हरि र निराजनको कीर्तिमानी बराबरी गरेपछि अञ्जन विष्टले भने, 'खेल जित्न नसक्दा खुसी मनाउन सकिनँ’

हरि र निराजनको कीर्तिमानी बराबरी गरेपछि अञ्जन विष्टले भने, 'खेल जित्न नसक्दा खुसी मनाउन सकिनँ’

A+ A A-

फिफा विश्वकप २०२६ अन्तर्गत एसिया छनोटको पहिलो चरणको खेलमा नेपालले लाओसलाई बराबरीमा रोकेको छ ।

बिहीबार साँझ त्रिपुरेश्वरस्थित दशरथ रंगशालामा भएको खेलमा नेपाल घरेलु मैदानमै लाओससँग बराबरीमा रोकिएको हो । खेलमा सुरुवाती अग्रता भने पाहुना टोली लाओसले लिएको थियो ।

खेलको ३३औँ मिनेटमा लाओसका कप्टान बाउलपछान बोयनकोङले गोल गर्दै टोलीलाई सुरुवाती अग्रता दिलाएका थिए । बोयनकोङले चोनी वेनपासेर्थको पासमा गोल गरेका थिए । पहिलो हाफमा १-० ले पछि परेको नेपालका लागि खेलको ४७ औँ मिनेटमा अञ्जन विष्टले बराबरी गोल गरेका थिए । योसँगै नेपालले घरेलु मैदानमा भएको खेलमा हार टार्न सफल भयो ।

खेलमा लाओसविरुद्ध गोल गरेका अञ्जनले भने कीर्तिमानी बराबरी गरेका छन् । अञ्जनले नेपाली राष्ट्रिय फुटबल टिमबाट सर्वाधिक अन्तर्राष्ट्रिय गोल गर्ने हरि खड्का र निराजन रायमाझीको कीर्तिमानी बराबरी गरेका हुन् ।

लाओससँग बराबरी खेलेको नेपालले जित्न नसकेपछि आफूले कीर्तिमान बराबरीको खुसी साट्न नसकेको अञ्जनले प्रतिक्रिया दिएका छन् । एन्फा एकेडेमीका उत्पादन अञ्जनले खेलपछि पत्रकारहरूसँग कुराकानी गर्दै उनले जित्नुपर्ने दबाबमा खेलेको स्वीकारे ।

‘प्रशिक्षकले आजको खेल जसरी पनि जित्नुपर्छ भन्नुभएको थियो । स्कोर चाहियो भन्नुभएको थियो । जित्नकै लागि मिहिनेत गरेको, बराबरीमै भए पनि चित्त बुझाउनु परेको छ’, उनले भने । कीर्तिमानी बराबर गरेककोबारे प्रश्न गर्दा उनले भने, ‘जित्न नसकेपछि मैले कीर्तिमान बराबरीको खुसी साट्न सकिनँ ।’ नेपालले अब दोस्रो चरणको खेल लाओसको घरेलु मैदानमा खेल्नेछ ।

प्रकाशित मिति: बिहीबार, असोज २५, २०८० २१:०७