दसैं–तिहारमा कैलालीको सुरक्षा व्यवस्था कडा

A+ A A-

दसैं–तिहारलाई मध्यनजर गर्दै कैलालीमा सुरक्षा व्यवस्था कडा पारिएको छ । प्रदेश राजधानीसमेत रहेको कैलालीमा प्रहरीले विशेष सुरक्षा योजना तय गरेको हो । यात्रुको सहजताका लागि जिल्लाका विभिन्न ठाउँमा सहायता कक्ष स्थापना गरिएको छ भने अप्रिय घटना हुन नदिन सादा पोसाकमा प्रहरी परिचालन गरिएको छ ।

चाडपर्व नजिकिँदै गर्दा सार्वजनिक स्थल, सवारीसाधन, निजि आवास, व्यापारिक स्थान, बैंक तथा वित्तीय संस्था, सुनचाँदी पसललगायत विभिन्न स्थानमा मानिसहरूको चहलपहल बढ्दै गइरहेको छ । यस्तो अवस्थामा चोरी, डकैती, लुटपाट तथा अपहरण जस्ता अपराधिक कार्य बढी हुने सम्भावना हुन्छ । त्यस्ता शान्ति–सुरक्षासँग जोडिएका घटनालाई नियन्त्रण गर्न २४ सै घण्टा सुरक्षा व्यवस्था कडा पारिएको जिल्ला प्रहरी कार्यालय कैलालीका प्रवक्ता दक्ष कुमार बस्नेतले बताए । चाडपर्वको समयमा जिल्लाभर मादक पदार्थ बेचबिखनमा समेत रोक लगाउने तयारी हुँदै छ ।

शान्ति सुरक्षालाई भरपर्दो तथा प्रभावकारी बनाउन जिल्ला प्रहरी कार्यालय मातहतका प्रहरी एकाइमा कार्यरत सबै प्रहरी जनशक्ति र स्रोतसाधन परिचालन गरिएको उनले बताए ।

चाडपर्वका समयमा हुन सक्ने उत्शृङखलता, झैझगडा, कुटपिट, जुवा तास, पटका जस्ता सामाजिक रूपमा विकृति फैलाउन सक्ने कार्यलाई नियन्त्रणमा लिन गृहकार्य भइरहेको प्रहरी नायव उपरीक्षक दक्ष कुमार बस्नेतले बताए । चाडपर्वको समयमा यात्रुको सहजताका लागी कैलालीका ६ ठाउँमा नागरिक सहायता कक्ष स्थापना गरिएको छ ।

कैलालीमा कुनै अप्रिय घटना घट्न नदिन नेपाल प्रहरी, सशस्त्र प्रहरीलगायतका सुरक्षा निकाय खटाइएको कैलालीका प्रमुख जिल्ला अधिकारी यज्ञराज बोहराले बताए । सुरक्षा चुनौती रहेका स्थानमा विशेष सुरक्षा प्रबन्धको व्यवस्था मिलाइएको उनको भनाइ छ ।

चाडपर्वको बेला कुटपिट, चोरी, डकैती, पकेटमार, लुटपाट, जुवा, अवैध मदिरा विक्री वितरण, आगजनी, विस्फोटन, तस्करी, चोरी निकासी, ट्राफिक दुर्घटना, ठगी, ट्राफिक नियम उल्लङ्घन जस्ता अपराध बढी हुने गरेका छन् ।

प्रकाशित मिति: बिहीबार, असोज ९, २०७६ ०६:०८