कस्तो रह्यो नेकपा एसको मेची-महाकाली अभियान ?

A+ A A-

नेकपा एकीकृत समाजवादीले असोज १४ देखि २८ गतेसम्म मेची–महाकाली ‘समाजवादी जागरण अभियान’ सञ्चालन गर्‍यो । झापाको मेची नदीबाट १४ असोजमा सुरु गरेको अभियान २८ गते कर्णाली प्रदेशको राजधानी सुर्खेतमा कार्यक्रम गरी सम्पन्न भएको हो ।

अभियानको मूल नारा ‘सुशासन, रोजगारी र समृद्धिका लागि’ भन्ने थियो । यो अभियानमा पार्टी अध्यक्ष माधवकुमार नेपालदेखि शीर्ष नेता, कार्यकर्ता, कलाकारहरू मेचीदेखि महाकालीहुँदै सुर्खेत पुगे ।

१४ दिनको अवधिमा धेरै कार्यक्रम भए । नागरिकमा जागरण पैदा गर्नु, स्थानीय समस्य बुझ्नु, समाजवाद के हो ? कस्तो हुनुपर्छ भनेर बताउन अभियान चलाइएको प्रवक्त जगनाथ खतिवडाले बताए । ‘नेपालको संविधानमा समाजवादबारे लेखेको भए पनि जनताले बुझ्ने गरी जनतालाई जानकारी दियौँ । जनतालाई चेतनशिल बनायौँ । समाजवाद गरिबदेखि, जनतामुखी र कृषिमा आधारीत हुनुपर्छ । हाम्रा कार्यकर्ता धेरै उत्साहित भए । पार्टीलाई पनि फाइदा भयो,’ उनले भने ।

अभियानअन्तर्गका कार्यक्रमहरूमा अध्यक्ष नेपाललगायतका नेताहरूको उपस्थिति देखिन्थ्यो । सुर्खेतमा अभियान समापन गर्दै उनले न्याय, सुशासन, रोजगारीको आवाज बुलन्द गर्न आफ्नो पार्टीले अभियान सञ्चालन गरेको दाबी गरे । अभियानले पार्टीलाई जनतासँग जोडेको, जनताका कुरा सुन्ने, आफ्ना नीति र एजेण्डा जनतामाझ सुनाउने काम भएको उनको भनाइ छ ।

अभियान सोचेभन्दा सफल भएको खतिवाडाको दाबी छ । १५ दिनमा ५५ वटा कार्यक्रम गर्दा केही अप्ठेरा आए पनि समग्रमा सफलता मिलेको उनको तर्क छ । ‘यसको राष्ट्रिय महत्त्व र दोस्रो नेकपा एसको प्रचार, कम्युनिष्ट आन्दोलनका बारेमा पुनः जनतालाई प्रष्ट पार्न सफल भयौँ । हाम्रो भूमिकाप्रति जनतालाई स्पष्ट पारेका छौँ,’ उनले भने ।

उपाध्यक्ष राजेन्द्र पाण्डे पनि अभियान सफल भएको तर्क गर्छन् । ‘जनतासँग घेटघाट भयो । हाम्रो पार्टीको प्रचारप्रसार भयो । समाजवाद भने पनि समाजवादी अर्थतन्त्र निमार्ण गर्ने कार्यक्रम ल्याउन नसकेको बारेमा जनतालाई जानकारी गरायौँ,’ उनले भने ।

दिन चाहेको सन्देश

एमालेबाट विभाजित भएर निर्वाचनमा होमिएको नेकपा एस राष्ट्रिय पार्टी बन्न पनि सकेन । यसको पीडाबोध कार्यकर्ता तहसम्मै रहेको पाइएको नेताहरूले बताएका छन् ।

'यो अभियानले जनतालाई सचेत गराउने । हाम्रो पार्टीको विचार, दर्शन, उद्देश्य र समाजवादको लागि कस्तो अर्थतन्त्र चाहिन्छ । यसको लागि नेपालमा कुन कुन कुरामा जोड दिनुपर्छ भनेर जनतालाई सन्देश दिएको छ,' पाण्डे भन्छन्, 'युवाहरूलाई स्वरोजगार बनाउने, राष्ट्रिय उद्योगहरू स्थापना नगरी समाजवादमा जान सकिँदैन भनेर जनतालाई भनेका छौँ ।’

पार्टी जसरी चलेको छ ठीक छ भन्ने आफूहरूको सोच अभियानले भत्काइदिएको उनी बताउँछन् । ‘हाम्रो पार्टीलाई चलायमान बनाउन सफल भयौँ । २०८३ को स्थानीय निर्वाचन र २०८४ को निर्वाचन एक्लै लड्ने भनेका छौँ । जनताका समस्या पनि प्रधानमन्त्रीलाई बुझाउछौँ,’ उनले भने ।

सामान्य सुधारले मात्रै नपुग्ने स्थिति देखिएको पाण्डे बताउँछन् । ‘नेताहरू पनि सामान्य सुधार भए हुन्छ । त्यसको लागि क्रान्तिकारी परिवर्तन चाहिँदैन भन्ने बुझाइमा थिए । संविधानमा लेखेको छ । भइहाल्यो भन्ने थियो । तर अहिले जे भइरहेको छ त्यति हुँदैन भन्नेमा पुगेका छन्,’ उनले भने ।

प्रकाशित मिति: सोमबार, असोज २९, २०८० १९:०१