सरकारको भ्रष्टाचारविरोधी अभियानले माओवादी आन्दोलनमा ऊर्जा थपेको छः रञ्जित तामाङ (भिडियो वार्ता)

सरकारको भ्रष्टाचारविरोधी अभियानले माओवादी आन्दोलनमा ऊर्जा थपेको छः रञ्जित तामाङ (भिडियो वार्ता)

A+ A A-

नेकपा माओवादी केन्द्रका नेता रञ्जित तामाङले दलहरूले उत्पादनमा जोड दिनुपर्ने बताएका छन् । शिलापत्रसँगको कुराकानीमा नेता तामाङले दलहरूका परम्परागत संगठन मोर्चाको औचित्य सकिएको भन्दै नयाँ खालका संरचनामार्फत उत्पादनमा जानुपर्ने बताए ।

विगतमा राजनीति आन्दोलनका लागि युवा विद्यार्थी संगठनहरूको संरचना ठीकै भए पनि परिस्थिति बदलिएकोले सिर्जनात्मक संगठन बनाउनुपर्ने बताउँछन् तामाङ ।

विद्यार्थी तथा युवा आन्दोलनमा लाग्दै गर्दा अब हरेक व्यक्तिलाई उद्यमशीलता र उत्पादनमा जोड्न सकियो भने बढ्दो युवा पलायनलाई रोक्न सकिने उनको भनाइ छ ।

नेता तामाङले भने, ‘माओवादीको तीन महिने अभियानमार्फत पार्टीले प्याराडाइम सिफ्ट गर्ने भन्दै अहिले सबै तहका जनताका कुरा सुने अवधारणा बनाउने काम भइरहेको छ । अभियान पश्चात हामी केन्द्रीय कमिटी बैठक मार्फत सबै सुझावहरूलाई सम्बोधन गर्ने प्रयास गर्छौं ।’

आफूहरू गाउँ जाँदा युवाहरूले उद्यमशीलता र रोजगारीको कुरा उठाएकोले राज्यले युवा पलायनका लागि आह्वान गर्नुपर्ने बताए । विगतका सरकारको तुलनामा अहिलेको सरकार शुसाशन र विकासमा केन्द्रित भएकाले माओवादीप्रति जनमत फेरि आकर्षित भएको उनले बताए ।

‘गाउँमा जाँदा पनि हामीले महसुस गरेका छौँ, राजनीतिप्रति सामान्य चासो मात्रै राख्नेहरूले पनि अहिलेको सरकार शुसासन र भ्रष्टाचारविरोधी काम गरेकोमा प्रचण्ड सरकारप्रति खुसी व्यक्त गरेका छन्,' उनले भने ।

माओवादी सरकारमा भएकै कारण अहिलेका चर्चित भ्रष्टाचारका काण्डहरूको खुलासा गरेकोमा आफूहरू अहिले उत्साहित भएको उनले बताए ।

आजको मुख्य समस्या युवाहरूलाई आशावादी बनाउनु रहेको भन्दै उनले भने, सरकार तथा प्रतिपक्षमा रहेका सबै दलले युवाहरूलाई स्वदेशमै काम गर्ने व्यवस्था मिलाउनुपर्ने उनले बताए ।