मलेसियाबाट फर्केर गाउँमै ड्राइभिङ सेन्टर र सुन्तला खेतीमा रम्दै सुमन प्रधान

मलेसियाबाट फर्केर गाउँमै ड्राइभिङ सेन्टर र सुन्तला खेतीमा रम्दै सुमन प्रधान

तस्वीर : रासस

A+ A A-

सीप मानिसको जिउन सक्ने पहिलो आधार हो । सीप भए केही न केही उद्यम गरेर जीवनयापन चलाउन सम्भव बन्छ । आफ्नो सीप तथा क्षमताले स्वदेश तथा विदेशमा राम्रो तलब लिएर काम गर्न सक्ने वातावरण पनि तयार हुन्छ ।

तुलानात्मक रूपमा हेर्ने हो भने सवारीसाधनको क्षेत्रमा काम गरेर धेरै मानिस स्वरोजगार बनेको देख्न सकिन्छ । खास गरेर युवावर्गलाई सवारीसाधन चलाउन सिक्ने बढी चाहना हुन्छ । तर, भोजपुरवासीलाई सवारीसाधन चलाउन सिक्न भने त्यति सहज छैन । उनीहरूलाई सवारीसाधन चलाउने सीप आर्जन गर्न जिल्लाबाहिरका शहरमा जानुपर्ने बाध्यता छ । यसरी सीप लिनका लागि बाहिर जाँदा धेरै खर्च हुन्छ ।

भोजपुरवासीले भोगेको दुःखलाई ध्यानमा राखेर वैदेशिक रोजगारीबाट फर्किएका युवा सुमन प्रधानले आफू स्वरोजगार बन्ने र अरुलाई पनि स्वरोजगार बन्न उत्प्रेरित गर्ने उद्देश्यले ड्राइभिङ सेन्टर सञ्चालन गरेपछि स्थानीयवासीलाई सहज भएको छ ।

विदेशमा दुई वर्ष बिताएर आएका सुमनले सीपको अभावमा मलेसियामा नेपालीले पाएको दुःख देख्न नसकेर आफ्नै गाउँमा फर्केर पहिलोपटक यो काम सुरु गरेको बताए ।

'मानिसलाई सहज रूपमा जीवनयापन गराउने आधार नै सीप हो,' उनले भने, 'सीप भएको मानिसले जहाँ पनि आफ्नो क्षमता देखाएर खान सक्छ । विदेशमा पनि सीपका कारण धेरैले दुःख पाएको देखेँ । त्यहाँका नेपालीले भोगेको दुःख बुझेरै सवारीसाधन चलाउने सीप प्रदान गर्दै आएको छु ।'

योसँगै आफूले टेम्केमैयुङ–२ कृषि समूह गठन गरेर छिनामखुमा व्यावसायिक सुन्तला खेतीसमेत गर्दै आएको प्रधानले बताए । उनले भने, 'मेरो अगुवाइमा कृषि समूह गठन गरेर अरुलाई पनि यसमा समेटेको छु । विदेशमा गएर दुःख गर्नुभन्दा यहीँ नै फरक ढङ्गले काम गर्ने हो भने राम्रो आम्दानी लिन सकिने रहेछ ।'

कृषिबाट बाँकी रहेको समय सदुपयोग गर्दै व्यवसायी प्रधानले पाँच वर्षअघिदेखि पाथीभरा ड्राइभिङ सेन्टर खोलेर स्थानीयवासीलाई दुई पाङ्ग्रे, तीनपाङ्ग्रे र चारपाङ्ग्रे सवारीसाधन चलाउन सिकाउँदै आएका छन् ।

'विदेशमा धेरै दुःख गरियो । त्यहाँ गर्ने मिहिनेत यहीँ गर्ने हो भने राम्रो आम्दानी हुने रहेछ,' व्यवसायी प्रधानले भने, 'आफ्नै ठाउँमा फरक केही काम गरेर उदाहरणीय बनौँ भनेर जिल्लामै पहिलोपटक यो काम थालेको हुँ । मैले सीप सिकाएका धेरै जना आफैँ स्वरोजगार बनेर काम गरिरहेका छन् । यहाँ सीप सिकेर वैदेशिक रोजगारीमा गएका दुई जनाले ड्राइभिङ गरेर राम्रो तलब खाँदै छन् ।'

भोजपुर नगरपालिका– ५ मा वार्षिक ७५ हजार रुपैयाँमा पाँच रोपनी जग्गा भाडामा लिएर सीप सिकाउँदै आएको तर यो सेन्टर सञ्चालन गरे पनि त्यसलाई धान्न भने समस्या रहेको उनको भनाइ छ ।

'सीप लिनका लागि स्थानीयवासीलाई धेरै खर्च गरेर बाहिर जानुपर्ने समस्या अन्त्य भएको छ,' प्रधानले भने, 'तर सानो ठाउँ भए पनि व्यवसाय धान्न भने निकै सकस भएको छ । यस्ता सीपमूलक काम गर्ने मानिसलाई स्थानीय सरकारले पनि प्रोत्साहन गर्नुपर्छ ।'

हालसम्म जिल्लाका ७ सयभन्दा बढीलाई सवारीसाधन सञ्चालनसम्बन्धी सीप दिलाएका प्रधानले भोजपुरजस्तो सानो ठाउँमा सञ्चालन गरेको यो व्यवसायबाट आफूले पनि सीप सिक्न पाउँदा खुसी लागेको अरुण गाउँपालिकाका युवा सचिन भुजेलले बताए ।

आफ्नै ठाउँमा सीप सिक्न पाउँदा धेरै खर्च गरेर धरान, इटहरी, विराटनगरलगायत शहरमा जानुपर्ने बाध्यता हटेको र यही सीप सिकेर अहिले आफू स्वरोजगार बनेको उनको भनाइ थियो ।

'जिल्लामै सीप सिकेर स्वरोजगार बनेको छु,' सचिनले भने, 'सीप सिकेर अहिले गाउँपालिकाको गाडी चलाउँदै आएको छु । आफ्नै ठाउँमा सीप लिन नपाएको भए यो सम्भव थिएन । सीपले मलाई जीवन गुजारा गर्न सहज बनेको छ । मजस्ता धेरै साथीहरूले आफ्नो खाएर घर पाएकमै सीप लिन पाएका छन् ।' रासस

प्रकाशित मिति: बुधबार, कात्तिक ८, २०८० ०८:५७