देउवाले बनाइदिएकाे जम्बाे नेविसंघ: न प्रमाणपत्र न बैठक

A+ A A-

९ चैत २०७८ मा साेही वर्षकाे भदाै-असाेजमा महाधिवेशन गर्ने जिम्मेदवारी दिएर कांग्रेस सभापति शेरबहादुर देउवाले दुजाङ शेर्पालाई नेपाल विद्यार्थी संघ (नेविसंघ) काे अध्यक्ष बनाए । महाधिवेशन त शेर्पाले गर्न सकेनन् नै समितिले पूर्णता पाउन २ वर्षभन्दा धेरै समय लाग्याे । अर्थात् गत साउन २३ गते सभापति देउवाले शेर्पाकाे समितिमा ७११ सदस्य मनाेनीत गरे ।

महाधिवेशन गर्ने जिम्मेवारी पाएका शेर्पाले महाधिवेशन त के मनाेनीत केन्द्रीय सदस्यहरूकाे पदभार ग्रहणसमेत गराउन सकेका छैनन् । सभापति देउवाले जम्बाे समिति बनाए पनि असन्तुष्टि हुँदा अझै केन्द्रीय सदस्यहरू थप्ने विषयमा पनि पार्टी नेताहरूसँग छलफल भइरहेको छ । तर, सहमति हुन सकेका छैनन् ।

नेतालाई भाग पुर्‍याउन जम्बो बनेको नेविसंघ तदर्थ समिति, कसरी गर्छ काम ?

नेविसंघका नेताहरूको डेलिगेसनमा कांग्रेस महामन्त्री गगन थापाले असोज १४ गते भनेका थिए, ‘सानो तरुण दलको समिति बनायौँ । असहमति छ भनेर ठूलो संख्यामा नेविसंघ बनायौँ । तर अहिले दुवैको डेसिलगेसन छ । संख्या योभन्दा बढाउन हुँदैन ।’

तर संस्थापन समूहका एक नेविसंघ नेताका अनुसार असन्तुष्टि सम्बोधन गर्नका लागि केन्द्रीय सदस्य थप गर्नुपर्ने भएकाले नेविसंघले गति लिन सकेको छैन । ‘असन्तुष्टि कायमै छ । त्यसलाइ सम्बोधन गर्न सदस्यहरू थप्ने विषयमा कुरा मिल्न सकेको छैन । त्यसैले नेविसंघमा सुस्तता आएको हो,’ ती नेताले भने ।

नेविसंघको केन्द्रीय सदस्यहरूको प्रमाणपत्र वितरण, पहिलो बैठक र कार्यसम्पादन समिति दसैँअघि सकिसक्ने योजना थियो । तर भने जस्तो हुन सकेन । काम गर्न नसक्ने समितिलाई दसैँ बाहना बनेको छ । अब दसैँ र तिहारको बीचमा प्रमाणपत्र वितरण लगायतका कामहरू सक्ने योजना नेविसंघमा छ ।

३२ वर्षे उमेर हदका कारण धेरै विद्यार्थी नेतालाई पद दिएर व्यवस्थान गर्नुपर्ने थियो । स्ववियु चुनावमा पनि २८ वर्षको उमेर हद लाग्यो । विद्यार्थी राजनीति गरेकालाई व्यवस्थापन गर्न जम्बो समिति बनाइयाे ।

‘जम्बो समितिबाट समस्याभन्दा पनि अवसर देखेका छौँ । प्रत्येक पालिकामा एक एक जना केन्द्रीय समिति खटाएर अधिवेशन केन्द्रित गतिविधि गराउने योजना छ,’ नेविसंघ नेता पदम भट्टराईले शिलापत्रसँग भने ।

चरम भ्रष्टाचार, महँगी, कालाबजारी रोक्न कदम चाल्ने, सामुदायिक शिक्षा स्तर बढाउने, विद्यार्थी संख्या सामुदायिक शिक्षालयमा घट्नुको कारण खोजी समाधानको उपाय खोजी नीतिगत पहल गर्ने लगायतका तत्कालीन उद्देश्यहरू नेविसंघले राखेको थियो । तर यसमा खराे उत्रन सकेको छैन । संगठनको काम नियमित गर्न नसक्ने र कछुवा गतिमा नेविसंघ छ ।

बरालिएको विद्यार्थी आन्दोलनमा भद्रगोल नेविसंघ

‘नेविसंघ बनाउन खोजेको गतिशील नै हो । युवाहरूमा राजनीतिप्रति वितृष्णा भरहेको अवस्थामा छ । कहिलेकाँही बनाउन खोजेको एउटा भैदिन्छ अर्को । दौडिन खोजेका हौँ तर दौडिन सकेका छैनौँ,’ नेविसंघ नेता टेकराज अवस्थीले शिलापत्रसँग भने ।

शैक्षिक मुद्दा र राजनीति मुद्दाहरू सँगैसँगै लिएर जान उनले बताए ।

‘जनजीवनसँग सरोकार राख्ने जनताको एजेण्डामा कुरा गर्ने, विद्यार्थीहरू पलायन हुँदैछन् यसलाई रोक्न शिक्षाको गुणस्तर सुधार्न अघि बढ्नेछौँ । शिक्षालय सुधारको मुख्य एजेण्डा हो । विश्वविद्यालयमा भागवण्डा हुनुहुँदै । यो वर्ष शिक्षाको अवस्था के थियो र अर्को वर्ष के परिवर्तन हुन्छ भनेर तथ्याकंमा नतिजा दिने गरी अघि बढ्छौँ हामी,’ अवस्थीले भने ।

नयाँ ढंगले नेविसंघ अघि बढ्न खोज्दा कन्फ्युजन भएको केन्द्रीय सदस्य अक्षय गजुरेल बताउँछन् । ‘अहिले चाडपर्व पनि लागेको छ । पार्टीका गतिविधि पनि यसबीचमा भए । नयाँ ढंगले जान खोजेकाले कन्फ्युजन भएको हो,’ उनले भने ।

संघीय शिक्षा विधेयकमा अन्य विद्यार्थी संगठनले जस्तै नेविसंघले पनि लिखित सुझाव पेस गरेको छ । दुई प्रकारको शिक्षा नीति हुन नहुने, सरकारी कर्मचारीका सन्तान सरकारी शिक्षण संस्थामा पढाउनुपर्ने, नि:शुल्क भनिए पनि सामुदायिक शिक्षालयमा अंग्रेजी माध्यमको शुल्क, परीक्षा शुल्क, भर्ना शुल्क पूर्ण रुपमा निशेष गर्नुपर्ने र देशभरका विद्यालयको भौतिक पूर्वाधार समान मापदण्ड हुनुपर्ने लगायतका सुझावहरू दिइएको नेता भट्टराईले बताए ।

प्रकाशित मिति: सोमबार, असोज २९, २०८० २०:०६