एसीसी यु-१९ प्रिमियर कप: साउदी अरबलाई हराउँदै नेपाल सेमिफाइनलमा

A+ A A-

साउदी अरबलाई फराकिलो रनले हराउँदै नेपाल एसीसी यु-१९ प्रिमियर कप क्रिकेटको सेमिफाइनल प्रवेश गरेको छ ।
बिहीबार भएको समूह चरणको अन्तिम खेलमा नेपालले साउदी अरबलाई ३०१ रनले पराजित गरेको हो ।

नेपालले दिएको ३४८ रनको लक्ष्य पछ्याएको साउदी अरब १९.१ ओभरमा सबै विकेट गुमाएर ४६ रनमै समेटियो । साउदी अरबका लागि बरुण सरवणन मुदलियारले सर्वाधिक ११ रनको योगदान दिए ।

यस्तै, अब्दुल्लाह सिराज र मुहम्मद अहमदले समान ९-९ रनको योगदान दिँदा मुहम्मद अहमत राजाले ४ रन जोडे । अन्य ब्याटरले भने खाता नै नखोलेर पभिलियन फर्किएका थिए ।

नेपालका लागि दिपेश कँडेलले सर्वाधिक ६ विकेट लिए । यस्तै, आकाश चन्दले २ तथा सुवास भण्डारीले १ विकेट लिए ।

यसअघि टस हारेर पहिले व्याटिङ गरेको नेपालले निर्धारित ५० ओभरमा ८ विकेट गुमाएर ३४८ रनको योगफल तयार पारेको थियो । नेपालका लागि अर्जुन कुमालले सर्वाधिक १ सय ४२ रनको योगदान दिए ।

यस्तै, आकाश त्रिपाठीले ८९, ओपनर दिपक बोहराले २९ रन बनाउँदा विशाल विक्रम केसीले अविजित २४ रन बनाए । यसैगरी, दिपक प्रसाद डुम्रे र दिपेश कँडेलले समान १४-१४ र मिलन बोहराले ९ रन बनाएका छन् ।

साउदीका मुहम्मद राजा र मुहम्मद अहमदले समान २-२, अब्दुल्लाह सिराज, जुहिर मुहम्मद र सजिव मुजिवुर रहमानले समान १-१ विकेट लिए ।

नेपालले आफ्नो पहिलो खेलमा इरानलाई २७४ रन र दोस्रो खेलमा बहराइनलाई ७ विकेटले पराजित गरेको थियो । प्रतियोगितामा शीर्ष तीनमा रहने टिमले यु-१९ एसिया कपमा स्थान बनाउनेछन् ।

प्रकाशित मिति: बिहीबार, कात्तिक २, २०८० १३:०९