पार्टीभित्र घेराबन्दी भएपछि कोशीका आफूनिकट प्रदेश सांसदलाई शेखरले भनेका थिए- तपाईंहरूको निर्णय मान्छु

पार्टीभित्र घेराबन्दी भएपछि कोशीका आफूनिकट प्रदेश सांसदलाई शेखरले भनेका थिए- तपाईंहरूको निर्णय मान्छु

A+ A A-

कोशी प्रदेशको मुख्यमन्त्री कांग्रेसबाट केदार कार्कीलाई बनाउनुपर्ने भन्ने अडानमा थिए, कांग्रेस नेता डा. शेखर कोइराला । कांग्रेसबाट दुई-दुई पटक मुख्यमन्त्री बने पनि संसदीय दलका नेता उद्धव थापाले विश्वासको मत पाउन नसकेकाले उनको विकल्प खोज्नुपर्ने अडान कोइरालाले लिएका थिए । केदार नभए अमृत अर्याललाई भए पनि मुख्यमन्त्री बनाउनुपर्ने कोइरालाले बताएका थिए ।

तर, सभापति शेरबहादुर देउवाले संसदीय दलको नेता भएकाले उद्धवको विकल्पमा अरुलाई मुख्यमन्त्री बनाउन नसकिने अडान लिए । सँगसँगै केदार र अमृतको नाममा देउवाले सहमति जनाएनन् । उल्टै कांग्रेसभित्र कोशीको मुख्यमन्त्रीलाई लिएर विवाद बढ्न थालेपछि माओवादी केन्द्रलाई नै सरकारको नेतृत्व दिन देउवा तयार भए ।

त्यसपछि सत्ता गठबन्धनको बालुवाटारमा बसेको बैठकले माओवादी केन्द्रका इन्द्र आङ्बोलाई मुख्यमन्त्रीमा अघि सार्ने निर्णय गरेको थिए । मुख्यमन्त्री बनाउने विषयमा कोइराला पार्टीभित्र एक्लिए । कोइरालालाई उनकै समूहका महामन्त्री गगन थापाले नै साथ दिएनन् ।

कोइरालाले सत्ता गठबन्धनबाट सहमति खोजेर कांग्रेसको नेतृत्वमा सरकार बनाउने प्रयास गरेका थिए । त्यसमा सभापति शेरबहादुर देउवा, उपसभापति पूर्णबहादुर खड्का, महामन्त्रीद्वय गगन थापा र विश्वप्रकाश शर्मा, नेताहरू कृष्ण सिटौला र ज्ञानेन्द्र कार्कीको हठ कारक बनेको इतर समूहका एक नेताले शिलापत्रलाई जानकारी दिए ।

‘पहिलो चरणमा प्रधानमन्त्री पुष्पमकल दाहाल प्रचण्डजी कांग्रेसलाई मुख्यमन्त्री दिन सकारात्मक हुनुहुन्थ्यो । तर, कांग्रेसका नेताहरू केदार वा अमृतलाई मुख्यमन्त्री दिनभन्दा माओवादीलाई दिन तयार भए । यत्रो निर्णय हुँदा पनि शेखर दाइसँग कुरा पनि गरिएको छैन । उहाँले सांसदहरूलाई स्वतन्त्र रूपले जे निर्णय गर्नुहुन्छ, त्यही मान्छु भन्नुभएको छ,’ ती नेताले शिलापत्रसँग भने ।

एमालेलाई साथमा लिएर केदारले मुख्यमन्त्रीमा दाबी पेस गर्ने उनले बताए । त्यही योजना अनुसार कार्की बिहीबार अपराह्न काठमाडौंबाट विराटनगर पुगेर एमालेको समर्थनमा मुख्यमन्त्रीमा दाबी पेस गरेका हुन् ।

'सभापतिकोमा जाँदा महामन्त्रीहरूलाई मनाउनुस् भन्ने, प्रधानमन्त्रीकोमा जाँदा शेरबहादुरलाई मनाउन भन्ने । निर्णय प्रक्रियामा कहीँकतै सामेल नगराउने काम भएको छ । चौतर्फी घेराबन्दी भएको अवस्थामा कोइरालाले सांसदहरूलाई जे तपाईंहरूले निर्णय गर्नुहुन्छ, मैले मान्छु भन्नुभएको छ,' ती नेताले भने ।

प्रकाशित मिति: बिहीबार, असोज २५, २०८० १७:५५