कतार राेजगारीमा ठगिएर गाउँ फर्केका कञ्चनपुरे धन्नुबहादुर उखु खेतीबाट मालामाल

कतार राेजगारीमा ठगिएर गाउँ फर्केका कञ्चनपुरे धन्नुबहादुर उखु खेतीबाट मालामाल

फाइल तस्वीर ।

A+ A A-

वैदेशिक रोजगारीबाट सोचेजस्तो कमाइ नभएपछि घर फर्केका कञ्चनपुर शुक्लाफाँटा नगरपालिका–१२ कालगौँडीका धन्नुबहादुर रानाले उखु खेती गरी मनग्य आम्दानी गर्दै आएका छन् । ६ वर्षदेखि उखु खेती गर्दै आएका उनले वार्षिक ६ लाख रुपैयाँभन्दा बढी आम्दानी गर्दै आएका छन् । ट्रेन्च प्रविधिमा रानाले उखु खेती गरिरहेका छन् ।

चार बिघा जग्गामा रानाले उखु लगाएका छन् । 'पाँच बिघा जग्गामध्ये एक बिघा जग्गा मेरो स्वामित्वको हो, एक बिघा जग्गामा धान र गहुँ लगायतका बाली लगाउँछु, चार बिघा जग्गा लिजमा लिएर उखु खेती गरेको छु', उनले भने । चार बिघा जग्गामा एक हजारदेखि एक हजार सात सय क्विन्टलभन्दा बढी उखु उत्पादन हुने गरेको उनले बताए ।

'उत्पादित उखु चिनी मिलले खेतबाटै गाडीमा ढुवानी गरिदिने गरेको छ । पैसा बैङ्क खातामा मिलले नै हालिदिन्छ, उखु लगाउने, गोडमेल गर्ने, सिँचाइ गर्ने, मलखादको व्यवस्था गर्ने, कटान गरी मुठा बाँधेर राख्ने काम मात्रै मैले मजदुर लगाएर गर्ने गरेको छु', रानाले भने ।

मजदुरको ज्याला, सिँचाइ, मलखाद, जोताइमा गरी एक लाखदेखि एक लाख ३० हजार रुपैयाँसम्म खर्च आउने गरेको उनले बताए । घरमै बसी बसी आम्दानी हुँदै आएकाले यस खेतीलाई आधा दशकदेखि निरन्तरता दिँदै आएको रानाकाे भनाइ छ ।

उनका अनुसार, एकपटक लगाएपछि तीन वर्षसम्म उखुलाई सामान्य मिहिनेत गरी आम्दानी लिन सकिन्छ । उनले भने, 'वैदेशिक रोजगारीबाट धेरै कमाई गर्न सकिन्छ भनेर नै गाउँकै साहुबाट तीन लाख रुपैयाँ कर्जा निकालेर कतार पुगेर काम गरेँ, मासिक ५० हजार रुपैयाँ तलब पाइन्छ भनेर दलालले लाेभ्याएकाे थियाे । तर कम्पनीले महिनाको २० हजार रुपैयाँ मात्रै तलब दिने कुरा उहीँ पुगेपछि थाहा पाएँ ।'

याे तलबमा पनि खाना खर्च ब्यहोर्नुपर्दा १५ हजार जति मात्रै बचत हुने गरेको उनले बताए । तलबको केही रकम बचत गरी साहुको ऋण तिर्न भ्याएपछि घर फर्केको रानाले सुनाए । वैदेशिक रोजगारीमा गएको भए पनि घर फर्कंदा रित्तो हात फर्केको तीतो अनुभव उनीसँग छ ।

कम्पनीमा इलेक्ट्रोनिकसम्बन्धी काम सिकेकाले हाउस वाइरिङको काम गर्न थालेपछि केही रकम जम्मा गरी उखु खेतीलाई व्यावसाय बनाएकाे उनको भनाइ छ ।

उनी उखु खेतीसँगै हाउस वाइरिङको काम पनि गर्छन् । रानाले भने, 'श्रीमतीले सिलाइकटाइको काम गर्छिन्, उखु खेतीको आम्दानीसँगै दुवै जनाले गर्ने कामबाट वर्षमा तीन लाख रुपैयाँ जति अतिरिक्त आम्दानी हुन्छ ।'

विदेशमा भन्दा स्वदेशमै काम गरे परिवारसँगै बसेर सहज रूपमा आम्दानी गर्न सकेकाेमा उनी सन्तुष्ट छन् । भन्छन्, 'त्यसका लागि धैर्य, इच्छाशक्ति र लगनशीलताको खाँचो छ, व्यवसायमा थोरै लगानी गरेर पनि धेरै कमाउन सकिन्छ ।'

रानाजस्तै कालागौँडी गाउँका ७० बढी किसानले व्यावसायिक रूपमा उखु खेती गर्दै आएका छन् । उखु खेती हुने गाउँका रूपमा परिचित कालागौँडीका किसानको वार्षिक आम्दानी तीन लाख रुपैयाँदेखि १२ लाखसम्म रहेको वडाअध्यक्ष नवलसिंह राना बताए । 'उखु खेती गर्दा बीउ, कृषि औजार, मलखाद र सिँचाइमा अनुदानको व्यवस्था गरिए उखुको उत्पादन बढ्न सक्छ, किसानको आम्दानी बढछ, वैदेशिक रोजगारीमा जाने युवाहरुलाई स्वदेशमै रोक्न सकिन्छ', उनले भने । (राससकाे सहयाेगमा)

प्रकाशित मिति: शनिबार, कात्तिक ११, २०८० ०५:३०