केदार कार्कीलाई मुख्यमन्त्री मान्न देउवालाई किन भयो गाह्रो ?

A+ A A-

एमालेको समर्थनमा कांग्रेस प्रदेशसभा सांसद केदार कार्कीले विद्रोह गर्दै मुख्यमन्त्रीमा दाबी पेस गरेपछि शुक्रबार साँझ कांग्रेसको केन्द्रीय कार्यसम्पादन समिति बैठक बस्यो ।

निकास दिने भनिएको बैठकमा नेता डा. शेखर कोइराला अनुपस्थित भए । कोइराला अनुपस्थित भएपछि कांग्रेसको कार्यसम्पादन समितिको बैठक निष्कर्षविहीन भयो । कार्यसम्पादन समितिको बैठक शनिबार बिहानका लागि फेरि बोलाइएको छ ।

प्रचार विभाग प्रमुख मीन विश्वकर्माका अनुसार कांग्रेस नेताहरूको बैठकमा प्रधानमन्त्री तथा माओवादी केन्द्रका अध्यक्ष प्रचण्डसमेत सहभागी भएर विकल्प नाम दिन भन्दा पनि शेखरले मानेनन् । कांग्रेसले एकमतले निर्णय गरे माओवादी इन्द्र आङ्बोलाई ब्याक गराउन तयार भए पनि शेखर बाधक बनेको उनले बताए । शेखर त्यसपछि कार्यसम्पादन समिति बैठकमा समेत नआएको र उनीसँग फेरि छलफल गर्नेर बैठक भोलिसम्म निरन्तर रहने विश्वकर्माले बताए ।

केदार कार्कीलाई मुख्यमन्त्री मान्न के समस्या भयो ? भन्ने प्रश्नमा विश्वकर्माले विद्रोह गर्नेलाई मान्न नसकिने घुमाउरो जवाफ दिए । ‘पार्टी नेतृत्वले गरेको निर्णयलाई उल्लंघन गर्नुभयो । कांग्रेसभित्र कताकता २०५१ को अवस्था नै दोहोरिएजस्तो देखिन्छ । यसलाई सामान्य रूपमा लिन मिल्दैन । विद्रोहलाई स्थापित गर्ने हो भने पार्टीको स्वरुप र संरचना रहँदैन,’ विश्वकर्माले भने ।

असहमति भए पनि शेखरले प्रस्तावित मुख्यमन्त्रीमा अर्को नाम दिनुपर्ने बताए । ‘असहमति भएको हो भने नाम दिन सक्नुपर्थ्यो । त्यो पनि भएन । सायद उहाँले सोच्दै हुनुहुन्छ,’ उनले भने । उनले कोशीमा कांग्रेस फुटेको भन्न नमिल्ने बताए ।