राष्ट्रपति र प्रधानमन्त्रीलाई शेखरकाे जवाफ– कांग्रेस बचाउन चालेकाे कदमबाट पछि हट्‌न सक्दिनँ

राष्ट्रपति र प्रधानमन्त्रीलाई शेखरकाे जवाफ– कांग्रेस बचाउन चालेकाे कदमबाट पछि हट्‌न सक्दिनँ

शेखर काेइराला

A+ A A-

कोशी प्रदेशमा केन्द्रीय गठबन्धनको निर्णय नमान्ने कांग्रेसका आठ जना सांसदको निर्णय सच्याउन कांग्रेस संस्थापनइतर समूहका नेता डा शेखर कोइरालालाई दबाब बढेको छ । उनलाई पार्टीभित्र र बाहिरबाट टेलिफोनमार्फत दबाब दिइएको हो ।

राष्ट्रपति रामचन्द्र पौडेल र प्रधानमन्त्री पुष्पकमल दाहाल प्रचण्डले काेइरालालाई टेलिफोन गरी गठबन्धनका उम्मेदवार माओवादीका इन्द्र आङ्बोलाई समर्थन गर्न दबाब दिएका हुन् ।

कोशी प्रदेशमा नेपाली कांग्रेसका सांसद केदार कार्कीले एमालेका ३९ र कांग्रेसका ८ गरी कुल ४७ सांसदको हस्ताक्षरसहित मुख्यमन्त्रीमा दाबी पेस गरेका छन् ।

कांग्रेससहित माओवादी, एकीकृत समाजवादी र जनता समाजवादी पार्टीले माओवादी संसदीय दलका नेता इन्द्र आङ्बोलाई मुख्यमन्त्रीमा समर्थन गर्ने लिखित सम्झौता गरेका थिए ।

बिहीबार प्रदेश प्रमुख पर्शुराम खापुङसमक्ष कार्की र आङ्बोले मुख्यमन्त्रीमा दाबी पेस गरेका छन् । कार्कीले ४७ सांसदको हस्ताक्षर बुझाएका छन् भने आङ्बोले संसदीय दलका नेताहरूको हस्ताक्षर बुझाएका छन् ।

‘राष्ट्रपतिज्यूले पनि कोशी मुख्यमन्त्रीको विषयमा फोन गर्नुभएको हो । दाइले सभापति, महामन्त्रीहरू नेता कृष्ण सिटौला लगायतले माओवादीका आङ्बोलाई मुख्यमन्त्री छाड्न तयार भएको कुरा पार्टीबाट नभएर प्रचण्डको मुखबाट सुन्नुपर्‍यो, कस्तो पार्टी बनायौँ हामीले भन्ने कुरा राष्ट्रपतिसँग राख्नुभयो,’ कोइरालानिकट एक नेताले शिलापत्रसँग भने ।

घेराबन्दी गरिएकाले पार्टी बचाउन आफ्नो निर्णयबाट ब्याक हुन नसक्ने कोइरालाको अडान छ । ‘हामी कोशीमा ब्याक हुन सक्दैनौँ । पार्टी बचाउन मैले यो निर्णय गरेको हुँ । गठबन्धनभित्र कोशी सरकारकाे नेतृत्व कांग्रेसले लिने पहिले नै सहमति भएको हो, अहिले छाड्न मिल्दैन,’ कोइरालाले बताएकाे उल्लेख गर्दै ती नेताले भने ।

कोइरालालाई प्रधानमन्त्री पुष्पकमल दाहाल प्रचण्डले पनि टेलिफोन गरेका छन् । प्रधानमन्त्री प्रचण्डले मुख्यमन्त्रीको दाबीबाट कार्कीलाई ब्याक गराउन आग्रह गरेका थिए । जवाफमा कोइरालाले ब्याक नहुने बताए । ‘तपाईंहरूले आङ्बोजीलाई नै ब्याक गर्नुहोस्, हामी ब्याक हुन मिल्दैन,’ शेखरको जवाफ थियाे ।

कोइरालालाई कांग्रेस नेता ज्ञानेन्द्र कार्कीले पनि फोन गरेका थिए । उनले जवाफमा ब्याक नहुने सन्देश सभापति शेरबहादुर देउवालाई भनिदिन भनेका थिए ।

‘कोशीमा शेखर ब्याक हुँदैन भनेर सभापतिजीलाई भनिदिनुस् भन्नुभयो,’ ती नेताले भने । 'गठबन्धनभित्रबाट सहमति गरेर कांग्रेसको नेतृत्वमा सरकार बनाऔँ भनेको थिएँ । पार्टी बचाउन आवश्यकता भएपछि यो कदम चालेको हो । ब्याक हुन सक्दिनँ भन्ने जवाफ तीनै जनालाई दिनुभएको हो', शेखर निकट अर्का नेताले शिलापत्रसँग भने ।

प्रकाशित मिति: शुक्रबार, असोज २६, २०८० १२:५१