महासेठले मापदण्ड नपुगेका अग्रवाललाई प्रदेश कमिटीमा ल्याएपछि एमालेमा बढ्यो असन्तुष्टि

महासेठले मापदण्ड नपुगेका अग्रवाललाई प्रदेश कमिटीमा ल्याएपछि एमालेमा बढ्यो असन्तुष्टि

A+ A A-

एमालेका सचिव रघुवीर महासेठले मधेश प्रदेश अधिवेशनबाट प्रदेश कमिटीमा राजेश अग्रवाललाई सदस्य बनाएपछि असन्तुष्टि बढेको छ । प्रदेश कमिटीको सदस्यका लागि योग्यता नै नपुगेको भन्दै एमालेको मधेश प्रदेशमा असन्तुष्टि बढेको हो । सचिव महासेठको व्यक्तिगत पहलमा अग्रवाललाई सदस्यमा सर्वसम्मत गरिएको छ ।

राजनीतिमा भर्खर छिरेका अग्रवाललाई एकैपटक महासेठले आफ्नो व्यक्तिगत फाइदाका लागि प्रदेश सदस्य बनाएको एमाले नेताहरूको आरोप छ । एक वर्षअघि राजनीतिमा आएका अग्रवाल महासेठकै पहलमा एमालेसँग जोडिएका हुन् ।

एमालेमा एक वर्षअघि जोडिएको भए पनि महासेठ र अग्रवालको सम्बन्ध भने निकै लामो समयदेखि भएको बताइन्छ । अग्रवालले प्रदेश कमिटीमा स्थान पाउँदा लामो समयदेखि महासेठकै छाहारी मूनि राजनीतिक गर्ने कार्यकर्ताले त्यो स्थान पाउन नसकेपछि असन्तुष्टि बढेको हो । महासेठप्रति कटाक्ष गर्दै एमालेका एक नेताले भन्छन, ‘महासेठजी नेताभन्दा बढी व्यापारी हुन् । व्यापारीले कुनै पनि अवस्थामा आफ्नो फाइदा खोज्ने हो ।’

मापदण्ड नपुगेका अग्रवालको विषयमा एमालेमा असन्तुष्टि देखिएपछि शिलापत्रले अग्रवालसँग सम्र्पक गर्ने प्रयास गरेको थियो । शिलापत्रले मापदण्ड नपुगी प्रदेश कमिटीमा चयन भएको विषय विवादित भएकोबारे अग्रवाललाई प्रश्न गर्दा उनले मापदण्ड पूरा भएको वा नभएको विषयमा पार्टीसँग सोध्न आग्रह गरे । यो विषयमा थप केही बताउन नचाहेका अग्रवालले थप नबोली फोन काटिदिए । केही समयअघि अग्रवालमाथि जमिन खरिदविक्रिमा राजस्व छली गरेको आरोप लागेको थियो ।

अग्रवाललाई प्रदेश कमिटीमा छिराउन सफल महासेठले शिवशंकर साह (हीरा)को पक्षमा लिएको अडान पनि विवादित थियो । डेढ वर्षअघि एमालेमा प्रवेश गरेर जनकपुरधाम उपमहानगरपालिकाको मेयरको उम्मेदवार भएका हीरालाई महासेठले प्रदेश अध्यक्ष बनाउन खोजेका थिए । अध्यक्षमा हीराको नाम प्रस्ताव हुने वित्तिकै महासेठकै समूहका नेताले विरोध गरेका थिए ।

अध्यक्ष्मा हीराको नाममा आफ्नै समूहमा प्रश्न उठेपछि उपाध्यक्ष बनाउन खोजेका थिए । त्यसमा पनि प्रश्न उठ्यो र विचारी यादवको नाममा सहमति जुटाइयो । त्यसपछि महासेठले हीरालाई सचिव बनाउन प्रस्ताव गरे । पार्टी र समूह दुवैमा हीरालाई सचिव बनाउन पनि सहमति जुटेन । महासेठ जसरी पनि हीरालाई प्रदेश कमिटीमा अटाउन खोजिरहेका थिए । तर, त्यो संभव भएन । महासेठले हीराको पक्षमा यतिधेरै किन लागेका छन् ? भन्ने प्रश्न प्रदेश कमिटीमा उठेको थियो । त्यसपछि अग्रवालको पक्षमा लिएको अडानले पनि प्रश्न उठाएको थियो । हीरालाई सेटल गर्न नसकेका महासेठले अग्रवाललाई मापदण्ड नपुगे पनि सदस्यमा सेटल गराउन सफल भएका छन् ।

एमालेका एक नेताले भने, ‘महासेठजीले राजनीतिलाई व्यापार बनाइदिनुभयो । पार्टीको टिकट वितरणदेखि समानुपतिकमा सांसद छनोट तथा कुनै लाभको पदमा कार्यकार्तालाई मनोनीत गर्दा पनि लाभको आस राख्ने नेतामा पर्नुहुन्छ ।’

प्रकाशित मिति: बुधबार, कात्तिक १, २०८० २०:२०