसिलो बलिङ गरे । तर, बसिलले पाँचौँ बलमा छक्का प्रहार गर्दै एक बलअगावै जित दिलाए ।

नेपालको बलिङमा गुल्सन र अविनाश बोहोराले दुई/दुई विकेट तथा कुशल मल्लले एक विकेट लिए । अनुभवी बलर सोमपाल कामी र करण निकै महँगा सावित भए ।

त्यसअघि टस हारेर ब्याटिङको निम्तो पाएको नेपालले निर्धारित २० ओभरमा आठ विकेट गुमाउँदै एक सय ६२ रनको योगफल बनाएको थियो ।

नेपालका ओपनर कुशल भुर्तेलले ५० रनको अर्धशतकीय योगदान गरे । उनले २८ बलमा ६ चौका र तीन छक्का प्रहार गरे । करण २३ रनमा नटआउट रहँदा दीपेन्द्रसिंह ऐरीले २० रन, कप्तान रोहितकुमार पौडेलले १८, सोमपालले १३ र सन्दीपले १० रन बनाए ।

नेपालले राम्रो सुरुवात गरे पनि विशाल योगफल भने बनाउन सकेन । कुशल भुर्तेल र आसिफ शेखले ४३ रनको साझेदारी गरेका थिए । यद्यपि, आसिफ सात रन र कुशल मल्ल १ रनमा नै आउट भए ।

यूएईका आयन अफजल खानले तीन विकेटसँगै किफायती बलिङ गर्दै नेपाललाई दबाब बनाए ।

४ ओभरमा १९ रन खर्चिएका उनी म्यान अफ दी म्याच पनि भए । जाहुर खान र अली नासिरले समान दुई तथा जुनैद सिद्दिकीले एक विकेट लिए । जाहुरले २०औँ ओभरमा दुई रन मात्र दिँदै नेपालको इनिङलाई विशाल लक्ष्यतर्फ अग्रसर हुनबाट रोके । करण केसीले उनको ओभरको अन्तिम बलमा मात्र दुई रन लिए ।

यससँगै आईसीसी ट्वान्टी–२० विश्वकप छनोटको एशियाली क्वालिफायरको तयारीस्वरूप खेलिएको श्रृंखलामा नेपालले समूहका चारै खेलमा जित निकाले पनि फाइनलमा भने पराजित हुन पुग्यो ।

यससँगै करण केसी सिरिजको उत्कृष्ट खेलाडी चुनिएका छन् । उनी सिरिजको उत्कृष्ट बलर पनि चुनिएका छन् । सर्वोत्कृष्ट खेलाडी बनेका करणले १६० सीसीको पल्सर बाइक पाएका छन् । फाइनलमा विकेटविहीन भए पनि करणले पहिलो खेलमा यूएईको ३, दोस्रो खेलमा हङकङको ४, तेस्रो खेलमा हङकङकै २ र चौथो खेलमा यूएईको १ सहित सिरिजमा कुल १० विकेट लिएका छन् ।
उत्कृष्ट ब्याटर भने यूएईका बसिल हमिद चुनिएका छन् । बसिमले ५ खेलमा १५९ रन बनाएका थिए ।