प्रवलजंग पाण्डे सिटिजन्स बैंकको अध्यक्षमा निर्वाचित, को हुन् उनी ?

A+ A A-

सिटिजन्स बैंक इन्टरनेसनलका सञ्चालक प्रवलजंग पाण्डे सो बैंकको अध्यक्ष पदमा निर्वाचित भएका छन् । उनलाई बैंकको शुक्रबार सम्पन्न १७औँ वार्षिक साधारणसभापछि बसेको सञ्चालक समितिको बैठकले सो पदमा निर्वाचित गरेको हो ।

बैंकका संस्थापक शेयरधनीको तर्फबाट प्रतिनिधित्व गर्दै अध्यक्ष बनेका पाण्डे बैंकका प्रमुख लगानीकर्ता पनि हुन् । अध्यक्ष चयनपछि उनले बैंकलाई नयाँ उचाइमा पुर्‍याउने प्रतिबद्धता जनाउँदै संस्थागत सुशासनलाई सुदृढ बनाउने बताए । नयाँ प्रविधिमा आधारित बैंकिङलाई प्राथमिकतामा राख्ने र सेवा विस्तार गर्ने योजना उनको छ ।

यसअघि बैंकको अध्यक्षमा राजनसिंह भण्डारी थिए ।

नवनिर्वाचित अध्यक्ष पाण्डे बैंकको मर्जर तथा एक्विजिसन समितिको सदस्य भएको बेला तिनाउ मिसन विकास बैंक, सृजना फाइनान्स र सहयोगी विकास बैंकलाई प्राप्ति गरिएको थियो ।

पाण्डे कसमस सिमेन्टका निर्देशक पनि हुन् । इस्टर्न कसमसमा पनि उनी निर्देशक छन् । लोमस फर्मास्युटिकल्समा सञ्चालक रहेका पाण्डे निजीक्षेत्रबाट सञ्चालित डाटा हबमा समेत आबद्ध छन् । बैंक तथा वित्तीय क्षेत्रका साथै निजीक्षेत्रको सम्पूर्ण डाटा यहाँ राखिन्छ ।

फर्चुना ग्रुपमा पनि पाण्डे छन् । फर्चुना ग्रुपले औषधिको प्याकिङ सामग्री उत्पादन गर्दै आएको छ । पाण्डे नेपाल उद्योग वाणिज्य महासंघका पूर्वअध्यक्ष प्रदीपजंग पाण्डेका छोरा हुन् ।

इन्जिनियरिङमा स्नातक गरेका पाण्डे दुई दशकभन्दा बढी समयदेखि सिमेन्ट, औषधिजन्य उत्पादनलगायत व्यवसायमा सक्रिय छन् ।

साधारणसभाले सजन शर्मा र सीता कार्की केसीलाई सञ्चालकमा चयन गरेको छ । सर्वसाधारणका तर्फबाट प्रकाशचन्द्र मैनाली र विजयध्वज कार्की तथा स्वतन्त्र सञ्चालकमा अनिल ज्ञवाली चयन भएका छन् ।

साधारणसभाले ५.७९ प्रतिशत नगद लाभांशको प्रस्ताव पारित गरेको छ भने उपयुक्त संस्थालाई गाभ्ने/गाभिने प्रक्रिया अगाडि बढाउने अख्तियारी सञ्चालक समितिलाई दिने निर्णय पनि गरेको छ ।

प्रकाशित मिति: शुक्रबार, असोज २६, २०८० १९:२५